சோனியா காந்தி விரைவில் குணமடைய பிரார்த்திக்கிறேன்.. மோடி
டெல்லி: காங்கிரஸ் தலைவர் சோனியா காந்தி சுகவீனம் காரணமாக தனது வாரணாசி பிரச்சாரப் பயணத்தை ரத்து செய்துள்ளார். இதையடுத்து டெல்லி முன்னாள் முதல்வர் ஷீலா தீட்சித்தைத் தொடர்பு கொண்டு பேசிய பிரதமர் மோடி, சோனியா காந்தியின் நலன் குறித்து விசாரித்தார். அவர் விரைவில் குணமடையவும் தான் பிரார்த்திப்பதாகவும் அவர் கூறினார்.
உத்தரப்பிரதேச மாநிலத்தில் அடுத்த வருடம் சட்டசபை தேர்தல் நடைபெறவுள்ளது. காங்கிரஸ் சார்பில் முதல்வர் வேட்பாளராக டெல்லி முன்னாள் முதல்வர் ஷீலா தீட்ஷித் அறிவிக்கப்பட்டுள்ளார்.
இந்தத் தேர்தலுக்கான பிரச்சாரத்தை ஏற்கனவே காங்கிரஸ் கட்சி தொடங்கி விட்டது. தீவிரமாக திட்டமிட்டு பணியாற்றி வருகிறது. இந்த நிலையில் பிரதமர் மோடியின் லோக்சபா தொகுதியான வாரணாசியில் காங்கிரஸ் கட்சியின் மெகா பொதுக்கூட்டம் நடத்த ஏற்பாடு செய்யப்பட்டிருந்தன. இதில் சோனியா பங்கேற்று பிரசாரம் செய்யவும் கட்சியினர் திட்டமிட்டிருந்தனர். இதற்காக சோனியா நேற்று முன்தினம் வராணாசி வந்தார்.
நேற்று காலை வாரணாசியில் இருந்து தேர்தல் பிரச்சாரத்தை துவக்கினார் சோனியா. பாபட்பூரில் இருந்து கார் மூலம் நகரின் பல பகுதிகளில் மக்களை சந்தித்தார். சுமார் 8 கிலோ மீட்டர் தூரத்துக்கு அவர் ஊர்வலமாக சென்று தனது பிரச்சாரத்தை துவக்கினார். சோனியாவின் காருடன் சுமார் 10 ஆயிரம் மோட்டார் சைக்கிள்கள் மற்றும் கார்களில் காங்கிரஸ் தலைவர்களும், தொண்டர்களும் அணிவகுத்து சென்றனர். முதலில் காரில் பயணம் செய்த சோனியா காந்தி, பின்னர் திறந்த வெளி ஜீப்பில் நின்று தொண்டர்களுக்கு கை அசைத்தவாறு மோடி அரசுக்கு எதிரான கோஷங்களையும் எழுப்பினார்.
இந்நிலையில் சோனியா காந்தி பங்கேற்ற பேரணி திடீரென பாதியில் நிறுத்தப்பட்டது. சோனியா காந்திக்கு கடுமையான காய்ச்சல் ஏற்பட்டதை அடுத்து காங்கிரஸ் பேரணி பாதியில் நிறுத்தப்பட்டது. இதையடுத்து உடனடியாக சோனியா டெல்லி திரும்பினார். இதனால் வாரணாசி பிரசார பொதுக்கூட்டத்தில் சோனியா பங்கேற்க முடியாத நிலை ஏற்பட்டுள்ளதாக கட்சி வட்டாரங்கள் தெரிவிக்கின்றன.
இதையடுத்து பிரதமர் நரேந்திர மோடி, உடனடியாக ஷீலா தீட்சித்தைத் தொடர்பு கொண்டு சோனியா உடல் நலம் குறித்து விசாரித்தார். அவர் விரைவில் குணமடைய பிரார்த்திப்பதாகவும் அவர் கூறினார்.
இதுதொடர்பாக அவர் டிவிட்டரிலும் சோனியா காந்தி விரைவில் குணம் பெற பிரார்த்திப்பதாக கூறியுள்ளார்.
Click it and Unblock the Notifications
Sign in with Google