சொட்ட சொட்ட நனையுது தாஜ்மகாலு... கிண்டல் செய்து மீம்ஸ் போட்டவரை பாராட்டிய ஜெயக்குமார்
சமூக வலைதளங்களில் தன் தலையை கிண்டல் செய்து போடப்பட்ட மீம்ஸ்களை போட்டவர்களுக்கு ஜெயக்குமார் பாராட்டு தெரிவித்துள்ளார்.
சென்னை: அமைச்சர் ஜெயக்குமாரின் தலையை கிண்டல் செய்து வெளியிடப்பட்ட மீம்ஸுக்கு அவர் பாராட்டுத் தெரிவித்தார்.
தற்போது மீம்ஸ் கிரியேட்டர்கள் மிகவும் நகைச்சுவை கலந்து மீம்ஸ்களை தயார் செய்து சமூக வலைதளங்களில் போட்டு வருகிறார்கள். இந்நிலையில் அமைச்சர் ஜெயக்குமாரையும் நெட்டிசன்கள் விட்டு வைக்கவில்லை.
அவரது வழுக்கை தலையை கிண்டல் செய்து கெஸ் தி சாங் என்ற பெயரில் முதலிரண்டு படங்கள் அமைச்சர் ஜெயக்குமாரின் முகத்தை மட்டும் போட்டுள்ளனர். மூன்றாவதாக மழையில் நனைவது போன்ற படத்தையும், 4-ஆவதாக தாஜ்மகால் படத்தையும் போட்டுள்ளனர்.
இது மிகவும் வைரலானது. இந்நிலையில் சென்னை அண்ணா பல்கலைக்கழகத்தில் மாணவர்களுக்கான சைபர் தொழில்நுட்பம் குறித்து விழிப்புணர்வு கருத்தரங்கம் நடைபெற்றது. இதில் அமைச்சர் ஜெயக்குமார் கலந்து கொண்டார்.
அப்போது அவர் பேசுகையில் சமூகவலைதளங்களில் என்னுடைய தலையை வைத்து உருவாக்கப்பட்ட மீம்ஸ் மிகவும் நகைச்சுவையாக இருந்தது. அதை நானே வைரலாக்கினேன். இவற்றையெல்லாம் ரூம் போட்டு யோசிப்பாங்களோ என்று அமைச்சர் கேட்க அரங்கத்தில் சிரிப்பலை எழுந்தது.