1 இன்ச் கூட.. அசையாமல் அப்படியே நிற்கும் டிட்வா புயல்.. சென்னையில் விடாமல் மழை பெய்வது ஏன்? காரணம்

Updated: Monday, December 1, 2025, 14:43 [IST]

Subscribe to Oneindia Tamil

சென்னை: டிட்வா புயல் வலிமை இழந்து ஆழ்ந்த தாழ்வு மண்டலமாக மாறி உள்ளது. ஆனால் இந்த ஆழ்ந்த காற்றழுத்தத் தாழ்வு மண்டலம் நகராமல் தமிழகக் கடலோரத்தில் அசையாமல் நிற்கிறது. முக்கியமாக வங்கக்கடலில் சென்னைக்கு அருகே நிற்பதால் இந்த தாழ்வு மண்டலம் கடுமையான மழையை கொடுக்கிறது.

சென்னை மற்றும் அதன் கரையோரப் பகுதிகளில் கனமழை விடாமல் பெய்து வருகிறது. இந்த தாழ்வு மண்டல அமைப்பின் மெதுவான நகர்வால், வலுவான மழை மேகங்கள் மீண்டும் மீண்டும் நகரை நோக்கி வருகிறது, இதுவே அதிகாலை முதல் தொடர் மழையைக் கொண்டுவந்ததாக வானிலை ஆய்வாளர்கள் குறிப்பிடுகின்றனர். அதாவது தாழ்வு மண்டலம் அருகிலேயே இருந்தபடி .. மழை மேகங்களை சென்னையை நோக்கி நகர்த்தி வருகிறது.

ஆட்டம் காட்டும் டிட்வா புயல்

இந்த டிட்வா புயல் தாழ்வு மண்டலமாக மாறி இருந்தாலும் மழை குறைந்தபாடில்லை. இந்த தாழ்வு மண்டல அமைப்போடு தொடர்புடைய மேகக்கூட்டங்கள் கணிசமாக வலுப்பெற்றுள்ளன. கடற்பரப்பில் மேகங்கள் நீண்ட நேரம் நீடித்து நிற்கிறது. இது போன்ற மேகங்கள் அதிக உயரத்தில் இருக்கின்றன. அசையாமல் இவை அப்படியே நிற்பது ஒழுங்கமைக்கப்பட்ட காற்றழுத்தத் தாழ்வு மண்டலத்தின் அறிகுறி. இது பொதுவாக அதிக மழையை கொடுக்கும். அப்படித்தான் தற்போது இம்மேகங்கள் தொடர்ந்து ஈரப்பதத்தை நிலப்பரப்பிற்கு கொண்டுவர, சென்னையின் பல பகுதிகளில் மிதமானது முதல் கனமழை பெய்து வருகிறது..

இந்த புயல் சென்னையில் இருந்து 150 கிமீ தூரத்தில் உள்ளது. ஆனால் வறண்ட காற்று காரணமாக புயல் வலிமை இழந்துவிட்டது. கடுமையான வறண்ட காற்று காரணமாக பெரிய தாக்கத்தை ஏற்படுத்தாமல் புயல் வலிமை இழந்துவிட்டது. ஆனாலும் டெல்டாவிற்கு.. அதாவது நாகப்பட்டினத்திற்கு 180 கிமீ தூரத்தில் இருப்பதால் டெல்டாவில் மழையை கடுமையாக கொடுத்து வருகிறது. இந்த புயல் காரணமாக டெல்டாவில்தான் கனமழை பெய்து வருகிறது.

நேற்று சென்னையில் பெரிதாக மழை பெய்யாத நிலையில் அதிகாலையில் இருந்து சென்னையிலும் கனமழை பெய்து வருகிறது.

மழை விவரம்

நேற்று இரவு சென்னையில், அரும்பாக்கம், கோயம்பேடு, காசிமேடு , ராயப்பேட்டை, கிண்டி, வடபழனி, திருவொற்றியூர் , எண்ணூர், தேனாம்பேட்டை, அண்ணா சாலை, மெரினா கடற்கரை, சைதாப்பேட்டை, நுங்கம்பாக்கம், ஆகிய பகுதிகளில் இரவு மழை பெய்தது. அதிகாலையில் 1-2 மணி நேரம் விடாமல் மழை பெய்தது. ஆனாலும் அங்கு தண்ணீர் வேகமாக வடிந்துள்ளது.

இப்போது காலை 9 மணியில் இருந்து மீண்டும் விடாமல் மழை பெய்து வருகிறது. இன்று தமிழகத்தின் பெரும்பாலான இடங்களிலும், புதுவை மற்றும் காரைக்கால் பகுதிகளிலும் இடி, மின்னலுடன் கூடிய லேசானது முதல் மிதமான மழை பெய்து வருகிறது. இராமநாதபுரம், புதுக்கோட்டை, மயிலாடுதுறை, நாகப்பட்டினம், திருவாரூர், தஞ்சாவூர், கடலூர் மாவட்டங்கள், புதுவை மற்றும் காரைக்கால் பகுதிகளில் கனமழையும், கன்னியாகுமரி, திருநெல்வேலி, தூத்துக்குடி, விழுப்புரம், செங்கல்பட்டு, திருவள்ளூர், சென்னை, காஞ்சிபுரம், அரியலூர், பெரம்பலூர், சிவகங்கை மாவட்டங்களில் சில இடங்களிலும் கனமழை பெய்து வருகிறது.

நாளையும் சென்னையில் மழை தொடரும். அதேபோல் நாளை தமிழ்நாடு, புதுச்சேரி மற்றும் காரைக்கால் பகுதிகளில் ஓரிரு இடங்களில் லேசானது முதல் மிதமான மழை பெய்யக்கூடும். கோயம்புத்தூர் மாவட்டத்தின் மலை பகுதிகள், நீலகிரி, திருப்பூர், தேனி, திண்டுக்கல் மற்றும் தென்காசி மாவட்டங்களில் ஓரிரு இடங்களில் கனமழை பெய்யவாய்ப்புள்ளது.