பயணிகளின் கனிவான கவனத்துக்கு.. மாற்றுப் பாதையில் 10 எக்ஸ்பிரஸ் ரயில்கள்- மதுரை, திண்டுக்கல் வராதாம்!

சென்னை: மதுரை ரயில்வே கோட்டத்தில் பராமரிப்பு பணிகள் நடைபெறுவதால் குருவாயூர் எக்ஸ்பிரஸ் உட்பட 10 ரயில்கள் மாற்றுப் பாதையில் இயக்கப்படுவதாக அறிவிக்கப்பட்டுள்ளன. இதனால் இந்த 10 ரயில்கள் மதுரை, திண்டுக்கல் ரயில் நிலையம் வழியாக இயக்கப்படாது எனவும் மதுரை ரயில்வே கோட்ட நிர்வாகம் தெரிவித்துள்ளது.

1. செங்கோட்டை- மயிலாடுதுறை எக்ஸ்பிரஸ் (16848): செங்கோட்டையில் இருந்து காலை 7.05 மணிக்கு புறப்பட்டு மயிலாடுதுறை செல்லும் இந்த எக்ஸ்பிரஸ் ரயில் வழக்கமான கள்ளிக்குடி, திருப்பரங்குன்றம், மதுரை, கொடைக்கானல் சாலை (கொடைரோடு), திண்டுக்கல், வடமதுரை, வையம்பட்டி, மணப்பாறை வழியாக செல்லாது. இதற்கு மாற்றாக விருதுநகர், மானாமதுரை, காரைக்குடி, புதுக்கோட்டை, திருச்சி வழியாக மயிலாடுதுறை செல்லும். வரும் 24, 25, 27,28,30 ஆகிய நாட்களில் இந்த மாற்றுப் பாதையில் இயக்கப்படும்.

மறுமார்க்கமாக வரும் 30-ந் தேதியன்று மயிலாடுதுறையில் இருந்து பகல் 12 மணிக்கு புறப்படும் இந்த எக்ஸ்பிரஸ் ரயில், கள்ளிக்குடி, திருப்பரங்குன்றம், மதுரை, கொடைக்கானல் சாலை (கொடைரோடு), திண்டுக்கல், வடமதுரை, வையம்பட்டி, மணப்பாறை வழியாக செல்லாது. திருச்சி,புதுக்கோட்டை, காரைக்குடி, மானாமதுரை, விருதுநகர் வழியாக செங்கோட்டை சென்றடையும்.

2. நாகர்கோவில்- கோவை எக்ஸ்பிரஸ் ரயில்: வரும் 25,28 ஆகிய தேதிகளில் நாகர்கோவில்- கோவை எக்ஸ்பிரஸ் திருமங்கலம், மதுரை, திண்டுக்கல் வழியாக செல்லாமல் விருதுநகர், மானாமதுரை, காரைக்குடி, திருச்சி, கரூர், ஈரோடு வழியாக செல்லும்; கோவையில் இருந்து மறுமார்க்கமாக வரும் 25,28 தேதிகளில் இதே வழித்தடத்திலேயே நாகர்கோவில்- கோவை எக்ஸ்பிரஸ் ரயில் இயக்கப்படும்.

3. நாகர்கோவில் மும்பை சிஎஸ்டி எக்ஸ்பிரஸ்கள் (16340,16352) ரயில் வரும் 28-ந் தேதி, 30-ந் தேதி விருதுநகர்- திருச்சி பாதையில் இயக்கப்பட்டு மும்பை செல்லும். மதுரை, திண்டுக்கல் ரயில் நிலையங்கள் வழியாக செல்லாது.

4.குருவாயூர் எழும்பூர் எக்ஸ்பிரஸ் ரயில் (16128) வரும் 24,27,29 ஆகிய தேதிகளில் விருதுநகர்- திருச்சி மார்க்கத்தில் இயக்கப்படும். மதுரை- திண்டுக்கல் மார்க்கத்தில் இயக்கப்படாது.

5. கன்னியாகுமரி- ஹவுரா எக்ஸ்பிரஸ் ரயில் (12666) வரும் 25-ந் தேதி மதுரை- திண்டுக்கல் வழியாக இயக்கப்படாமல் விருதுநகர்- திருச்சி மார்க்கத்தில் இயக்கப்படும்.

6. நாகர்கோவில்- காச்சிகுடா (16354) எக்ஸ்பிரஸ் ரயிலும் வரும் 25-ந் தேதி விருதுநகர்- திருச்சி மார்க்கத்தில் இயக்கப்படும். மதுரை- திண்டுக்கல் வழியாக இயக்கப்படாது.

7. காசி தமிழ் எக்ஸ்பிரஸ் ரயில் (06368)- உ.பி. பனாரஸில் இருந்து கன்னியாகுமரி வரும் இந்த எக்ஸ்பிரஸ் ரயில் வரும் 26-ந் தேதி திருச்சி- விருதுநகர் மாற்றுப் பாதையில் இயக்கப்படும்; மதுரை- திண்டுக்கல் வழியாக செல்லாது.

8. சென்னை எழும்பூர்- மதுரை தேஜஸ் எக்ஸ்பிரஸ் ரயில் வரும் 25,26 ஆகிய தேதிகளில் திருச்சி வரை இயக்கப்படும்; 25,28 ஆகிய தேதிகளில் திருச்சியில் இருந்து சென்னை எழும்பூருக்கு இயக்கப்படும். திருச்சி- மதுரை இடையே இந்த நாட்களில் தேஜஸ் ரயில் ரத்து செய்யப்படும்.

9.. வரும் 24,27 தேதிகளில் ஈரோடு- செங்கோட்டை எக்ஸ்பிரஸ் ரயில் கரூர் வரை மட்டும் இயக்கப்படும். அதேபோல 25,28 தேதிகளில் செங்கோட்டை எக்ஸ்பிரஸ் கரூரில் இருந்து ஈரோட்டுக்கு இயக்கப்படும்.

10. குஜராத்தின் ஓஹாவில் இருந்து மதுரை வரும் சிறப்பு ரயில், விழுப்புரம் வரை மட்டுமே இயக்கப்படும். இந்த ரயில் சேவை விழுப்புரம்- மதுரை இடையே ரத்தாகிறது. மதுரையில் இருந்து 31-ந் தேதி புறப்பட வேண்டிய ஓஹா எக்ஸ்பிரஸ் விழுப்புரத்தில் இருந்து புறப்படும்.

English summary

Due to route diversions, 10 express trains will bypass Madurai and Dindigul stations.