"டிராகன்" தெரியுமா.. டிரம்ப்பிற்கு எலான் மஸ்க் தந்த மிரட்டல்.. ஒரு நொடி அதிர்ந்த அமெரிக்கர்கள்
வாஷிங்டன்: இப்போது அமெரிக்க அதிபர் டிரம்ப், உலகின் மிகப் பெரிய கோடீஸ்வரரான எலான் மஸ்க் இடையே மோதல் வெடித்துள்ளது. இருவரும் சமூக வலைத்தளங்களில் மாறி மாறி வெளிப்படையாகவே விமர்சனங்களை முன்வைத்து வருகிறார்கள். இதற்கிடையே எலான் மஸ்க் நிறுவனத்திற்கு அளிக்கப்படும் மானியங்களை நிறுத்தப்போவதாக டிரம்ப் எச்சரித்த நிலையில், டிராகனை வைத்து அதற்கு எலான் மஸ்க் பதிலடி கொடுத்துள்ளார்.
அமெரிக்கா அதிபரான டிரம்பிற்கும் உலகின் மிகப் பெரிய பணக்காரரான எலான் மஸ்கிற்கும் இடையே கடந்த சில காலமாகவே நல்ல நட்பு இருந்தது. ஆனால், அந்த நட்பு இப்போது பகையாக மாறிவிட்டது. இருவரும் மாறி மாறி சமூக வலைத்தளங்களில் விமர்சனங்களை முன்வைத்து வருகிறார்கள். இது இணையத்தில் பெரும் பரபரப்பைக் கிளப்பியுள்ளது.
எலான் மஸ்க்
எலான் மஸ்க்கை விமர்சித்த டிரம்ப் தனது ஒரு போஸ்ட்டில், "நமது பட்ஜெட்டில் பல பில்லியன் டாலர்களை மிச்சப்படுத்துவதற்கான எளிதான வழி, எலானுக்கு வழங்கப்படும் அரசு மானியங்கள் மற்றும் ஒப்பந்தங்களை நிறுத்துவதாகும். பைடன் அரசே அதைச் செய்யாதது எனக்கு ஆச்சரியமாக இருந்தது!" என்று பதிவிட்டிருந்தார்.
அவரது இந்த போஸ்ட் இணையத்தில் பெரும் பேசுபொருள் ஆனது. என்ன தான் கருத்து வேறுபாடு என்றாலும் ஒரு அதிபர் இதுபோல வெளிப்படையாகக் குறிப்பிட்ட நிறுவனத்திற்கு எதிராக மிரட்டல் விடுக்கலாமா எனக் கேள்வி எழுப்பினர். இன்னும் சிலர் டிரம்ப் அதிபராகிப் பல மாதங்கள் ஆகிவிட்ட நிலையில், இன்னும் பைடன் அரசைக் குறைகூறுவது எந்த விதத்தில் சரி என்று கேட்டனர்.
டிராகன் மிரட்டல்
டிரம்பின் இந்த போஸ்ட்டிற்கு ஒரு கட்டத்தில் எலான் மஸ்க்கே பதிலளித்தார். இது தொடர்பாக அவர் தனது ட்விட்டரில், "எனது அரசு ஒப்பந்தங்களை ரத்து செய்வதாக அதிபர் கூறியிருக்கிறார். இதனால் ஸ்பேஸ்எக்ஸ் நிறுவனம் அதன் டிராகன் விண்கலத்தை உடனடியாக நிறுத்தவுள்ளது" என்று பதிவிட்டுள்ளார். இது இரு தரப்பிற்கும் இடையேயான பதற்றத்தை அதிகரிப்பதாகவே உள்ளது.
ஏன் முக்கியம்
சர்வதேச விண்வெளி நிலையத்திற்கு விண்வெளி வீரர்களை அழைத்துச் செல்லவும், அங்கிருந்து திரும்பப் பூமிக்கு அழைத்து வரவும் சுமார் $4.9 பில்லியன் மதிப்பில் ஸ்பேஎஸ் எக்ஸ் நிறுவனத்துடன் நாசா ஒப்பந்தம் போட்டுள்ளது. இதற்காக நாசா ஸ்பேஸ்எக்ஸ் நிறுவனத்தின் டிராகன் விண்கலத்தைத் தான் நம்பியுள்ளது. தற்போதைய சூழலில் மனிதர்களை விண்வெளிக்குக் கூட்டிச் செல்லும் திறன் கொண்ட ஒரே அமெரிக்க விண்கலம் இந்த டிராகன் மட்டுமே.
இந்தச் சூழலில் திடீரென டிராகன் விண்கலம் செயல்பாட்டை நிறுத்தினால் அது நாசாவின் திட்டத்தையும் சர்வதேச விண்வெளி நிலையத்தின் திட்டத்தையும் மொத்தமாகச் சீர்குலைக்கும். இது அமெரிக்கா மட்டுமின்றி 20+ நாடுகளைக் கொண்டதாகும். டிராகனை தவிர்த்துப் பார்த்தால் தற்போது ரஷ்யாவின் சோயஸ் விண்கலனால் மட்டுமே வீரர்களை விண்வெளிக்கு அழைத்துச் செல்ல முடியும். எனவே, அமெரிக்காவுக்கு இருக்கும் ஒரே ஆப்ஷன் இந்த டிராகன் தான்.
இறங்கி வந்த எலான் மஸ்க்
அமெரிக்காவுக்கு இந்தளவுக்கு முக்கியமானதாக உள்ள டிராகன் விண்கலனை எடுத்தேன் கவிழ்த்தேன் என நிறுத்துப்போவதாக எலான் மஸ்க் சொன்னது பலருக்கும் அதிருப்தியை ஏற்படுத்தியது. நெட்டிசன்கள் பலரும் இது குறித்து தங்கள் அதிருப்தியைத் தெரிவித்தனர். இந்த விவகாரத்தில் எலான் மஸ்க்கை மிகக் கடுமையாகச் சாடி நெட்டிசன் ஒருவர் பதிவிட்டிருந்தார். அதற்குப் பதிலளித்த எலான் மஸ்க், "நல்ல அட்வைஸ்.. சரி, நாங்கள் டிராகனை நிறுத்த மாட்டோம்" என பதிவிட்டார்.
வேறு பலரும் டிராகன் குறித்த எலான் மஸ்கின் போஸ்ட்டிற்கு அதிருப்தி தெரிவித்து கருத்துகளைப் பதிவிட்டனர். அப்போது எலான் மஸ்க் அமெரிக்கக் கொடியைப் பகிர்ந்து டீம் அமெரிக்கா என்ற மற்றொரு போஸ்ட்டை பதிவிட்டிருக்கிறார். டிராகன் மிரட்டலில் இருந்து எலான் மஸ்க் பின்வாங்கினாலும் டிரம்ப், எலான் மஸ்க் மோதல் தொடரவே செய்கிறது.
Click it and Unblock the Notifications
Sign in with Google