ஜம்மு காஷ்மீர்: 521 வாக்குகளில் வெற்றி பெற்ற பாஜகவின் ஒரே பெண் வேட்பாளர் ஷகுன் பரிஹர் யார் தெரியுமா?
ஶ்ரீநகர்: ஜம்மு காஷ்மீர் யூனியன் பிரதேச சட்டசபை தேர்தலில் பாஜகவின் ஒரே ஒரு பெண் வேட்பாளரான ஷகுன் பரிஹர் 521 வாக்குகள் வித்தியாசத்தில் வெற்றி பெற்றுள்ளார். தேசிய மாநாட்டுக் கட்சியின் மூத்த தலைவர்களில் ஒருவரான முன்னாள் அமைச்சர் சஜாத் அகமது கிச்லூவைதான் 29 வயது இளம் பெண் ஷகுண் பரிஹர் வீழ்த்தி சாதனை படைத்துள்ளார். ஷகுனின் தந்தை மற்றும் உறவினர்கள் 5 ஆண்டுகளுக்கு முந்தைய பயங்கரவாதிகளின் தாக்குதலில் உயிரிழந்தவர்கள்.
ஜம்மு காஷ்மீர் யூனியன் பிரதேச சட்டசபை தேர்தலில் பாஜக அறிவித்த ஒரே ஒரு பெண் வேட்பாளார் ஷகுன் பரிஹர். வயது 29. அதுவும் முஸ்லிம்கள் பெரும்பான்மையாக உள்ள கிஷ்த்வார் சட்டசபை தொகுதியில் வேட்பாளராக களமிறக்கியது பாஜக. இத்தொகுதியில் தேசிய மாநாட்டுக் கட்சியின் மூத்த தலைவர் சஜாத் அகமது கிச்லூ போட்டியிட்டார்.
இன்றைய வாக்கு எண்ணிக்கையின் தொடக்கத்தில் இருந்தே இருவரும் மாறி மாறி முன்னிலை வகித்தனர். இறுதியாக ஷகுன் பரிஹர், 521 ஓட்டுகள் வித்தியாசத்தில் வெற்றி பெற்றதாக அறிவிக்கப்பட்டது. ஜம்மு காஷ்மீர் யூனியன் பிரதேச சட்டசபை தேர்தலில் ஷகுன் பரிஹருடன் சேர்த்து 3 பெண்கள் வெற்றி பெற்றுள்ளனர்.
தமது தேர்தல் வெற்றி குறித்து செய்தியாளர்களிடம் பேசிய ஷகுண் பரிஹர், என் மீது நம்பிக்கை வைத்து வாக்களித்த கிஷ்த்வார் தொகுதி மக்களுக்கு மிகப் பெரிய நன்றியை தெரிவித்துக் கொள்கிறேன். இந்த பிராந்தியத்தின் பாதுகாப்பு அச்சுறுத்தல்தான் முதன்மையான பிரச்சனை. பயங்கரவாத தாக்குதல்களால் நான் என் தந்தை, உறவினரை இழந்திருக்கிறேன். ஆகையால் இந்த பகுதியில் அமைதிக்காக பாடுபட வேண்டும் என அனைவரையும் கேட்டுக் கொள்கிறேன் என்றார்.
ஜம்மு காஷ்மீர் தேர்தலில் தேசிய மாநாட்டுக் கட்சி 42 இடங்களிலும் பாஜக 29, காங்கிரஸ் 6, மக்கள் ஜனநாயகக் கட்சி 3 இடங்களிலும் வென்றுள்ளன. இந்த தேர்தலில் 7 சுயேட்சைகள் வெற்றி பெற்றுள்ளனர்.
Click it and Unblock the Notifications
Sign in with Google