இசையமைப்பாளர் தேவாவின் இறுதி ஊர்வலத்தில் நடந்த சம்பவம்.. கோபத்தில் கத்திய நடிகர் ஜெய்!
சென்னை: தேனிசை தென்றல் தேவாவின் மறைவு செய்தியே இன்னும் பலரால் ஏற்றுக்கொள்ள முடியாத ஒன்றாக இருக்கிறது. பல ஆண்டுகளாக நம்மை தனது பாடல்களால் மகிழ்வித்த ஒரு கலைஞர் இன்று நம்முடன் இல்லை. அவரது குடும்பத்தினரோ, திடீரென ஒரு உறவை இழந்த துக்கத்தில் இருந்து மீள முடியாமல் தவித்துக் கொண்டிருக்கிறார்கள். ஆனால், இப்படியொரு சோகமான சூழலில்கூட நடந்த ஒரு சம்பவம் தற்போது இணையத்தில் கவனம் பெற்றிருக்கிறது.
இசையமைப்பாளர் தேவா இறுதி ஊர்வலம்
தேவாவின் இறுதி ஊர்வலத்தின்போது அவரது உடலை வாகனத்தில் ஏற்றிக்கொண்டு செல்ல ஏற்பாடுகள் செய்யப்பட்டிருக்கின்றன. அப்போது அங்கு திரண்டிருந்த பொதுமக்களில் பலரும் அந்த காட்சியை போட்டோ வீடியோ எடுக்க வாகனத்தை சுற்றி நெருக்கியடித்ததாகக் கூறப்படுகிறது. இதனால் தேவாவின் மகனான ஸ்ரீகாந்த் தேவா அந்த வாகனத்தில் ஏறுவதற்குக்கூட சிரமப்படும் நிலை ஏற்பட்டிருக்கிறது.
தந்தையை இழந்து நிற்கும் ஒரு மகனுக்கு அந்த நேரத்தில் எவ்வளவு வலி இருக்கும்? கடைசியாக தனது அப்பாவின் உடலுடன் பயணிக்க வேண்டிய அந்த தருணத்தில்கூட, கூட்ட நெரிசல் காரணமாக அவரால் எளிதாக வாகனத்தில் ஏற முடியாத சூழல் ஏற்பட்டிருப்பது வேதனையான விஷயம். அங்கு என்ன நடக்கிறது என்பதை புரிந்துகொண்டு, குடும்பத்தினருக்கு வழிவிட வேண்டிய நேரத்தில் பலரும் முண்டியடித்துக் கொண்டிருந்ததாக கூறப்படுகிறது.
கோபத்தில் கத்திய நடிகர் ஜெய்
அப்போது தேவாவின் உறவினரான நடிகர் ஜெய், கூட்டத்தில் நெருக்கி தள்ளிக்கொண்டு வந்தவர்களை பார்த்துக் கோபமாக குரல் எழுப்பியிருக்கிறார். வழிவிடுமாறு அவர் சத்தமிட்ட காட்சிகள் தற்போது இணையத்தில் வைரலாகி வருகின்றன. தேவாவின் குடும்பத்தினர் அந்த துயரமான தருணத்தை கடந்து செல்லவே போராடி கொண்டிருக்கும்போது, அவர்களுக்கு வழிவிடாமல் நெரிசலை ஏற்படுத்தியதுதான் இந்த சம்பவத்தில் பலரது கவனத்தையும் ஈர்த்திருக்கிறது.
பிரபலங்கள் எங்கே சென்றாலும் அவர்களுடன் புகைப்படம் எடுத்துக்கொள்ள வேண்டும், முக்கியமான நிகழ்வுகளை வீடியோவாக பதிவு செய்ய வேண்டும் என்ற ஆர்வம் பலருக்கும் இருக்கிறது. அதில் தவறு இல்லை. ஆனால், எல்லா நேரங்களிலும் அந்த ஆர்வத்தை காட்ட வேண்டிய அவசியம் இருக்கிறதா என்பதைத்தான் நாம் யோசித்து பார்க்க வேண்டும்.
ரசிகர்கள் கேள்வி
ஒரு குடும்பம் தங்களுடைய அன்புக்குரியவரை இழந்து கண்ணீரில் நிற்கிறது. அந்த குடும்பத்தின் துக்கத்தில் பங்கேற்க முடியாவிட்டாலும் பரவாயில்லை, குறைந்தபட்சம் அவர்கள் இறுதி பயணத்தை மேற்கொள்ள வழிவிட வேண்டாமா? அங்கே இருப்பவர்கள் எல்லோரும் ஒரு காட்சியை பார்க்க வந்தவர்கள் மட்டுமல்ல. தங்களுக்குப் பிரியமான ஒருவரை இழந்து தவிக்கும் குடும்பத்தினரும் அங்கே இருக்கிறார்கள் என்பதை மறந்துவிடக் கூடாது.
தேவாவின் பாடல்களை கேட்டு வளர்ந்தவர்கள் ஏராளம். அவரது இசையை ரசித்தவர்கள், அவரது மறைவு செய்தியைக் கேட்டு நேரில் அஞ்சலி செலுத்த வந்தவர்கள் என பலரும் அந்த இறுதி ஊர்வலத்தில் கலந்துகொண்டிருக்கலாம். ஆனால், ஒரு கலைஞருக்கு அஞ்சலி செலுத்துவது என்பது அவரது குடும்பத்தினரின் தனிப்பட்ட துயரத்தையும் மதிப்பதில்தான் இருக்கிறது.
Click it and Unblock the Notifications
Sign in with Google
