18 வயதுக்கு மேலுள்ளோருக்கான வீடியோ பார்க்க பாஸ்போர்ட், அல்லது லைசென்ஸ் தேவை! ஆஸி.யில் யூடியூப் செக்

Updated: Thursday, March 17, 2022, 19:08 [IST]

Subscribe to Oneindia Tamil

கான்பெர்ரா: ஆஸ்திரேலியாவில் யூடியூப் மற்றும் கூகுள் பிளேவில் 18 வயதுக்கு உட்பட்டோருக்கான வசதிகளை சிறுவர்கள் பயன்படுத்தாமல் தடுக்க அந்நாட்டு பயனர்களிடம் ஓட்டுநர் உரிமம் அல்லது பாஸ்போர்ட் ஆவணங்களை கேட்டுப்பெற கூகுள் திட்டமிட்டு உள்ளது.

இணைய உலகின் ஜாம்பவானான கூகுள் தேடுபொறி மட்டுமின்றி யூடியூப், ஜி மெயில், ஆண்டிராய்டு, கூகுள் ப்ளே என பல்வேறு மென்பொருட்களையும், இணைய சேவைகளையும் நடத்தி வருகிறது. இதை நாளொன்றுக்கு உலகம் முழுவதும் பல கோடிக்கணக்கானோர் பயன்படுத்துகின்றனர்.

வயது கட்டுப்பாடு

இணையத்தில் எந்த தகவலை எந்த வயதினர் பார்க்க வேண்டும் என்பன போன்ற கட்டுப்பாடுகளை நிறுவனங்கள் விதித்து வருகின்றன. அது ஒவ்வொரு நாட்டுக்கும் வேறுபடும். இருப்பினும் இணையதளத்தில் ஏதாவது ஒரு வழியில் 18 வயதுக்கு மேற்பட்டோருக்கானக வசதிகளை சிறுவர்கள் பயன்படுத்துகின்றனர்.

ஆஸ்திரேலியாவில் அறிமுகம்

இதனை தடுக்க உலகிலேயே முதல்முறையாக ஆஸ்திரேலியாவில் பயனர்களுக்கு புதிய விதிகளை கொண்டு வர உள்ளது கூகுள் நிறுவனம். இதுகுறித்து அந்த நிறுவனத்தின் அரசியல் விவகாரத்துறை மூத்த மேலாளர் சமந்தா யார்கே தெரிவிக்கையில், வரும் மாதம் முதல் யூடியூப் மற்றும் கூகுள் ப்ளேவில் 18 வயதுக்கு மேற்பட்டோருக்கான வசதிகளை சிறுவர்கள் பயன்படுத்தாமல் தடுக்க அந்நாட்டு பயனர்களிடம் ஓட்டுநர் உரிமம் அல்லது பாஸ்போர்ட் ஆவணங்களை கட்டாயமாக்க இருக்கிறோம்.

வயசுக்கு மீறிய வீடியோ

இணைய சேவை நிறுவனங்கள் சிறுவர்கள் வயதுக்கு மீறிய வசதிகளை பயன்படுத்துவதை தடுக்க உரிய நடவடிக்கை எடுக்க வேண்டும் என ஆஸ்திரேலிய ஆன்லைன் பாதுகாப்பு விதிகள் தெரிவிக்கின்றன. இந்த நடவடிக்கை வயதுக்கு மீறிய செயல்பாடுகளை தடுக்கும் வகையில் எடுக்கப்படுகிறது.

பாஸ்போர்ட் தேவை

18 வயதுக்கும் மேற்பட்டோருக்கான வீடியோக்களை யூடியூபில் இனி பார்க்க வேண்டுமென்றால் நாம் கேட்கும் அரசு ஆவணங்களை வழங்க வேண்டும். கூகுள் அல்லாத பிற தளங்கள் வாயிலாக தடுக்கப்பட்ட வீடியோக்களை பார்க்க முயன்றாலும் யூடியூபுக்கு திருப்பிவிடப்படுவார்கள். அதே நேரம் கூகுள், யூடியூப் போன்ற தளங்களை கல்வி மற்றும் பொழுதுபோக்கிற்காகவும் ஏராளமானோர் பயன்படுத்துகிறார்கள்." என அவர் கூறியுள்ளார்.