மனசு நெருடுது..தம்பட்டமடிப்பது சரி ஆனா இழிவாக பேசாதீர்! நிர்மலா சீதாராமனை விளாசி தள்ளிய திருமாவளவன்

சென்னை: ‛‛நம்மை பற்றி தம்பட்டமடிப்பது சரி. ஆனால் இழிவாக பேசாதீர்''என நாடாளுமன்றத்தில் பேசிய நிர்மலா சீதாராமன் குறித்து விடுதலை சிறுத்தைகள் கட்சியின் தலைவரும் எம்பியுமான தொல் திருமாவளவன் விமர்சித்துள்ளார்.

நாடாளுமன்றத்தின் இருஅவைகளிலும் விலைவாசி உயர்வு, பணவீக்கம் குறித்து விவாதிக்க வேண்டும் என எதிர்க்கட்சி எம்பிக்கள் கூறி வந்தனர். இதற்கு மத்திய அரசு ஒப்புக்கொள்ளாமல் இருந்ததால் அவை நடவடிக்கைகள் தொடர்ந்து பாதிக்கப்பட்டன.

இந்நிலையில் அவைகளில் விலைவாசி உயர்வு பற்றி விவாதிக்க மத்திய அரசு முன்வந்தது. அதன்படி நாடாளுமன்றத்தின் லோக்சபாவில் நேற்று விலைவாசி உயர்வு பற்றிய விவாதம் நடந்தது. எதிர்க்கட்சி எம்பிக்களின் கேள்விக்கு மத்திய நிதி அமைச்சர் நிர்மலா சீதாராமன் பதிலளித்தார்.

மத்திய அமைச்சர் விளக்கம்

இந்த விவாதத்தின்போது நிர்மலா சீதாராமன் இந்திய பொருளாதாரம் பற்றி விரிவாக பேசினார். அப்போது அவர், ‛‛ உலகிலேயே அதிவேகமாக வளர்ந்து வரும் பொருளாதாரமாக இந்தியா உள்ளது. உலகமே பொருளாதார ரீதியாக பாதிக்கப்பட்டிருக்கும் நிலையில் இந்தியாவின் வளர்ச்சி தொடர்கிறது. கொரோனா இடர்பாடுகளையும் கடந்து உலகின் பிற நாடுகளை விட இந்தியாவின் பொருளாதாரம் சிறப்பான நிலையில் உள்ளது. அனைவரும் ஒருங்கிணைந்து செயல்பட்டதால் பொருளாதார வளர்ச்சி மீண்டுள்ளது. கொரோனா, ரஷியா- உக்ரைன் போர் உள்ளிட்ட சூழலிலும் 7 சதவீதத்திற்குள் பணவீக்கத்தை அரசு கட்டுப்படுத்தியுள்ளது. பொருளாதார மந்த நிலையோ, தேக்க நிலையோ ஏற்படும் என்ற கேள்விக்கே இடமில்லை'' என்றார்.

திருமாவளவன் எம்பி எதிர்ப்பு

இந்த வேளையில் மத்திய அமைச்சர் இந்தியாவின் பொருளாதாரத்தை அண்டை நாடுகளோடு நிர்மலா சீதாராமன் ஒப்பீட்டு செய்து பேசினார். இதனை விடுதலைகள் சிறுத்தைகள் கட்சியின் தலைவரும், எம்பியுமான தொல் திருமாவளவன் கடுமையாக எதிர்த்துள்ளார். இதுபற்றி அவர் தனது டுவிட்டர் பக்கத்தில் கூறியுள்ளதாவது:

இலங்கை கையேந்துவதாக..

விலைவாசி உயர்வு தொடர்பான விவாதத்திற்கு விடையளித்த அமைச்சர் நிர்மலா சீதாராமன் பொருளாதார நிலை குறித்து இந்தியாவை அண்டை நாடுகளோடு ஒப்பீடு செய்தார். அப்போது இலங்கை, பாகிஸ்தான், பங்களாதேஷ் ஆகிய நாடுகள் ஐஎம்எப் மற்றும் பிற நாடுகளில் கையேந்துகின்றன என குறிப்பிட்டார்.

இழிவு செய்வது அரசியல் நாகரீகமா?

நம்மை பற்றி தம்பட்டமடிப்பது சரி. ஆனால் ஒரு பொறுப்புள்ள பதவியில் இருப்பவர் உலகமே உற்று கவனிக்க கூடிய ஒரு அவையில் பிற நாடுகளை இழிவு செய்வதுபோல் பேசியது அரசியல் நாகரீகமா?. கையேந்துகிறார்கள் என்பது நாடாளுமன்றத்தில் அனுமதிக்கப்படும் சொற்களா? தெளிவு படுத்துவார்களா? .

நெருடலாக உள்ளது

விலைவாசி உயர்வு, பட்டினிச்சேவைகள் போன்றவை மக்களை வாட்டி வதைக்கும் நியைில் இந்தியா எல்லாவற்றிலும் தன்னிறைவு பெற்றுவிட்டதை போல தம்பட்டமடிப்பது நெருடலாக உள்ளது. உலகமே கவனித்து கொண்டிருக்கும் மக்களின் அவையில் இவ்வாறு பிற நாடுகளை கேலி செய்வது அரசியல் நாகரீகமா? எனும் கேள்வி எழுகிறது'' என கூறியுள்ளார்.

English summary

Thol Thirumavalavan, leader of the Viduthalai Chiruthaikala Katchi and MP, has criticized Nirmala Sitharaman who spoke in Parliament saying, "It's okay to brag about ourselves. But don't speak disparagingly".