7 முறை வென்று அ. தி.மு.க.வின் கோட்டையாக திகழும் ஸ்ரீரங்கம்!

ஸ்ரீரங்கம்: இடைத்தேர்தலை எதிர்கொள்ளும் ஸ்ரீரங்கம் சட்டசபை தொகுதியில் 7 முறை அண்ணா தி.மு.க. வென்று அதன் கோட்டையாக வைத்திருக்கிறது. தற்போது நடைபெற உள்ள தேர்தலிலும் வெல்லும் முனைப்புடன் வியூகம் வகுத்து செயல்பட்டு வருகிறது அ.தி.மு.க.

2011ஆம் ஆண்டு ஸ்ரீரங்கம் சட்டசபை தொகுதியில் வெற்றி பெற்று முதல்வரானார் அண்ணா தி.மு.க. பொதுச்செயலர் ஜெயலலிதா. ஆனால் வருமானத்துக்கு அதிகமாக சொத்துக் குவித்த வழக்கில் ஜெயலலிதாவுக்கு 4 ஆண்டு காலம் சிறைத் தண்டனை விதிக்கப்பட்டது. இதனால் தமது சட்டசபை உறுப்பினர் மற்றும் முதல்வர் பதவியை ஜெயலலிதா இழந்தார்.

இதைத் தொடர்ந்து ஸ்ரீரங்கம் தொகுதி காலியானதாக அறிவிக்கப்பட்டது. இத்தொகுதிக்கான இடைத்தேர்தல் பிப்ரவரி 13-ந் தேதி நடைபெறும்; வாக்கு எண்ணிக்கை பிப்ரவரி 16-ந் தேதி நடைபெறும் என்று டெல்லியில் தலைமைத் தேர்தல் ஆணையாளர் சம்பத் அறிவித்தார்.

ஸ்ரீரங்கம் தொகுதியில் இதுவரை 7 முறை அண்ணா திமுகவும் காங்கிரஸ் 4 முறையும் (3 முறை காங்கிரஸ்- 1 முறை ஸ்தாபன காங்கிரஸ்). தி.மு.க., ஜனதா தள் மற்றும் இந்திய கம்யூனிஸ்ட் கட்சி ஆகியவை தலா ஒரு முறையும் வென்றுள்ளன.

1952ஆம் ஆண்டு நடைபெற்ற முதலாவது தேர்தலில் கம்யூனிஸ்ட் கட்சியின் சிற்றம்பலம் வென்றார். இதுவரை ஸ்ரீரங்கம் தொகுதியில் வென்றவர்கள்:

1952- சிற்றம்பலம் (கம்யூனிஸ்ட் கட்சி)

1957- கே. வாசுதேவன் (காங்கிரஸ்)

1962- என். சுப்ரமணியன் செட்டியார் (காங்கிரஸ்)

1967- எஸ். ராமலிங்கம் (காங்கிரஸ்)

1971- ஜோதி வெங்கடாசலம் ( ஸ்தாபன காங்கிரஸ்)

1977- ஆர். சவுந்திரராஜன் (அண்ணா தி.மு.க)

1980 - ஆர். சவுந்திரராஜன் (அண்ணா தி.மு.க)

1984- ஆர். சவுந்திரராஜன் (அண்ணா தி.மு.க)

1989- வெங்கடேச தீட்சிதர் ( ஜனதா தள்)

1991- கு.ப. கிருஷ்ணன் (அண்ணா தி.மு.க.)

1996- டி.பி. மாயவன் (தி.மு.க.)

2001 - கே.கே. பாலசுப்பிரமணியன் ( அண்ணா தி.மு.க.)

2006- எம். பரஞ்ஜோதி ( அண்ணா தி.மு.க.)

2011- ஜெயலலிதா (அண்ணா தி.மு.க.)

கடந்த 2011ஆம் ஆண்டு தேர்தலில் வாக்கு விவரம்:

ஜெ. ஜெயலலிதா (அண்ணா தி.மு.க) : 1,05,328

என். ஆனந்த் ( தி.மு.க) 63, 480

மொத்தம் 41, 848 வாக்குகள் வித்தியாசத்தில் ஜெயலலிதா வெற்றி பெற்றார்.

இத்தொகுதியில் பிற கட்சிகள் பெற்ற வாக்குகள்:

கே.ஏ.எஸ். அறிவழகன் (பாரதிய ஜனதா கட்சி) - 2,017

தமிழரசி (இந்திய ஜனநாயகக் கட்சி) - 1,221

நடராஜன் (பகுஜன் சமாஜ்) - 928

என். ரவிசங்கர் ஐயர் (அகில பாரதிய ஹிந்து மகாசபா) - 738

English summary

Srirangam Assembly constituency had been a traditional stronghold of the AIADMK. The AIADMK won from this constituency Seven times since Late MGR launched the party in 1977.