ஜார்கண்ட் முதல்வராக பதவியேற்றார் ஹேமந்த் சோரன்! ராகுல், உதயநிதி ஸ்டாலின் பங்கேற்பு
ராஞ்சி: ஜார்க்கண்ட் மாநில முதல்வராக ஹேமந்த் சோரன் பதவியேற்றுக்கொண்டார். ராஞ்சியில் நடைபெறும் பதவியேற்பு விழாவில் ஆளுநர் பதவிப்பிரமாணம் செய்து வைத்துள்ளார். இந்த விழாவில் ராகுல் காந்தி, மல்லிகார்ஜூன கார்கே, மம்தா பானர்ஜி, அகிலேஷ் யாதவ், சரத்பவார் உள்ளிட்ட இந்தியா கூட்டணி தலைவர்கள் பங்கேற்றுள்ளனர். தமிழக துணை முதல்வர் உதயநிதியும் ஹேமந்த் சோரன் பதவியேற்பு விழாவில் கலந்து கொண்டுள்ளார்.
ஜார்க்கண்டில் உள்ள 81 சட்டமன்ற தொகுதிகளுக்கும் கடந்த 13 மற்றும் 20 ஆம் தேதிகளில் இரண்டு கட்டமாக தேர்தல் நடைபெற்றது. இந்த தேர்தலில் ஜார்கண்ட் முக்தி மோர்ச்சா தலைமையிலான இந்தியா கூட்டணி கட்சி வெற்றி பெற்றது. ஆட்சியை பிடிக்க வியூகம் வகுத்து இருந்த பாஜகவுக்கு ஏமாற்றமே கிடைத்தது. இந்தியா கூட்டணி 56 இடங்களிலும் பாஜக கூட்டணி 24 இடங்களிலும் வெற்றி பெற்றது.
இந்தியா கூட்டணி வெற்றி: ஜார்க்கண்ட் முக்தி மோர்சா 34 இடங்களிலும், காங்கிரஸ் கட்சி 16 இடங்களிலும் வெற்றி பெற்றது. ஆட்சி அமைக்க தேவையான பெரும்பான்மை இந்தியா கூட்டணிக்கு கிடைத்ததையடுத்து ஹேமந்த் சோரன் ஆளுநரை சந்தித்து ஆட்சி அமைக்க உரிமை கோரினார். இதையடுத்து ஆளுநர் ஆட்சி அமைக்க அழைப்பு விடுத்ததையடுத்து இன்று ஜார்கண்ட் முதல்வராக பதவியேற்றுள்ளார்.
4வது முறையாக முதல்வர்: ஜார்க்கண்ட் ஆளுநர் சந்தோஷ்குமார் கங்வார் அவருக்கு பதவிப்பிரமாணமும் ரகசிய காப்பு பிரமாணமும் செய்து வைத்தார். ஹேமந்த் சோரன் முதல்வராக பதவியேற்பது இது 4-வது முறையாகும். இன்று ஹேமந்த் சோரன் மட்டுமே பதவியேற்றுள்ளார். அவரது அமைச்சரவையில் இடம் பெற போகிறவர்களின் பட்டியல் இன்னும் வழங்கப்படவில்லை.
கேபினர் விரிவாக்கம் எப்போது?: அமைச்சரவையில் யார் யாருக்கு இடம் என்பது தொடர்பாக என்ற பேச்சுவார்த்தை காங்கிரஸ் கட்சிக்கும் ஹேமந்த் சோரன் கட்சிக்கும் இடையே நடைபெற்று வருகிறது. இதனால், அடுத்த வாரம் கேபினட் விரிவாக்கம் செய்யப்படும் என்று சொல்லப்படுகிறது. அதற்கு முன்பாக நம்பிக்கை வாக்கெடுப்பும் அவையில் நடைபெற உள்ளது.
ஹேமந்த் சோரன் கேபினட்டில் ஜார்க்கண்ட் முக்தி மோர்ச்சா கட்சியை சேர்ந்த 6 ஏம்.எல்.ஏக்களுக்கும், காங்கிரஸ் கட்சியை சேர்ந்த 4 பேருக்கும், ராஷ்ட்ரீய ஜனதா தளம் கட்சியை சேர்ந்த ஒருவருக்கும் இடம் ஒதுக்கப்படும் என தகவல்கள் கூறுகின்றன. ஜார்க்கண்ட் தலைநகர் ராஞ்சியில் உள்ள மோர்ஹபதி மைதானத்தில் பதவியேற்பு விழா நடைபெற்றது.
உதயநிதி ஸ்டாலின் பங்கேற்பு: இந்த பதவியேற்பு விழாவில், இந்தியாகூட்டணி தலைவர்கள் பங்கேற்றுள்ளனர். காங்கிரஸ் தலைவர் மல்லிகார்ஜூன கார்கே, கட்சியின் முக்கிய தலைவரும், மக்களவை எதிர்க்கட்சி தலைவருமான ராகுல் காந்தி, தேசியவாத காங்கிரஸ் தலைவர் சரத் பவார், மேற்கு வங்க முதல்வர் மம்தா பானர்ஜி, மேகலயா முதல்வர் கொன்ராட் சர்மா, பஞ்சாப் முதல்வர் பகவந்த் மான் உள்ளிட்டோர் பங்கேற்றுள்ளனர். இதேபோல் தமிழக துணை முதல்வர் உதயநிதி ஸ்டாலினும் பங்கேற்றுள்ளார்.
Click it and Unblock the Notifications
Sign in with Google