ஓம்.. நெல்லையில் 140 அடி உயரத்தில் தனுஷ் கட் அவுட்.. ' விஜய் கட் அவுட்டை முறியடித்த ரசிகர்கள்
நெல்லை: ஓம் திரைப்பட வெளியீட்டைக் கொண்டாடும் வகையில் நெல்லை தனுஷ் நற்பணி இயக்கம் சார்பில் நெல்லை சந்திப்பு ராம் சினிமாஸ் திரையரங்கில் 140 அடி உயரத்தில் தனுஷின் பிரம்மாண்ட கட் அவுட் அமைக்கப்பட்டுள்ளது. இதே திரையரங்கில் தெறி திரைப்படத்திற்காக 130 அடி உயர கட் அவுட் அமைக்கப்பட்டதாகக் கூறப்படும் நிலையில், தற்போது அதனை விட உயரமாக 140 அடி கட் அவுட் அமைக்கப்பட்டுள்ளது.
அமரன் திரைப்படத்தின் மாபெரும் வெற்றியைத் தொடர்ந்து இயக்குநர் ராஜ்குமார் பெரியசாமி இயக்கத்தில் தனுஷ் நடிப்பில் உருவாகியுள்ள ஓம் (O.M - Operation Mole) திரைப்படம் நாளை உலகம் முழுவதும் திரையரங்குகளில் வெளியாகிறது.

இப்படத்தில் தனுஷ் கதாநாயகனாகவும், மம்மூட்டி வில்லனாகவும் நடித்துள்ளனர். 8 ஆண்டுகளுக்குப் பிறகு மம்மூட்டி தமிழில் நடிக்கும் திரைப்படம் இதுவாகும். சாய் பல்லவி, ஸ்ரீலீலா, இந்திரன்ஸ், நஸீருத்தீன் ஷா உள்ளிட்ட பல நட்சத்திரங்கள் முக்கிய கதாபாத்திரங்களில் நடித்துள்ளனர்.
சாய் அப்யங்கர் இசையமைத்துள்ள இப்படம் திருவண்ணாமலை, திருப்பதி ஆகிய கோயில் நகரங்களை மையமாகக் கொண்டு பிரம்மாண்ட பொருட்செலவில் உருவாக்கப்பட்டுள்ளது. திரைப்பட வெளியீட்டை முன்னிட்டு நடிகர் தனுஷ் அரசியலுக்கு வரப்போவதாக வெளியாகும் தகவல்களுக்கு மத்தியில் அவரது ரசிகர் மன்றங்கள் நற்பணி இயக்கங்களாக மாற்றப்பட்டு பல்வேறு நலத்திட்ட உதவிகளும் மேற்கொள்ளப்பட்டு வருகின்றன.
இந்நிலையில், ஓம் திரைப்பட வெளியீட்டைக் கொண்டாடும் வகையில் நெல்லை தனுஷ் நற்பணி இயக்கம் சார்பில் நெல்லை சந்திப்பு ராம் சினிமாஸ் திரையரங்கில் 140 அடி உயரத்தில் தனுஷின் பிரம்மாண்ட கட் அவுட் அமைக்கப்பட்டுள்ளது.
வெள்ளை வேட்டி, வெள்ளை சட்டை அணிந்து கழுத்தில் ருத்ராட்ச மாலையுடன் தலைக்கு மேல் கைகூப்பியவாறு தனுஷின் முழு உருவத்துடன் அமைக்கப்பட்டுள்ள இந்த கட் அவுட் ரசிகர்கள் மட்டுமின்றி பொதுமக்கள் மத்தியிலும் ஆச்சரியத்தை ஏற்படுத்தியுள்ளது.
இதே திரையரங்கில் தெறி திரைப்படத்திற்காக 130 அடி உயர கட் அவுட் அமைக்கப்பட்டதாகக் கூறப்படும் நிலையில், தற்போது அதனை விட உயரமாக 140 அடி கட் அவுட் அமைக்கப்பட்டுள்ளது. மேலும், ரசிகர் மன்றம் சார்பில் அரசியல் வாசகங்கள் இடம்பெற்ற பிரம்மாண்ட பேனர்கள் அமைப்பதற்கான அச்சுப் பணிகளும் நடைபெற்று வருகின்றன.




Click it and Unblock the Notifications
