வாடிக்கையாளர்களை ஆவின் ஏமாற்றக்கூடாது! பச்சை நிற கவர் பாலுக்கு கடும் தட்டுப்பாடு ஏன்? -அன்புமணி

சென்னை: ஆவின் பச்சை உறை பாலுக்கு கடும் தட்டுப்பாடு ஏற்பட்டுள்ளதாகவும் வாடிக்கையாளர்களை ஆவின் ஏமாற்றக்கூடாது எனவும் பாமக தலைவர் அன்புமணி ராமதாஸ் தெரிவித்துள்ளார்.

ஆவின் நிர்வாகத்தின் நடவடிக்கையால் மக்களுக்கு ஒரு புறம் பாதிப்பும்; மறுபுறம் தனியார் நிறுவனங்களுக்கு லாபமும் ஏற்பட்டுள்ளதாக கூறியுள்ளார்.

இது தொடர்பாக அன்புமணி ராமதாஸ் விடுத்துள்ள பதிவில் கூறியிருப்பதாவது;

ஆவின் பச்சை உறை பால்

சென்னை மற்றும் புறநகர் பகுதிகளில் ஆவின் பச்சை உறை பாலுக்கு கடுமையாக தட்டுப்பாடு ஏற்பட்டிருப்பதாக கூறப்படுகிறது. அதனால் லிட்டருக்கு ரூ.16 கூடுதலாக கொடுத்து ஒரு லிட்டர் ரூ.60 என்ற விலைக்கு ஆரஞ்சு உறை பாலை வாங்கும் நிலைக்கு ஆவின் வாடிக்கையாளர்கள் தள்ளப்பட்டுள்ளனர்.

ஆவின் ஆரஞ்சு உறை பால்

பச்சை உறை பாலுக்கு தட்டுப்பாடு ஏற்படுவதற்கு முதன்மை காரணம் ஆரஞ்சு உறை பால் விலை உயர்த்தப்பட்டது தான். ஆரஞ்சு பால் விலை லிட்டர் ரூ.48-லிருந்து ரூ.60 ஆக உயர்த்தப்பட்டதால் அதன் தேவை குறைந்து விட்டது. குறைந்த விலையில் கிடைக்கும் பச்சை உறை பால் தேவை அதிகரித்திருக்கிறது.

தனியார் நிறுவனங்களுக்கு லாபம்

பச்சை உறை பாலுக்கான தேவை அதிகரித்திருப்பது ஆவின் நிர்வாகத்திற்கு தெரியும். பச்சை உறை பாலை பொதுமக்களின் தேவைக்கு ஏற்ப தட்டுப்பாடின்றி ஆவின் வினியோகித்திருக்க வேண்டும். அவ்வாறு செய்யத் தவறியதால் ஒருபுறம் மக்களுக்கு பாதிப்பு; மறுபுறம் தனியார் நிறுவனங்களுக்கு லாபம்.

ஆவின் ஏமாற்றக்கூடாது

வாடிக்கையாளர்களை ஆவின் ஏமாற்றக்கூடாது. பச்சை உறை பால் வினியோகத்தை குறைந்தது 20% அதிகரிக்க வேண்டும். அதில் ஏதேனும் தடை இருந்தால் ஆரஞ்சு உறை பாலின் விலையை முன்பிருந்தவாறே லிட்டர் ரூ.48 என்ற அளவுக்கு குறைக்க ஆவின் நிறுவனம் முன்வர வேண்டும். இவ்வாறு அன்புமணி ராமதாஸ் தனது பதிவில் கூறியிருக்கிறார்.

English summary

Anbumani Ramadoss has said that there is a severe shortage of Aavin green pocket milk and that Aavin should not deceive the customers.