சாவர்க்கர் பேனரை அகற்றக்கோரி போராட்டம்.. கர்நாடகாவில் பதற்றம்.. சிவமொக்காவில் 144 தடை உத்தரவு அமல்!

Updated: Monday, August 15, 2022, 20:02 [IST]

Subscribe to Oneindia Tamil

சிமோகா: சுதந்திர தினத்தன்று ஆர்எஸ்எஸ் இயக்க நிறுவனர் சாவர்க்கருக்கு இந்து ஆதரவு அமைப்புகளால் அமைக்கப்பட்ட பேனருக்கு இஸ்லாமிய இளைஞர்கள் எதிர்ப்பு தெரிவித்ததால் பரபரப்பு ஏற்பட்டுள்ளது.

ஆசாதி கா அம்ரித் மகா உத்சவ் என்ற பெயரில் சுதந்திர தினம் கொண்டாடப்பட்டு வருகிறது. இதனையொட்டி பொதுமக்கள் தங்கள் வீட்டின் முன்போ அல்லது மொட்டை மாடியிலோ இரவு, பகல் என வித்தியாசம் பாராமல் ஆகஸ்ட் 13 முதல் 15 வரை தேசியக் கொடியை ஏற்றிக்கொள்ள அனுமதி வழங்கப்பட்டுள்ளது. இதனால் வீடுதோறும் மூவர்ணக் கொடி ஏற்றப்பட்டுள்ளது. நாடு முழுவதும் காலை முதலே சுதந்திர தினம் பிரம்மாண்டமாக கொண்டாடப்பட்டு வருகிறது.

சாவர்க்கருக்கு பேனர்

அதேபோல் பல்வேறு பகுதிகளிலும் இந்திய சுதந்திரத்திற்காக பாடுபட்ட தியாகிகளின் நினைவுகளும் போற்றப்பட்டு வருகிறது. அவர்களுக்கு மரியாதை செலுத்தும் வகையில், பல்வேறு தரப்பினரும் சுதந்திரப் போராட்ட வீரர்களுக்கு போஸ்டர் மற்றும் பேனர்கள் அமைத்துள்ளனர். அந்த வகையில் ஆர்எஸ்எஸ் இயக்கத்தின் நிறுவனரான சாவர்க்கருக்கும் கர்நாடகா மாநிலத்தின் பல்வேறு பகுதிகளிலும் போஸ்டர்கள் அடிக்கப்பட்டுள்ளன. அதேபோல் சிமோகாவிலும் இந்து ஆதரவு அமைப்புகளால் போஸ்டர் மற்றும் பேனர் வைக்கப்பட்டுள்ளன.

144 தடை

இதனைத்தொடர்ந்து சாவர்க்கர் பேனரை அகற்றக்கோரி இஸ்லாமியர் இளைஞர்கள் போராட்டத்தில் ஈடுபட்டனர். இதற்கு இந்து ஆதரவு அமைப்புகள் எதிர்ப்பு தெரிவித்ததால் பரபரப்பு ஏற்பட்டது. இந்த விவகாரம் காரணமாக பதற்றம் அதிகரித்ததால், சிமோகாவின் பல்வேறு பகுதிகளிலும் 144 தடை உத்தரவு அமல்படுத்தப்பட்டுள்ளது.

பேனர் அகற்றம்

இதேபோல் மங்களூரு மாவட்டத்தின் சூரத்கல் பகுதியிலும் சாவர்க்கருக்கு பேனர் வைக்கப்பட்டுள்ளது. இதற்கு எஸ்டிபிஐ கட்சியின் நிர்வாகிகள் பலரும் எதிர்ப்பு தெரிவித்ததை தொடர்ந்து, சாவர்க்கருக்கு வைக்கப்பட்ட பேனர் அகற்றப்பட்டுள்ளது. ஏற்கனவே பாஜக எம்எல்ஏ பரத் ஷெட்டியின் கோரிக்கையின் பேரில், சூரத்கல் பகுதிக்கு சாவர்க்கர் பெயரைச் சூட்டுவதற்கான முன்மொழிவுக்கு மங்களூரு மாநகராட்சி ஒப்புதல் அளித்தது. ஆனால் இதுவரை அரசு அனுமதி வழங்காததால், பெயர் மாற்றப்படாமல் உள்ளது.

திப்பு சுல்தான் பேனர் கிழிப்பு

ஏற்கனவே பெங்களூரு நகரின் முக்கியப் பகுதிகளில் காங்கிரஸ் கட்சி சார்பாக திப்பு சுல்தானுக்கு வைக்கப்பட்ட பேனர் கிழிக்கப்பட்ட விவகாரம் பரபரப்பை ஏற்படுத்தியது. தற்போது இந்து ஆதரவு அமைப்புகளால் சாவர்க்கருக்கு வைக்கப்பட்ட பேனருக்கு எதிர்ப்பு கிளம்பியுள்ளது அப்பகுதி மக்களிடையே பரபரப்பை ஏற்படுத்தியுள்ளது.