கருணாநிதி நலம் பெற கையெழுத்து இயக்கம்.. வெள்ளை துணியில் பிரபலங்களின் கையெழுத்து

கருணாநிதி நலம் பெற வேண்டி தொண்டர்கள் கையெழுத்து இயக்கம் தொடங்கியுள்ளனர்.

சென்னை: திமுக தலைவர் கருணாநிதி விரைவில் நலம் பெற வேண்டி திமுகவினர் தொடங்கிய கையெழுத்து இயக்கத்தில் ஏராளமானோர் தொடர்ந்து கையெழுத்திட்டு வருகின்றனர்.

உடல்நிலை மோசமடைந்ததை தொடர்ந்து நேற்றுமுன்தினம் இரவு முதல் காவிரி மருத்துவமனையில் அனுமதிக்கப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது. அவரது உடல்நிலை குறித்து இந்திய, மற்றும் தமிழக அரசியல் கட்சி தலைவர்கள், திரை பிரபலங்கள் உள்ளிட்டோர் மருத்துவமனைக்கு வந்து விசாரித்து விட்டு செல்கின்றனர்.

அதேபோல, ஏராளமான தொண்டர்கள் தமிழகம் முழுவதிலுமிருந்து மருத்துவமனை முன்பு குவிந்துள்ளனர். இந்நிலையில் கருணாநிதியின் உடல்நிலையில் தற்போது முன்னேற்றம் காணப்படுவதாக மருத்துவமனை தரப்பு அறிக்கை வெளியிட்டது. இந்த அறிக்கையினால் தொண்டர்கள் ஓரளவு நிம்மதி அடைந்தார்கள்.

எனினும் கருணாநிதி முழுமையாக நலம் பெற வேண்டும் என்று திமுக தகவல் தொழில்நுட்ப பிரிவினர் கையெழுத்து இயக்கம் ஒன்றை தொடங்கினர். அதன்படி மருத்துவமனை வாயிலிலேயே ஒரு வெள்ளை துணி கட்டி விடப்பட்டுள்ளது. அங்கு வரும் பிரபலங்கள், அரசியல் தலைவர்கள், கட்சி நிர்வாகிகள் உள்ளிட்டோர் அதில் கையெழுத்திட்டு செல்கின்றனர்.

தொண்டர்களும் தங்களின் தலைவர் விரைவில் குணமடைய வேண்டும் என்ற செய்திகளை எழுதி கையெழுத்திட்டு வருகின்றனர். ஒருசிலர் கருணாநிதி செய்த சாதனைகள் குறித்து வார்த்தைகளை பதிவிட்டு கையெழுத்திட்டுள்ளனர்.

English summary

Dmk wing started a get well soon Signature campaign