பிறந்த மண்ணான ராமேஸ்வரத்தில் அப்துல் கலாமின் உடல் அடக்கம் செய்யப்படுகிறது

சென்னை: இந்தியாவின் 11வது குடியரசுத் தலைவரும், தலைசிறந்த விஞ்ஞானியுமான அப்துல் கலாமின் உறவினர்களின் கோரிக்கைக்கு ஏற்பட அவரது உடல் பிறந்த ஊரான ராமேஸ்வரத்தில் அடக்கம் செய்யப்படும் என்று மத்திய அரசு வட்டாரங்கள் தெரிவித்துள்ளன.

மேகலாயாவின் ஐ.ஐ.எம் கல்வி நிறுவனத்தில் உரையாற்றிக் கொண்டிருந்தபோது மயங்கி விழுந்த கலாம், ஷில்லாங் பெதானி மருத்துவமனையில் சிகிச்சை பலனின்றி மாரடைப்பால் காலமானார். அவரது உடல் தற்போது டெல்லி கொண்டு வரப்படுகிறது.

இந்நிலையில் மரபுகள் தாண்டி அவரது சொந்த ஊரான ராமேஸ்வரத்தில்தான் அவருடைய உடல் நல்லடக்கம் செய்யப்பட வேண்டும் என்று அப்துல் கலாமின் அண்ணன் மற்றும் உறவினர்கள் கோரிக்கை விடுத்திருந்தனர்.

இதனையடுத்து இன்று 12.30 மணியளவில் டெல்லி வந்தடையும் அவரது உடலை பிரதமர் நரேந்திர மோடி பெற்றுக் கொள்ள இருக்கின்றார். டெல்லியில் பொதுமக்களின் அஞ்சலிக்குப் பின்னர், நாளை காலை 10 மணியளவில் தனி ராணுவ விமானம் மூலமாக மதுரை அல்லது ராமேஸ்வரத்திற்கு அவரது நல்லுடல் கொண்டு செல்லப்படும் என்றும், உறவினர்களின் கோரிக்கைக்கு ஏற்ப அவரது உடல் முழு ராணுவ மரியாதையுடன் ராமேஸ்வரத்தில் அடக்கம் செய்யப்படும் என்றும் மத்திய அரசு வட்டாரங்கள் தெரிவித்துள்ளன.

எனினும், அவரது உடல் அடக்கம் செய்யப்பட உள்ள இடம் இன்னும் அரசால் தேர்வு செய்யப்படவில்லை. முப்படை அதிகாரிகள் ராமேஸ்வரத்திற்கு முன்னதாக சென்று இதற்கான முன்னேற்பாடுகளைச் செய்வார்கள்; தற்போதைய தகவல்களின்படி ராமேஸ்வரம் பேருந்து நிலையம் அருகே இந்து அறநிலையத் துறைக்குச் சொந்தமான காலி இடம் இருக்கிறது; அதேபோல் தனுஷ்கோடி செல்லும் பாதையிலும் அரசு நிலம் இருக்கிறது; இந்த இரண்டு இடங்களில் ஒன்றில் கலாமின் உடல் அடக்கம் செய்யப்படலாம் என கூறப்படுகிறது.

English summary

Former president abdul kalam's last sleep will held in his born city Rameshwaram tomorrow, govt regions said.