ஓமிக்ரான் வைரஸ்: குழந்தைகளிடம் இந்த அறிகுறிகள் காணப்படுகிறதா?.. அப்போ ஈசியாக எடுத்து கொள்ளாதீங்க!

Updated: Wednesday, February 2, 2022, 18:15 [IST]

Subscribe to Oneindia Tamil

டெல்லி: உலகம் முழுவதும் கொடிய கொரோனா வைரஸ் தொடர்ந்து ஆதிக்கம் செலுத்தி வருகிறது. கொரோனா வைரஸ் புதிது, புதிதாக உருமாறி வருவதால் உலக நாடுகள் கலக்கம் அடைந்துள்ளன.

இந்த வகையில் தென் ஆப்பிரிக்காவில் கண்டுபிடிக்கப்பட்ட ஓமிக்ரான் வைரஸ் இந்தியா உள்பட பல்வேறு நாடுகளில் ஆட்டம் போட்டு வருகிறது. இந்தியாவில் தற்போது கொரோனா ஆதிக்கம் சற்று குறைந்தாலும் பாதிப்பு இன்னும் முழுமையாக நீங்கவில்லை.

ஓமிக்ரான் வைரஸ் ஆபத்து

ஓமிக்ரான் வைரஸ் மிகவும் லேசானவை என்று ஒருபக்கம் பலர் கூறி வந்தாலும், இந்த வைரஸ் மிகவும் ஆபத்தானது என்றும் 2 டோஸ் தடுப்பூசி போடப்பட்ட மக்கள் இந்த வைரஸால் பாதிக்கப்பட்டுள்ளனர். டெல்டா வைரஸை விட வீரியம்மிக்கது என்று மருத்துவ நிபுணர்களின் எச்சரிக்கையாக உள்ளது. குறிப்பாக இந்த ஓமிக்ரான் வைரஸ் குழந்தைகளை அதிகம் தாக்கி வருவது மிகவும் கவலைக்குரிய விஷயமாக உள்ளது.

குழந்தைகளுக்கு அதிக பாதிப்பு

ஏற்கனவே டெல்டா வைரஸ் மாறுபாட்டில் குழந்தைகள் அதிகம் பாதிக்கப்பட்ட நிலையில், ஓமிக்ரான் வைரசால் குழந்தைகள் பாதிப்படைவது மிகவும் அதிகரித்துள்ளது. ஒரு சில குழந்தைகளிடம் காணப்படும் தீவிரமான பாதிப்பு அவர்களை மருத்துவமனையில் அனுமதிக்கப்படும் நிலைக்கு கொண்டு செல்கிறது.
ஒமிக்ரான் பாதிப்புகள் இந்தியாவில் இன்னும் கட்டுக்குள் வராத நிலையில் குழந்தைகளில் ஓமிக்ரான் நோய்த்தொற்றின் அறிகுறிகளை அறிந்து கொள்வது மிகவும் அவசியமாகிறது.

குழந்தைகளிடம் இந்த அறிகுறிகள் இருக்கா?

அதாவது குழந்தைகளிடம் சோர்வு, தலைவலி, தொண்டை வலி, மூக்கு ஒழுகுதல், தும்மல் போன்ற அறிகுறிகள் இருந்தால் மிகவும் எச்சரிக்கையாக முன்கூட்டியே பரிசோதனை செய்ய வேண்டும் என்று மருத்துவ நிபுணர்கள் கூறுகின்றனர். ஒமிக்ரான் வைரஸ் நுரையீரலில் மட்டுமல்ல, பல உறுப்புகளிலும் தாக்கத்தை ஏற்படுத்துகிறது. மேற்கண்ட அறிகுறிகள் தவிர வயிற்றில் வலி மற்றும் உடலில் சொறி போன்ற அறிகுறிகளும் எச்சரிக்கையை உணர்த்துபவையாகும்.

குழந்தைகளை பாதுகாப்பது எப்படி?

அனைத்து குழந்தைகளிடமும் இந்த அறிகுறிகள் காணப்படுவதில்லை. ஆனால் ஒமிக்ரான் அறிகுறிகளில் முக்கிய அறிகுறியாக வறண்ட இருமல் குழந்தைகளிடையே பொதுவாக காணப்படுகிறது. கொரோனாவில் இருந்து குழந்தைகளை பாதுகாப்பதற்கு மாஸ்க் அணிதல், சானிடைசர் உபயோகித்தல் மிகவும் முக்கியம் என்று மருத்துவ நிபுணர்கள் கூறுகின்றனர். அதே வேளையில் ஊட்டச்சத்து மிக்க உணவுகளை குழந்தைகளுக்கு வழங்குவது மிகவும் பயன்தரும் என்றும் அவர்கள் சுட்டிக்காட்டுகின்றனர்.