ஆபத்து! பாதியாக குறைந்த தேனீக்களின் ஆயுட்காலம்.. ஆய்வாளர்கள் வார்னிங்.. நடந்தது என்ன? காரணம்!

Updated: Wednesday, November 23, 2022, 6:10 [IST]

Subscribe to Oneindia Tamil

நியூயார்க்: அமெரிக்க ஆய்வாளர்கள் நடத்திய சமீபத்திய ஆய்வில் தேனீக்களின் ஆயுட்காலம் பாதியாக குறைந்திருப்பது கண்டுபிடிக்கப்பட்டிருக்கிறது.

அதாவது 1970களில் வாழ்ந்த தேனீக்களை விட தற்போது உள்ள தேனீக்கள் விரைவாக உயிரிழந்துவிடுவதாக அவர்கள் கூறியுள்ளனர்.

தாவரங்களின் இனப்பெருக்கத்திற்கு தேனீக்களின் பங்கு இன்றியமையாததாக இருக்கும் நிலையில் தற்போது வெளியாகியுள்ள ஆய்வின் முடிவுகள் சூழலியல் ஆர்வலர்களிடையே அதிருப்தியை ஏற்படுத்தியுள்ளது.

ஆயுட்காலம்

அமெரிக்காவின் மேரிலாந்து பல்கலைக்கழக பூச்சியியல் வல்லுநர்கள் நடத்திய புதிய ஆய்வில் இந்த விவரங்கள் தெரியவந்துள்ளன. அதாவது ஆய்வக சூழலில் வைக்கப்பட்டு வளர்க்கப்படும் தேனிகளின் ஆயுட்காலம் 50% குறைந்திருப்பதாக ஆய்வாளர்கள் கூறியுள்ளனர். உலகம் முழுவதும் தேனுக்கான தேவை தொடர்ந்து அதிகரித்துக்கொண்டேதான் இருக்கிறது. இந்நிலையில் தேனீக்கள் செயற்கை முறையில் வளர்க்கப்படுகின்றன. இவ்வாறு செயற்கையாக வளர்க்கப்படும் தேனிகள் விரைவாக உயிரிழந்துவிடுவதை தேனி வளர்ப்பாளர்கள் கவனித்துள்ளனர். இது குறித்து தொடர்ச்சியான புகார்கள் வந்த நிலையில் ஆய்வாளர்கள் நடத்திய ஆய்வில் இந்த தகவல்கள் தெரிய வந்துள்ளன.

காரணம்

தேன் தேவைக்காக வளர்க்கப்படும் தேனீக்களின் மரபணுவில் ஏதேனும் மாற்றம் ஏற்பட்டிருக்கிறதா? அல்லது சுற்றுச்சூழல் அழுத்தமா? ரசாயன உரங்கள், நோய்கள், ஒட்டுண்ணிகள் என தேனீக்கள் உயிரிழப்புக்கு என்ன காரணம் என்று ஆய்வாளர்கள் தொடர்ந்து ஆய்வு மேற்கொண்டு வருகின்றனர். செயற்கையாக தேன் உற்பத்தியில் ஈடுபடும் தேனிகளின் வாழ்க்கை சுழற்சி விரைவாக நடந்து முடிந்துவிடுகிறது. இதனால் இந்த வகை தேனீக்கள் விரைவில் திருப்தியடைந்து விடுவதாகவும், இது தேனீக்களின் மரபணுவில் தொடர்ந்து கடத்தப்படுவதால் இப்படி குறைந்த ஆயுட்காலத்தில் தேனீக்கள் உயிரிழந்து இருக்கலாம் என்று ஆய்வாளர்கள் சந்தேகிக்கின்றனர்.

வேற லெவல் தேனீக்கள்

தேனீக்கள் பருவமடைவதற்கு முன்னரே அதனை தனிமைப்படுத்தி வைத்திருப்பது கூட இம்மாதிரியான உயிரிழப்புக்கு காரணமாக இருக்கக்கூடும் என்றும் ஆய்வாளர்கள் கூறுகின்றனர். இயற்கையில் பூச்சிகளுக்கு என்று எவ்வித உணர்ச்சியும் கிடையாது என்று நாம் நினைத்து வரும் நிலையில், தேனீக்கள் விளையாடும் திறனை கொண்டிருக்கின்றன என்று பூச்சியியல் வல்லுநர்கள் சமீபத்தில்தான் கண்டுபிடித்தனர். உயிரற்ற பொருட்களுடன் விளையாடும் மனிதர்களை போலவே தேனீக்களும் உயிரற்ற பொருட்களுடன் விளையாடுவதன் மூலம் அப்பொருளை தொடர்பு கொள்கிறது என்று ஆய்வாளர்கள் கண்டுபிடித்துள்ளனர்.

நம்பிக்கை

இந்த ஆய்வின் மூலம் தேனீக்கள் விளையாடும் திறனை பெற்றிருக்கிறது என்பது மட்டுமல்லாமல், நாம் நினைப்பதை விடவும் பூச்சிகளின் மனம் அதிநவீனமானது என்பதை நம்மாள் புரிந்துகொள்ள முடிகிறது என்றும் இப்படி இருக்கையில் திடீரென தேனீக்களின் ஆயுட் காலம் பாதியாக குறைந்திருப்பது அதிர்ச்சியளிப்பதாக இருப்பதாகவும் ஆய்வாளர்கள் கவலை தெரிவித்துள்ளனர். எப்படியாயினும், இதற்கான முழுமையான காரணம் விரைவில் கண்டறியப்படும் என அவர்கள் நம்பிக்கை தெரிவித்துள்ளனர்.