இத்தனை கோடியா? நன்கொடையில் புதிய ரெக்கார்ட்.. மும்பை ஐஐடியின் 1998 பேட்ஜ் மாணவர்கள் சாதனை!

மும்பை: மும்பை ஐஐடியில் 1998 ம் ஆண்டில் படித்தவர்கள் வெள்ளிவிழா கொண்டாட்டத்தின் ஒருபகுதியாக மீண்டும் சந்தித்து கொண்டனர். இந்த வேளையில் அவர்கள் ஐஐடியின் வளர்ச்சிக்காக வழங்கிய நன்கொடை புதிய சாதனையை படைத்துள்ளது.

இன்று ஒவ்வொருவரும் நாம் பல்வேறு முக்கிய பணிகளில் இருக்கிறோம் என்றால் அதற்கு முக்கிய காரணம் நாம் படித்த பள்ளி, பல்கலைக்கழகங்கள் தான். இப்படி நம் வாழ்க்கையை உயர்த்திய நாம் படித்த பள்ளி, கல்லூரி, பல்கலைக்கழகங்களின் வளர்ச்சிக்கு முன்னாள் மாணவர்கள் என்ற முறையில் பலரும் நன்கொடை வழங்கி வருகின்றனர்.

அந்த வகையில் இந்தியாவின் முக்கிய கல்வி நிறுவனங்களில் ஒன்றாக செயல்படும் மும்பை ஐஐடியில் 1998ல் படித்த மாணவர்கள் வழங்கிய நன்கொடை புதிய ரெக்கார்ட் செய்துள்ளது. அதன் விபரம் வருமாறு:

மத்திய அரசின் கட்டுப்பாட்டில் இந்தியாவில் பல்வேறு நகரங்களில் ஐஐடி எனும் இந்திய தெழில்நுட்ப கழகங்கள் செயல்பட்டு வருகின்றன. இந்தியாவில் முக்கிய கல்வி நிறுவனங்களாக ஐஐடி-க்கள் செயல்பட்டு வருகின்றன. இதனால் ஒவ்வொரு ஆண்டும் இந்த கல்வி நிறுவனங்களில் சேர ஏராளமானவர்கள் போட்டிபோட்டு வருகின்றனர்.

தமிழ்நாட்டில் சென்னை, மகாராஷ்டிராவில் மும்பை உள்பட பல நகரங்களில் ஐஐடி செயல்பட்டு வருகிறது. இந்த ஐஐடிக்களில் படிப்போர் பல நிறுவனங்களில் உயர் பதவிகளில் உள்ளனர். மேலும் ஐஏஎஸ், ஐபிஎஸ் உள்பட பல அரசு உதவிகளில் பொறுப்பில் வசித்து வருகின்றனர். இந்நிலையில் தான் மும்பை ஐஐடியில் 1998 ம் ஆண்டில் படித்தவர்கள் 25ம் ஆண்டின் வெள்ளிவிழாவை கொண்டாடினார்கள்.

இதையடுத்து அவர்கள் அனைவரும் மீண்டும் சந்தித்து கொண்டு பழைய நினைவுகளை பகிர்ந்து மகிழ்ந்தனர். இந்த வெள்ளி விழா கொண்டாட்டத்தின் ஒருபகுதியாக அவர்கள் மும்பை ஐஐடியின் வளர்ச்சிக்கு நன்கொடைகளை வழங்கினர். மொத்தமாக அவர்கள் ரூ.57 கோடியை நன்கொடையாக வழங்கி உள்ளனர்.

முன்னதாக 1971 ம் ஆண்டில் பயின்றவர்கள் பொன்விழா கொண்டாட்டத்தின்போது ரூ.41 கோடியை நன்கொடையாக வழங்கி இருந்ததே அதிகமாக இருந்தது. ஆனால் இப்போது 1998 ம் ஆண்டில் படித்தவர்கள் அதனை விட அதிகமாக நன்கொடை வழங்கி சாதனை படைத்துள்ளனர். இந்த நன்கொடையில் 200க்கும் அதிகமானவர்கள் பங்களிப்பு செய்துள்ளனர் என்பது குறிப்பிடத்தக்கது.

English summary

The 1998 alumni of IIT Mumbai reunited as part of the Silver Jubilee celebrations. Meanwhile their donation for the development of IITs has set a new record.