அழகிரியின் கோட்டை மதுரையில் ஸ்டாலின் ஆதரவாளர் வேலுச்சாமி ஜெயிப்பாரா?
மதுரை: மதுரை தொகுதியில் வழக்கறிஞரான வி. வேலுச்சாமி போட்டியிடுகிறார்.
நாடாளுமன்ற தேர்தலில் போட்டியிடும் திமுக வேட்பாளர்களில் பலர் திமுக பொருளாளர் மு.க. ஸ்டாலின் ஆதரவாளர்களாக உள்ளனர். அப்படி ஒருவர் தான் மதுரை வேட்பாளர் வி. வேலுச்சாமி. பி.ஏ., எல்.எல்.பி. படித்த வழக்கறிஞர் ஆவார்.
6.4.1948ம் ஆண்டு பிறந்த அவர் கல்லூரியில் படிக்கும் போதில் இருந்தே திமுகவுக்காக பாடுபடுபவர். ஒருங்கிணைந்த மதுரை மாவட்ட திமுக வழக்கறிஞர் அணி தலைவராகவும், தலைமை செயற்குழு உறுப்பினராகவும் உள்ளார். மேலும் இரண்டு தடவை தலைமை தணிக்கை குழு உறுப்பினராக இருந்தவர்.
இது தவிர 10 ஆண்டுகளாக மதுரை மாவட்ட திமுக செயலாளராக இருந்தவர். 1996ம் ஆண்டு முதல் 2001ம் ஆண்டு வரை மதுரை கிழக்கு சட்டசபை உறுப்பினராக இருந்தார். 1989ம் ஆண்டு மதுரை நாடாளுமன்ற தேர்தலில் போட்டியிட்டு தோல்வி அடைந்தார். மேலும் 2001ம் ஆண்டு பேரவை தேர்தலில் மதுரை கிழக்கு பகுதியிலும், 2006ம் ஆண்டு திருமங்கலம் தொகுதியிலும் போட்டியிட்டு தோல்வி அடைந்தார்.
அவருக்கு ராஜாத்தி என்ற மனைவியும், டாக்டர் ஜோதிலெட்சுமி என்ற மகளும் உள்ளனர்.