இதுதான் முன்னோர் பூமியா! ராகுலை விட மோசமாக "ரிசல்ட்" தந்த பிரியங்கா! உபியில் காணாமல் போன காங்.!

Updated: Thursday, March 10, 2022, 10:08 [IST]

Subscribe to Oneindia Tamil

லக்னோ: உத்தர பிரதேசத்தில் காங்கிரஸ் கட்சி மிக மோசமான தோல்வியை நோக்கி சென்று கொண்டு இருக்கிறது. அங்கு காங்கிரஸ் கட்சி கிட்டத்தட்ட காணாமல் போகும் நிலை ஏற்பட்டுள்ளது.

பிரியங்கா காந்தி

கடந்த முறை சட்டசபை தேர்தலில் உத்தர பிரதேசத்தில் யாரை முன்னிறுத்துவது என்று தெரியாமல் காங்கிரஸ் கடைசிவரை புலம்பி, கடைசியில் படுதோல்வியை சந்தித்தது. இந்த நிலையில்தான் இந்த முறை உத்தர பிரதேசத்தில் பிரியங்கா காந்தியை காங்கிரஸ் முன்னிறுத்தியது. ஏற்கனவே லோக்சபா தேர்தலின் போது உத்தர பிரதேசத்தில் பிரியங்கா காந்தி காங்கிரசின் உபி பொதுச்செயலாளராக இருந்தார்.

மோசமான சரிவு

ஆனால் லோக்சபா தேர்தலில் காங்கிரஸ் வெறும் 1 இடத்தை மட்டுமே வென்றது. ராகுல் காந்தியே அமேதி தொகுதியில் தோல்வி அடையும் அளவிற்குத்தான் உத்தர பிரதேசத்தில் பிரியங்கா காந்தியின் திட்டங்கள், பிளானிங் இருந்தது. இந்த நிலையில்தான் தற்போது சட்டசபை தேர்தலிலாவது காங்கிரஸ் இங்கு குறிப்பிடத்தகுந்த இடங்களை வெல்லுமா என்று கேள்விகள் நிலவி வந்தன. உத்தர பிரதேசத்தில் பிரியங்கா காந்தி குறைந்த அளவிலாவது தாக்கத்தை ஏற்படுத்துவாரா என்று கேள்வி நிலவி வந்தது.

பின்னடைவு

ஆனால் உத்தர பிரதேசத்தில் காங்கிரஸ் கடுமையான பின்னடைவை சந்தித்துள்ளது. அங்கு காங்கிரஸ் 2-4 இடங்களை பெறுவதற்கு கூட திணறி வருகிறது. ராகுல் காந்தியை விட மோசமான ரிசல்ட்டை உத்தர பிரதேசத்தில் பிரியங்கா காந்தி கொடுக்கும் நிலைக்கு சென்று இருக்கிறார். அங்கு காங்கிரஸ் முன்னிலை வகிக்கும் 4 இடங்களிலும் பெரிய அளவில் முன்னிலை வகிக்கவில்லை. குறைந்த வாக்குகள் வித்தியாசத்திலேயே முன்னிலை வகிக்கிறது.

காணாமல் போகிறதா

கடந்த சட்டசபை தேர்தலில் உத்தர பிரதேசத்தில் பாஜக 303 இடங்களை வென்று ஆட்சியை பிடித்தது. அங்கு யோகி ஆதித்யநாத் தலைமையிலான பாஜக கட்சி ஆட்சி புரிந்து வருகிறது. அங்கு பாஜக கூட்டணிக்கு அப்னா தளம் கட்சியின் 9 இடங்களையும் சேர்த்து 312 இடங்கள் உள்ளன. எதிர்க்கட்சியான சமாஜ்வாதி கட்சிக்கு 49 இடங்கள் உள்ளன. பகுஜன் சமாஜ் பார்ட்டிக்கு 15 இடங்கள் உள்ளன. காங்கிரஸ் கட்சிக்கு 7 இடங்கள் உள்ளன. இந்த முறை அந்த 7 இடங்களை கூட காங்கிரஸ் வெல்ல முடியாத நிலை ஏற்பட்டுள்ளது. உத்தர பிரதேசத்தில் காங்கிரஸ் கட்சி மிக மோசமான தோல்வியை நோக்கி சென்று கொண்டு இருக்கிறது. அங்கு காங்கிரஸ் கட்சி கிட்டத்தட்ட காணாமல் போகும் நிலை ஏற்பட்டுள்ளது.

காங்கிரஸ் கட்டாயம்

இன்னொரு பக்கம் பஞ்சாப், உத்தரகாண்டிலும் காங்கிரஸ் தோல்வியை நோக்கி சென்று இருக்கிறது. தேசிய அளவில் பெரிய கட்சியாக இருந்த காங்கிரஸ் இப்போது வரலாற்றில் இல்லாத அளவிற்கு தோல்வியை நோக்கி சென்று இருக்கிறது. காங்கிரஸ் இப்போது உடனடியாக கட்சியில் பல்வேறு மாற்றங்களை செய்ய வேண்டிய கட்டாயம் ஏற்பட்டுள்ளது. பல்வேறு கடினமான முடிவுகளை எடுக்க வேண்டிய கட்டாயத்தில் அக்கட்சி உள்ளது.