‘என்னய்யா கடை இது.. ஒரு துணிகூட நான் போடுற மாதிரி இல்லையே’.. கடைக்குள் புகுந்து அதகளம் செய்த மாடு!

அசாமில் துணிக்கடைக்குள் மாடு ஒன்று புகுந்த வீடியோ இணையத்தில் வைரலாகி வருகிறது.

Published: Monday, January 9, 2023, 15:58 [IST]

Subscribe to Oneindia Tamil

திஸ்பூர்: அசாமில் துணிக்கடை ஒன்றிற்குள் புகுந்து, அங்கிருந்த வாடிக்கையாளர்களையும், பணியாளர்களையும் அலற விட்ட வீடியோ ஒன்று இணையத்தில் அதிக கவனத்தை ஈர்த்து வருகிறது.

சமூகவலைதளங்களில் அவ்வப்போது ஏதாவது வேடிக்கையான வீடியோக்கள் வைரலாகி விடும். மனிதர்களின் சேட்டைகளுக்கு இணையாக விலங்குகளின் சேட்டை வீடியோக்களும் பார்ப்பவர்களை ரசிக்கச் செய்யும். அதனால்தான், செல்பி எடுத்த குரங்கு, போட்டோ எடுத்த அணில், யானையின் குளியல், ஹெட்போனை தூக்கிச் சென்ற பறவை என பல வேடிக்கை வீடியோக்கள் வைரலாகி விடுகின்றன.

அந்த வகையில், தற்போது அசாமில் நடந்த ஒரு சம்பவமும் இணையத்தில் அதிக கவனத்தைப் பெற்று, நெட்டிசன்களால் அதிகம் பகிரப்பட்டு வருகிறது.

ஷாப்பிங் போன மாடு

இந்தியாவைப் பொறுத்தவரை சாலைகளில் மாடுகள் சுதந்திரமாகச் சுற்றித் திரிவது ஒன்றும் ஆச்சர்யமான விசயமில்லை. ஆனால், சாலையைத் தாண்டி மாடு ஒன்று ஷாப்பிங் போக முயற்சித்ததுதான் இணையத்தை வியப்பில் ஆழ்த்தியுள்ளது. தற்போது இணையத்தைக் கலக்கி வரும் இந்த வீடியோ அசாம் மாநிலம் துப்ரியில் எடுக்கப்பட்டுள்ளது.

துணிக்கடை

அங்குள்ள ஷாப்பிங் மால் ஒன்றில் அதிரடியாக நுழைந்த மாடு ஒன்று, துணிக்கடைக்குள் தனக்கான ஆடையைத் தேடுவது போல், ஒவ்வொரு பகுதியாக சுற்றி வருகிறது. தெரியாமல் உள்ளே நுழைந்து விட்டோம்.. எப்படி வெளியில் செல்வது எனத் தெரியவில்லையே என்ற குழப்பத்தில்தான் மாடு அப்படி சுற்றி வருகிறது என்றாலும், பார்ப்பதற்கு ஷாப்பிங் செய்வது போன்று வேடிக்கையாக அந்த வீடியோ உள்ளது.

பதறிப்போன ஊழியர்கள்

திடீரென மாடு கடைக்குள் நுழைந்ததால், அங்கிருந்த ஊழியர்களும், வாடிக்கையாளர்களும் கொஞ்சம் பதறிப் போகின்றனர். மாடு அவர்களைத் தாக்கும் நோக்கத்தில் கடைக்குள்ளே நுழையவில்லை என்றாலும், மாட்டிற்கு வழியை விட்டு விட்டு, அவர்கள் ஒதுங்கி நிற்கும் காட்சிகள் வீடியோவில் இடம் பெற்றுள்ளன. கடையில் இருந்தவர்தான் இந்த வீடியோவை எடுத்து சமூகவலைதளத்தில் பகிர்ந்துள்ளார்.

சின்ன வீடியோ

13 வினாடிகள் மட்டுமே ஓடும் இந்த வீடியோவில், நடுக்கடைக்குள் நின்றிருந்த மாடு, ஒரு வழியாக அங்கு சுற்றி, இங்கு சுற்றி, வெளியே செல்லும் பாதையைக் கண்டுபிடித்து, பின் வெளியில் சென்று விடுகிறது. பார்ப்பதற்கு நகைச்சுவையாக இருக்கும் இந்த வீடியோவை, நெட்டிசன்கள் பலவிதமான காமெடி கமெண்ட்களோடு சமூகவலைதளங்களில் பகிர்ந்து வருகின்றனர்.

Published On January 9, 2023