"அண்ணாமலையை விட்ற கூடாது!" புதிய இயக்கத்தில் முதல் ஆளாக இணைந்த கூமாபட்டி தங்கபாண்டி! பின்னணி என்ன?

Updated: Sunday, June 7, 2026, 11:23 [IST]

Subscribe to Oneindia Tamil

சென்னை: தமிழக அரசியலில் புதிய பரபரப்பை ஏற்படுத்தியுள்ள முன்னாள் தமிழக பாஜக தலைவர் அண்ணாமலை தொடங்கியுள்ள 'வீ தி லீடர்ஸ்' (We The Leaders) இயக்கத்தில் சமூக ஆர்வலர் தங்கபாண்டி இணைந்திருப்பது கவனத்தை ஈர்த்துள்ளது. தனது சொந்த முயற்சியால் விருதுநகர் மாவட்டத்தில் உள்ள கூமாபட்டி கிராமத்தின் வளர்ச்சியை புதிய உயரத்திற்கு கொண்டு சென்றவர் என்ற அடையாளத்துடன் நாடு முழுவதும் கவனம் பெற்ற தங்கபாண்டி, அண்ணாமலையின் புதிய பயணத்திற்கு முதல் கட்டத்திலேயே ஆதரவு தெரிவித்திருப்பது அரசியல் வட்டாரங்களில் பேசுபொருளாகியுள்ளது.

Annamalai Koomapatti Thangapandi We The Leaders

கூமாபட்டியை மாற்றிய இளைஞர்

சாதாரண குடும்பத்தில் பிறந்த தங்கபாண்டி, சமூக வலைதளங்கள் மூலமாக மக்களின் கவனத்தை பெற்றவர். தனது கிராமமான கூமாபட்டியில் சாலை, குடிநீர், தூய்மை, கல்வி உள்ளிட்ட பல்வேறு அடிப்படை வசதிகளை மேம்படுத்துவதற்காக தொடர்ந்து வீடியோக்கள் வெளியிட்டு வந்தார்.

அரசின் உதவியை மட்டுமே எதிர்பார்க்காமல், பொதுமக்களையும் இளைஞர்களையும் ஒன்றிணைத்து கிராம வளர்ச்சிக்காக உழைத்ததால், "ஒரே ஒருவரால் ஒரு கிராமத்தின் தலையெழுத்தை மாற்ற முடியும்" என்பதற்கான உதாரணமாக தங்கபாண்டி பார்க்கப்பட்டார்.

இதன் காரணமாகவே சமூக ஊடகங்களில் அவருக்கு மிகப்பெரிய ஆதரவு உருவானது. பலரும் அவரை மாற்றத்தின் முகமாகவும், இளைஞர்களுக்கான முன்மாதிரியாகவும் பாராட்டி வந்தனர்.

ஆரம்பத்திலிருந்தே அண்ணாமலை மீது மரியாதை

தங்கபாண்டி சமூக வலைதளங்களில் பிரபலமடையத் தொடங்கிய காலத்திலேயே அவரை பலர் அண்ணாமலையுடன் ஒப்பிட்டு பேசினர். "நீங்கள் அண்ணாமலையின் தம்பியா?" என்ற கேள்வி பல பேட்டிகளில் அவரிடம் கேட்கப்பட்டது.

அதற்கு பதிலளித்த தங்கபாண்டி, "என்னை அண்ணாமலை சாருடன் ஒப்பிடுவது எனக்கு மிகவும் மகிழ்ச்சி அளிக்கிறது. அவருடைய தம்பி என்று சொன்னால்கூட பெருமையாகத்தான் நினைப்பேன். அவர் மிகவும் படித்தவர். நல்ல வேலை, நல்ல பதவி அனைத்தையும் விட்டுவிட்டு மக்களுக்கு சேவை செய்ய வந்திருக்கிறார். அது சாதாரண விஷயம் கிடையாது" என்று வெளிப்படையாக கூறியிருந்தார்.

அந்தக் காலத்திலேயே அண்ணாமலை மீதான தனது மரியாதையையும் நம்பிக்கையையும் தங்கபாண்டி வெளிப்படுத்தியிருந்தது குறிப்பிடத்தக்கது.

அண்ணாமலை இயக்கம்

தற்போது அண்ணாமலை தொடங்கியுள்ள We The Leaders இயக்கத்தில் இணைந்துள்ள தங்கபாண்டி, அதற்கான காரணத்தையும் தெளிவாக விளக்கியுள்ளார்.

"அண்ணாமலையை விட்றக் கூடாது என்று நான் நினைக்கிறேன். நேர்மையான தலைமை, தொலைநோக்குப் பார்வை மற்றும் மக்களுக்காக உழைக்க வேண்டும் என்ற எண்ணம் அவரிடம் இருக்கிறது. இப்படிப்பட்ட தலைமை நாட்டிற்கு தேவை" என்று அவர் கூறியுள்ளார்.

மேலும், சமூக மாற்றத்தை ஏற்படுத்த விரும்பும் சாதாரண இளைஞர்களுக்கு இந்த இயக்கம் ஒரு வாய்ப்பாக இருக்கும் என்றும் அவர் நம்பிக்கை தெரிவித்துள்ளார்.

அரசியலுக்கு அப்பாற்பட்ட மாற்ற இயக்கம்?

அண்ணாமலையின் We The Leaders இயக்கம் அரசியல் கட்சியாக அல்லாமல், தலைமைத்துவ திறன்களை வளர்க்கும் தளமாக உருவாக்கப்பட்டுள்ளதாக கூறப்படுகிறது. சமூக அக்கறை கொண்ட இளைஞர்களை ஒருங்கிணைத்து, கிராமங்கள் மற்றும் நகரங்களில் மாற்றத்தை உருவாக்கும் நோக்கத்துடன் இந்த இயக்கம் செயல்பட உள்ளதாக தகவல்கள் வெளியாகியுள்ளன.

அதன் முதல் கட்டத்திலேயே தங்கபாண்டி போன்ற சமூக செயற்பாட்டாளர்கள் இணைந்திருப்பது, இந்த இயக்கத்திற்கு கூடுதல் கவனத்தை பெற்றுத் தந்துள்ளது.

முக்கியமான சிக்னலா?

கடந்த சில ஆண்டுகளாக சமூக வலைதளங்களில் தனக்கென ஒரு ஆதரவாளர் வட்டத்தை உருவாக்கியுள்ள தங்கபாண்டி, அரசியல் பதவியோ அதிகாரமோ இல்லாமல் மக்கள் மத்தியில் செல்வாக்கை பெற்றவர். அப்படிப்பட்ட ஒருவர் அண்ணாமலையின் புதிய முயற்சிக்கு ஆதரவு தெரிவித்திருப்பது பேசப்பட்டு வருகிறது

குறிப்பாக, "அண்ணாமலையை விட்றக் கூடாது" என்ற அவரது கருத்து சமூக ஊடகங்களில் வேகமாக பரவி வருகிறது. ஏற்கனவே அண்ணாமலையை முன்னுதாரணமாகக் கருதி பேசி வந்த தங்கபாண்டி, இப்போது நேரடியாக அவரது இயக்கத்தில் இணைந்திருப்பது தமிழக அரசியல் மற்றும் சமூக வட்டாரங்களில் புதிய விவாதத்தை ஏற்படுத்தியுள்ளது.

அண்ணாமலையின் புதிய பயணமும், கூமாபட்டி தங்கபாண்டியின் ஆதரவும் எதிர்காலத்தில் எந்த வகையான தாக்கத்தை ஏற்படுத்தும் என்பது தற்போது அரசியல் பார்வையாளர்களின் கவனத்தை ஈர்த்துள்ளது.