"பறக்கும் சாசர்" வீடு!

1960களில் வடிக்கப்பட்ட பறக்கும் சாசர் வகை வீடு ஒன்று பாரீஸில் ஏலம் மூலம் விற்பனைக்கு வருகிறது.

எதிர்கால வீடு என்று பெயரிடப்பட்ட இந்த பறக்கும் சாசர் வீட்டை, பின்லாந்தைச் சேர்ந்த கட்டடக் கலை நிபுணர் மாட்டி சுரோனன் என்பவர் 1964ம் ஆண்டு வடிவமைத்தார். நீண்ட முட்டை வடிவிலான, விமானம் போன்ற தோற்றத்தில் உள்ள இந்த வீடு கலை நுட்பத்தின் மொத்த வடிவாக திகழ்கிறது. இந்த வீட்டை வடிவமைக்க சுரோனனுக்கு 4 ஆண்டுகள் பிடித்தது.

இந்த பறக்கும் சாசர் வீடு 1968ம் ஆண்டு லண்டனில் முதன் முறையாக காட்சிக்கு வைக்கப்பட்டது.

ஹெலிகாப்டர் மூலம் தூக்கிச் செல்லும் வகையிலான, இலகுவான எடை கொண்ட வீடு என்பதால், இந்த வீடு குறுகிய காலத்தில் உலகின் பல நாடுகளிலும் பிரபலமானது.

சமீபத்தில் இந்த வீடு லக்சம்பர்க் மியூசியத்தில் காட்சிக்கு வைக்கப்பட்டது. தற்போது பிரபலமான கிறிஸ்டி ஏல நிறுவனம் இந்த வீட்டை ஏலத்திற்குக் கொண்டு வந்துள்ளது. பாரீஸில் அடுத்த வாரம் இந்த பறக்கும் சாசர் வீட்டின் ஏலம் நடைபெறுகிறது.

இந்த வீடு 2 லட்சத்து 22 ஆயிரத்து 200 டாலர் முதல் 2 லட்சத்து 96 ஆயிரத்து 200 டாலருக்குள் ஏலம் போகும் என கிறிஸ்டி எதிர்பார்க்கிறது. நவம்பர் 27ம் தேதி ஏலம் நடைபெறுவதாக கிறிஸ்டி அறிவித்துள்ளது.