ஆவின் இனிப்புகளுக்கு போட்டி ஜாஸ்தியாயிடுச்சு! அதான் இப்படியெல்லாம் பண்றாங்க! அமைச்சர் நாசர் வேதனை!
சென்னை: ஆவின் இனிப்புகளுக்கு போட்டி அதிகமாகிவிட்டதாகவும் அதனால் தான் பொய்யான தகவல்களை தினமும் சிலர் பரப்பி வருகிறார்கள் எனவும் அமைச்சர் நாசர் தெரிவித்துள்ளார்.
ஆவின் இனிப்புகளை பொறுத்தவரை ஒன்றுக்கு பலமுறை சோதனை செய்த பிறகே விற்பனைக்கு அனுப்புவதாகவும் அவர் விளக்கம் அளித்துள்ளார்.
பிரபல இனிப்புக் கடைகளில் அதிக விலை என்பதால் தீபாவளி பண்டிகைக்கு மக்கள் ஆவின் இனிப்புகளை அதிகளவில் ஆர்டர் செய்திருப்பது குறிப்பிடத்தக்கது.
அமைச்சர் நாசர்
தீபாவளி பண்டிகையை முன்னிட்டு சென்னை நந்தனத்தில் உள்ள ஆவின் அலுவலகத்தில் ஊழியர்களுக்கு பணப்பயன்கள் வழங்கினார் பால்வளத்துறை அமைச்சர் நாசர். அதன்பிறகு செய்தியாளர்களை சந்தித்த அவர், ஆவின் இனிப்பு விற்பனை தீபாவளியை ஒட்டி இரண்டு மடங்கு அதிகரித்துள்ளதாகவும் இதுவரை ரூ.110 கோடிக்கு விற்பனை செய்யப்பட்டுள்ளதாகவும் தெரிவித்தார். இதன் காரணமாக ஆவின் இனிப்புகளுக்கு போட்டியும் அதிகமாகிவிட்ட தகவலை வெளியிட்டார்.
போட்டி அதிகம்
போட்டியாளர்கள் ஆவின் இனிப்புகள் பற்றி தவறான தகவல்களை பரப்பி வருவதகவும் வேண்டுமென்ற தவறை கண்டுபிடிக்க வேண்டும் என்பதற்காக உண்மைக்கு புறம்பான தகவல்களை கசியவிட்டு வருவதாகவும் வேதனைத் தெரிவித்தார் அமைச்சர் நாசர். இது போல் செய்பவர்கள் மீது சட்டம் ஒழுங்கு நடவடிக்கை எடுப்பது பற்றி ஆலோசித்து வருவதாகவும் கூறியுள்ளார். இதேபோல் தவறான தகவல் கொடுத்தோர் மீது வழக்குப்பதிவு செய்யவும் நடவடிக்கை எடுத்து வருவதாக கூறினார்.
பால் கொள்முதல்
பால் கொள்முதல் விலையை உயர்த்துவது பற்றி இன்னும் ஒரு வாரத்திற்குள் முதலமைச்சர் ஸ்டாலின் முடிவெடுத்து அறிவிப்பார் என்று கூறிய அமைச்சர் நாசர், ஆவின் இனிப்புகளின் விற்பனை விகிதம் இரண்டு மடங்கு அதிகரித்துள்ளதால் அதிகாரிகள் மற்றும் ஊழியர்களிடம் தனது மகிழ்ச்சியை பரிமாறிக் கொண்டார்.
குவியும் ஆர்டர்
பிரபல இனிப்புக் கடைகளில் அதிக விலை என்பதால் தீபாவளி பண்டிகைக்கு மக்கள் ஆவின் இனிப்புகளை அதிகளவில் ஆர்டர் செய்திருப்பது குறிப்பிடத்தக்கது. எந்த ஆண்டும் இல்லாத வகையில் இந்தாண்டு நட்ஸ் ஹல்வா உள்ளிட்ட பல புதிய வகை இனிப்புகளை ஆவின் அறிமுகப்படுத்தியிருப்பது குறிப்பிடத்தக்கது. தீபாவளிக்கு இன்னும் 2 நாட்கள் இருப்பதால் ஆவின் இனிப்பு விற்பனை விகிதம் இன்னும் அதிகரிக்கும் என எதிர்பார்க்கப்படுகிறது.
Click it and Unblock the Notifications
Sign in with Google