மேகதாது.. மோடியை சந்திக்கும் தமிழக குழு.. கே.எஸ்.அழகிரி கொடுத்த லிஸ்டில் ப.சிதம்பரம் மிஸ்சிங் ஏன்?

Updated: Saturday, July 17, 2021, 16:25 [IST]

Subscribe to Oneindia Tamil

சென்னை: மேகதாது அணை விவகாரம் தொடர்பாக பிரதமர் நரேந்திர மோடியை சந்திக்கச் சென்ற தமிழக குழுவில் காங்கிரஸ் சார்பில், ப.சிதம்பரம் இடம் பெறாதது விமர்சனங்களை ஏற்படுத்தியுள்ளது.

மேகதாது அணை விவகாரம் தொடர்பாக தமிழக சட்டமன்ற கட்சிகளின் தலைவர்கள் குழு இன்று பிரதமரை சந்திக்கிறது.

திமுகவின் மூத்த அமைச்சர் துரைமுருகன் தலைமையில் பிரதமரை சந்திக்கும் இந்த குழுவில், ஒவ்வொரு கட்சிகளின் சார்பில் அக்கட்சிகளின் மூத்த தலைவர்கள் இடம் பெற்றிருக்கிறார்கள்.

காங்கிரஸ் சார்பில் கோபண்ணா

அதேநேரம், காங்கிரஸ் தரப்பில் கோபண்ணாவை இணைத்திருக்கின்றனர். கோபண்ணா பெயரை திமுகவிடம் கே.எஸ். அழகிரிதான் பரிந்துரைத்துள்ளார். இந்த விவகாரம் காங்கிரஸ் தலைவர்களை அதிருப்தியடைய வைக்க, அழகிரியை தொடர்புகொண்டு காங்கிரஸ் தமிழக எம்.பி.க்கள் செம காட்டத்தை வெளிப்படுத்தியுள்ளனர்.

ப.சிதம்பரம் பெயர் இல்லை

ஒவ்வொரு கட்சியிலிருந்தும் முக்கிய தலைவர்கள், இந்த குழுவில் இடம் பெறும்போது கே.எஸ். அழகிரி இந்த குழுவில் சென்றிருக்கலாம். அல்லது அவருக்கு விருப்பமில்லையெனில் தமிழக சட்டமன்ற காங்கிரஸ் தலைவர் செல்வபெருந்தகையை அனுப்பியிருக்கலாம். அல்லது பிரதமரை சந்திக்கும் நிகழ்வு என்பதால் மூத்த தலைவர் ப.சிதம்பரத்தை இணைத்திருக்கலாம். இதை எதையும் செய்யாமல் கோபண்ணாவை இணைக்க வேண்டிய அவசியம் என்ன ? இந்த பின்னணியிலேயே அழகிரியிடம் செம கோபத்தை வெளிப்படுத்தியுள்ளனர் எம்.பி.க்கள்!

இரவு வரை குழப்பம்

இந்த நிலையில், கோபண்ணாவுடன் காங்கிரஸ் எம்.பி. ஜெயக்குமாரை குழுவில் இணைக்க திமுகவிடம் சொல்லியுள்ளார் அழகிரி. அப்பவும் சிதம்பரத்தை சிபாரிசு செய்யவில்லை. இந்த நிலையில், பிரதமரை சந்திக்க செல்லும் தமிழக குழுவில் காங்கிரஸ் தரப்பில் கோபண்ணா செல்வாரா ? அல்லது காங்கிரஸ் எம்.பி. ஜெயக்குமார் செல்வாரா? அல்லது இருவரும் செல்கிறார்களா ? என்ற குழப்பம் நேற்று இரவு முதல் காங்கிரசில் எதிரொலித்தபடி இருந்தது.

முக்கியத்துவம் வாய்ந்த விஷயம்

இந்த குழுவில் சிதம்பரம் இருந்திருக்க வேண்டும் என்றுதான் சிதம்பரத்திற்கு எதிரான கோஷ்டி தலைவர்களே சொல்கின்றனர். காரணம், பிரதமரிடம் துரைமுருகன், வைகோ, சிதம்பரம் ஆகிய தலைவர்கள் பேசும் போது அதற்கு ஒரு வலிமை இருக்கும். பிரதமரும் காது கொடுத்து கேட்பார் என்கிறார்கள்.