மதுரை மீனாட்சி அம்மனுக்கு ஆடி முளைக்கொட்டு விழா கோலாகலம் - அலங்காரமாக உலா வரும் அம்மன்

ஆடி மாதம் திருவிழாக்களுக்கு பஞ்சமிருக்காது. மாரியம்மன் கோவில்களில் மட்டுமல்லாது மதுரை மீனாட்சி அம்மன் கோவிலிலும் ஆடி மாத திருவிழாக்கள் களைகட்டியுள்ளன. ஆடி முளைக்கொட்டு விழா மீனாட்சி அம்மன் கோவிலில் அமர்க்களமாக தொடங்கியுள

Updated: Tuesday, July 13, 2021, 12:05 [IST]

Subscribe to Oneindia Tamil

மதுரை: மதுரை மீனாட்சி அம்மன் கோவிலில் ஆடி முளைக்கொட்டு திருவிழா கொடியேற்றத்துடன் கோலாகலமாகத் தொடங்கியுள்ளது. அலங்கரிக்கப்பட்ட வாகனத்தில் எழுந்தருளி அம்மன் அருள்பாலித்தார்.
10 நாட்கள் திருவிழா நடைபெறுவதால் மீனாட்சி அம்மன் பல்வேறு வாகனங்களில் எழுந்தருளி ஆடி வீதிகளில் உலா வந்து அருள்பாலிக்கிறார்.

ஆடிப்பட்டம் தேடி விதை என்ற முன்னோர்களின் வாக்கின்படி, ஆடி மாதம் விதை விதைத்து நாற்று நட்டு விவசாய பணிகளை மேற்கொள்ளவும், தங்கள் நிலங்களில் பயிர் விளைச்சல் அதிகரிக்க வேண்டியும் இறைவனை வழிபாடு செய்வது வழக்கம். விவசாயம் செழிக்க அம்மனுக்கு முளைக்கொட்டு விழா ஆண்டு தோறும் கொண்டாடப்படுகிறது.

மதுரை மீனாட்சி அம்மன் கோவிலில் சித்திரை தொடங்கி பங்குனி வரை திருவிழாதான். ஆடி மாதம் அம்மனுக்கு முளைக்கொட்டு உற்சவம் நடைபெறும். இந்த ஆண்டு ஆடி முளைக்கொட்டு திருவிழா கொடியேற்றத்துடன் விமரிசையாக தொடங்கி நடைபெற்று வருகிறது.

அம்மனுக்கு திருவிழாக்கள்

மதுரை மீனாட்சி அம்மன் கோவிலில் 12 மாதங்களும் திருவிழா நடைபெறும். இதில் ஆடி முளைக்கொட்டு விழா, நவராத்திரி உற்சவம், ஐப்பசி பூரம், மார்கழி திருவிழா போன்றவை மீனாட்சி அம்மனுக்கு தனியாக நடத்தப்படும் திருவிழாவாகும். இந்த ஆண்டுக்கான ஆடி முளைக்கொட்டு திருவிழா நேற்று கொடியேற்றத்துடன் தொடங்கியது. வருகிற 22ஆம் தேதி வரை 10 நாட்கள் நடைபெற உள்ளது.

மீனாட்சி அம்மன்

விழாவின் முதல் நாளான நேற்று உற்சவர் மீனாட்சி அம்மன் சிறப்பு அலங்காரத்தில் அம்மன் சன்னதி ஆறுகால் பீடத்தில் எழுந்தருளினார். அங்கு திருவிழாவுக்கு காப்பு கட்டிய ரவி பட்டரால் விநாயகர் பூஜை, கும்ப பூஜையுடன் யாகம் வளர்க்கப்பட்டது. அதை தொடர்ந்து காலை 10.25 மணிக்கு மீனாட்சி அம்மன் சன்னதி கொடிமரத்தில் திருவிழாவுக்கான கொடியேற்றப்பட்டது.

ஆடி வீதியில் அம்மன்

மீனாட்சி அம்மனுக்கு சிறப்பு பூஜை செய்து, தீபாராதனை காண்பிக்கப்பட்டது. நேற்று இரவு மீனாட்சி அம்மன் சிம்ம வாகனத்தில் எழுந்தருளி ஆடி வீதியை வலம் வந்தார். விழா நாட்களில் மீனாட்சி அம்மன் காலை, இரவு நேரங்களில் ஆடி வீதிகளில் வலம் வந்து பக்தர்களுக்கு காட்சி அளிக்கிறார்.

தினசரி வீதி உலா

மீனாட்சி அம்மன் இன்று அன்னம், நாளை காமதேனு வாகனங்களில் எழுந்தருளிகிறார். நான்காம் நாள் யானை, 5ஆம் நாள் ரிஷபம், 6வது நாள் கிளி, 7வது நாள் மாலை மாற்றுதல், 8ஆம் நாள் குதிரை, 9ஆம் நாள் இந்திர விமானம், 10ஆம் நாள் கனகதண்டியல் வாகனத்தில் அம்மன் எழுந்தருளி அருள்பாலிக்கிறார்.