மாறி மாறி தண்ணி காட்டுறியே தெய்வமே? இந்தியாவில் ஆட்டம் காட்டும் கொரோனா! திடீரென சரிந்த பாதிப்பு!

டெல்லி : இந்தியாவில் கொரோனா பாதிப்பு கடந்த சில நாட்களாகவே கூடுவதும் குறைவதுமாக இருந்த நிலையில் கடந்த இரு நாட்களாக கொரோனா பாதிப்பு 12 ஆயிரத்துக்கும் மேல் என்று இருந்த நிலையில் இன்று பாதிப்பு பத்தாயிரத்திற்கும் கீழே வந்துள்ளது.

சீனாவின் வூகான் மாகாணத்தில் கடந்த 2019ஆம் ஆண்டு கண்டறியப்பட்ட கொரோனா வைரஸ் உலக அளவில் பலத்த பொருளாதார இழப்புகளையும் உயிரிழப்புகளையும் ஏற்படுத்தி கோரத்தாண்டவம் ஆடியது.

சுமார் மூன்று வருடங்களாக கொரோனாவின் தாக்கம் நீடித்து வரும் நிலையில் மூன்றாவது அலை நிறைவடைந்துள்ளது. இந்நிலையில் கடந்த சில நாட்களாக கொரோனா பாதிப்பு அதிகரிப்பதும் குறைவதுமாக இருந்து வருகிறது.

கொரோனா பாதிப்பு

இந்நிலையில் தற்போது கடந்த ஒரு மாதமாக சிறிது சிறிதாக கொரோனா பாதிப்பு அதிகரித்து வருகிறது. இந்தியாவில் கடந்த சில நாட்களாக கேரளா, மகாராஷ்டிரா உள்ளிட்ட சில மாநிலங்களில் கொரோனா தொற்று பரவல் அதிகரித்து வருகிறது. சுகாதார அமைச்சகம் நேற்று மற்றும் நேற்று முன்தினம் வெளியிட்ட அறிவிப்பின்படி சுமார் 12 ஆயிரம் பேருக்கு கொரோனா தொற்று பாதிப்பு பதிவானது. இந்த நிலையில், கொரோனா பாதிப்பு இன்று மீண்டும் சரிந்துள்ளது.

பாதிப்பு சரிவு

இந்தியாவில் நேற்று முன்தினம் 12,899 பேருக்கு பாதிப்பும், நேற்று 12,781 பேருக்கும் பாதிப்பு உறுதியாகி இருந்த நிலையில் இன்று 9 ஆயிரத்து 923 பேருக்கு பாதிப்பு உறுதி செய்யப்பட்டுள்ளது. இதன் மூலம் மொத்த கொரோனா பாதிப்பு எண்ணிக்கை 4 கோடியே 33 லட்சத்து 19 ஆயிரத்து 396 ஆக அதிகரித்துள்ளது.

பலி எண்ணிக்கை

கொரோனா காரணமாக 17 பேர் பலியான நிலையில் பலியானோர் எண்ணிக்கை 5 லட்சத்து 24 ஆயிரத்து 890 ஆக உயர்ந்துள்ளது. கடந்த 24 மணி நேரத்தில் கொரோனா பாதிப்பில் இருந்து 7 ஆயிரத்து 293 பேர் குணமடைந்து மருத்துவமனைகளில் இருந்து வீடு திரும்பியுள்ள நிலையில், குணமடைந்தவர்களின் மொத்த எண்ணிக்கை 4 கோடியே 27 லட்சத்து 15 ஆயிரத்து 193 ஆக உயர்ந்துள்ளது.

தடுப்பூசி அளவு

மேலும் கொரோனா தொற்றுக்கு தற்போது 79 ஆயிரத்து 313 பேர் சிகிச்சை பெற்று வருகின்றனர். இந்தியாவில் இதுவரை 196 கோடியே 32 லட்சத்து 43 ஆயிரத்து 3 பேருக்கும், கடந்த 24 மணி நேரத்தில் மட்டும் 13 லட்சத்து 24 பேருக்கு கொரோனா தடுப்பூசி போடப்பட்டுள்ளது என்று மத்திய சுகாதார அமைச்சகம் வெளியிட்டுள்ள அறிக்கையில் கூறப்பட்டுள்ளது.

English summary

The incidence of corona in India has been increasing and decreasing in the last few days and the incidence of corona has come down to less than ten thousand today from over 12 thousand in the last two days.