அடடா.. 4 ஆண்டில் 5வது பொதுத்தேர்தல்.. இஸ்ரேலில் மீண்டும் பிரதமராகும் பெஞ்சமின் நெதன்யாகு..விபரம்

ஜெருசலேம்: இஸ்ரேலில் கடந்த சில ஆண்டுகளாக அரசியல் குழப்பம் நீடித்து வருகிறது. 4 ஆண்டில் 5வது முறையாக பொதுத்தேர்தல் நடந்த நிலையில் அந்நாட்டின் நீண்டகால பிரதமராக இருந்த பெஞ்சமின் நெதன்யாகுவின் கட்சி அதிக இடங்களில் வெற்றி பெற்றுள்ளது. இதன்மூலம் இஸ்ரேலின் புதிய பிரதமராக பெஞ்சமின் நெதன்யாகு தேர்வாக உள்ளார்.

இஸ்ரேலில் மிகவும் பிரபலமான அரசியல் தலைவராக இருப்பவர் பெஞ்சமின் நெதன்யாகு. லிகுட் கட்சியை சேர்ந்த இவர் 1996ல் முதல் முறையாக பிரதமரானார். 1999 வரை பிரதமர் பதவியில் இருந்தார்.

அதன்பிறகு மீண்டும் 2009ல் பிரதமராக பொறுப்பேற்றார். 2018ல் அங்கு பொதுத்தேர்தல் நடந்தது. மொத்தம் 120 தொகுதிகள் உள்ள நிலையில் எந்த கட்சிக்கும் பெரும்பான்மை கிடைக்கவில்லை.

பிரதமர் விலகிய நெதன்யாகு

இதனால் பிற கட்சிகளின் கூட்டணியுடன் 2018 ல் பெஞ்சமின் நெதன்யாகு மீண்டும் பிரதமரானார். இந்நிலையில் தான் கடந்த 2021ல் அரசியல் குழப்பம் ஏற்பட்டது. இதையடுத்து கூட்டணி கட்சிகள் ஆதரவை வாபஸ் பெற்றன. இதனால் 2021 ஜூன் 13ல் பிரதமர் பொறுப்பில் இருந்து பெஞ்சமின் நெதன்யாகு விலகினார்.

யாமினா கட்சியில் பிரதமர்

இதையடுத்து புதிய பிரதமரை தேர்வு செய்வதற்காக மீண்டும் பொதுத்தேர்தல் நடந்தது. இதிலும் எந்த கட்சிக்கும் பெரும்பான்மை கிடைக்கவில்லை. இருப்பினும் யாமினா கட்சி தலைவரான நாப்தாலி பென்னட் பிரதமரானார். இவர் பிற சிறிய கட்சிகளுடன் கூட்டணி அமைத்து அதிகாரத்தை கைப்பற்றினார். இந்த கூட்டணி ஆட்சியும் கடந்த ஜூனில் கவிழ்ந்தது.

மீண்டும் பொதுத்தேர்தல்

இதையடுத்து மீண்டும் யஷ் அடீட் கட்சியை சேர்ந்த யாயிர் லாபிட் பிரதமரானார். இவரது ஆட்சியும் நிலைக்காத நிலையில் தேர்தல் அறிவிக்கப்பட்டது. இதில் முன்னாள் பிரதமர் பெஞ்சமின் நெதன்யாகு மற்றும் இடைக்கால பிரதமர் யாயிர் லாபிட் இடையே நேரடி போட்டி நிலவியது. இந்நிலையில் நேற்று தேர்தல் நடந்தது. விறுவிறுப்பான வாக்குப்பதிவு நடந்தது. இந்த ஓட்டுக்கள் இன்று காலை முதல் எண்ணப்பட்டன.

நெதன்யாகு கட்சி வெற்றி

தற்போது வரை 86 சதவிகித வாக்குகள் எண்ணப்பட்டுள்ள நிலையில் 65 தொகுதிகளில் பெஞ்சமின் நெதன்யாகுவின் கட்சியினரின் வெற்றி உறுதி செய்யப்பட்டுள்ளது. ஆட்சியமைக்க 61 தொகுதிகளில் வெற்றி பெற்றால் போதும். இதனால் இஸ்ரேலின் அடுத்த பிரதமராக பெஞ்சமின் நெதன்யாகு தேர்வாவது உறுதி செய்யப்பட்டுள்ளது.

4 ஆண்டில் 5வது தேர்தல்

இஸ்ரேலில் கடந்த 2019 முதல் தற்போது வரையிலான 4 ஆண்டுகளில் மொத்தம் 5 பொதுத்தேர்தல்கள் நடந்துள்ளன. அதன்படி 2019 ஏப்ரல், செப்டம்பர் மாதங்களிலும், அதன்பிறகு 2020 மார்ச், 2021 மார்ச் மாதங்களை தொடர்ந்து தற்போது பொதுத்தேர்தல் நடந்துள்ளது என்பது குறிப்பிடத்தக்கது.

English summary

Israel has been in political turmoil for the past few years. The party of Benjamin Netanyahu, who was the country's long-time prime minister, won the majority of seats in the 5th general election in 4 years. Benjamin Netanyahu has been elected as the new Prime Minister of Israel.