புதுச்சேரி: வைத்திலிங்கம் உள்பட 18 பேர் போட்டி.. தட்டாஞ்சாவடி இடைத் தேர்தல் களத்தில் 8 பேர்!

புதுச்சேரி: புதுச்சேரி மாநில மக்களவை தேர்தலுக்கான இறுதி வேட்பாளர் பட்டியல் வெளியிடப்பட்டுள்ளது. காங்கிரஸ் கட்சியின் சார்பில் போட்டியிடும் முன்னாள் சபாநாயகர் வைத்தியலிங்கம் உள்ளிட்ட 18 வேட்பாளர்கள் களத்தில் உள்ளனர்.

புதுச்சேரி மாநிலத்தில் உள்ள ஒரே ஒரு மக்களவை தொகுதிக்கான தேர்தல், காலியாக உள்ள தட்டாஞ்சாவடி சட்டமன்றத் தொகுதி இடைத்தேர்தல் ஏப்ரல் 18-ந்தேதி தேர்தல் நடைபெற உள்ளது. இதற்கான வேட்பு மனு தாக்கல் கடந்த 19 ஆம் தேதி தொடங்கி முடிவடைந்த நிலையில், இன்று இறுதி வேட்பாளர் பட்டியல் வெளியிடப்பட்டுள்ளது.

புதுச்சேரி மக்களவை தேர்தலில் போட்டியிடுவதற்காக 37 பேர் வேட்பு மனு தாக்கல் செய்திருந்த நிலையில், இன்று வெளியிடப்பட்டுள்ள இறுதி வேட்பாளர் பட்டியலின்படி, காங்கிரஸ் கட்சி சார்பில் முன்னாள் சபாநாயகர் வைத்தியலிங்கம், என்.ஆர்.காங்கிரஸ் கட்சி சார்பில் கே.நாராயணசாமி, மக்கள் நீதி மய்யம் கட்சி சார்பில் சுப்ரமணியன் உள்ளிட்ட 18 பேர் களத்தில் உள்ளனர்.

தட்டாஞ்சாவடி இடைத் தேர்தல்:

இதேபோல் தட்டாஞ்சாவடி சட்டமன்ற தொகுதி இடைத்தேர்தலில் 11 பேர் வேட்பு மனு தாக்கல் செய்திருந்தனர். இதில் வேட்பு மனு பரீசிலனை அன்று ஒரு வேட்பு மனு நிராகரிக்கப்பட்டு, 10 மனுக்கள் ஏற்கப்பட்டன.

இதில் இன்று 2 வேட்பு மனு வாபஸ் பெறபட்டதால் இறுதி வேட்பாளர் பட்டியலின்படி 8 வேட்பாளர்கள் போட்டியிடுகிறார்கள். திமுக வேட்பாளர் வெங்கடேசன், என்.ஆர்.காங்கிரஸ் கட்சி வேட்பாளர் நெடுஞ்செழியன், அமமுக வேட்பாளர் முருகசாமி, நாம் தமிழர் கட்சி வேட்பாளர் கௌரி உள்பட 8 களத்தில் உள்ளனர்.

English summary

There are 18 candidates in the final list of Puducherry Loksabha constituency including former Speaker and former CM Vaithilingam.