குஷ்பு இஸ்லாத்தை பின்பற்றியதே இல்லை- வைரலாகும் திருநாவுக்கரசரின் 'பரபர' 'போன்' பேச்சு
குஷ்பு இஸ்லாத்தை பின்பற்றியதே இல்லை என திருநாவுக்கரசர் விமர்சிக்கும் போன் உரையாடல் சமூக வலைதளங்களில் வைரலாக பரவி வருகிறது.
சென்னை: காங்கிரஸ் கட்சியின் தேசிய செய்தி தொடர்பாளர் நடிகை குஷ்புவுக்கு இஸ்லாத்தை பற்றி எதுவும் தெரியாது; இஸ்லாத்தை பின்பற்றியதும் இல்லை என்று தமிழக காங். கமிட்டித் தலைவர் திருநாவுக்கரசர் விமர்சிக்கும் போன் உரையாடல் சமூக வலைதளங்களில் வைரலாக பரவி வருகிறது.
புதிய தலைமுறை தொலைக்காட்சியின் அக்னி பரீட்சை நிகழ்ச்சியில் பங்கேற்ற குஷ்பு, பொதுசிவில் சட்டத்தை ஆதரித்து பேசினார்; இஸ்லாமியர்களின் முத்தலாக் முறைக்கு எதிரான கருத்துகளை முன்வைத்திருந்தார். இது பெரும் சர்ச்சையை ஏற்படுத்தியிருந்தது.
இஸ்லாமிய தலைவர்கள் பலரும் தமிழக காங்கிரஸ் கமிட்டித் தலைவர் திருநாவுக்கரசரிடம் இது குறித்து புகார் தெரிவித்தனர். திருநாவுக்கரசரும், குஷ்புவின் தனிப்பட்ட கருத்து அது என கூறியிருந்தார்.
சென்னை இமாம்
தற்போது சென்னை மக்கா பள்ளி தலைமை இமாம், திருநாவுக்கரசருடன் பேசும் தொலைபேசி உரையாடல் ஒன்று சமூக வலைதளங்களில் வைரலாக பரவி வருகிறது.
பாஜக பாணியா?
அந்த உரையாடலில், பாரதிய ஜனதா கட்சியின் சுப்பிரமணியன் சுவாமி ஒரு கருத்தை தெரிவிப்பதும் அது தனிப்பட்ட கருத்து என பாஜக தலைவர்களும் சொல்லி வருகின்றனர்; அதுபோல காங்கிரஸும் செய்கிறதோ என சந்தேகம் வருகிறது என இமாம் கூறுகிறார்..
குஷ்புவுக்கு எதுவும் தெரியாது
இது அனாவசிய சந்தேகம் என்று சொல்லும் திருநாவுக்கரசர், "அவர்(குஷ்பு) இந்து மேனை மேரி பண்ணியிருக்கிறார்; அவர் இஸ்லாத்தை பின்பற்றியதும் இல்லை; அவருக்கு இஸ்லாத்தை பற்றி எதுவுமே தெரியாது" என கூறுகிறார்.
நேரில் அழைத்து கண்டிப்பு
அத்துடன் குஷ்புவை நேரில் அழைத்து தாம் கண்டித்ததாகவும், முன்னேற்றமாக பேசுவதாக நினைத்து தப்பா கருத்து சொல்லாதீங்க... இப்படி பேசிக் கொண்டிருந்தால் காங்கிரஸ் கட்சியினரே உங்களை கன்சிடர் பண்ணமாட்டாங்க என கூறிவிட்டேன் எனவும் திருநாவுக்கரசர் பதில் தருகிறார்.
Click it and Unblock the Notifications
Sign in with Google