நாங்க இருக்கோம்.. சசிகலா அணிக்கு திடீர் தூது விடும் பாஜக.. தமிழக அரசியலில் பரபரப்பு

Published: Monday, October 22, 2018, 9:44 [IST]

Subscribe to Oneindia Tamil

தனித்துவிடப்பட்ட சசிகலா டீம்

முதல்வர் பதவியில் அமர்வதற்கான அனைத்து ஏற்பாடுகளையும் சசிகலா செய்துவந்த நிலையில், திடீரென ஏற்பட்ட இந்த அரசியல் மாற்றத்தின் காரணமாக எடப்பாடி பழனிச்சாமி முதல்வர் பதவிக்கு வந்தார். இதன் பிறகு தர்ம யுத்தம் நடத்திக் கொண்டிருந்த ஓ.பன்னீர் செல்வத்தை தங்கள் அணியுடன் இணைந்து கொண்டார் எடப்பாடி பழனிச்சாமி. ஆனால் சசிகலாவால் கட்சிக்குள் மீண்டும் கொண்டுவரப்பட்ட தினகரன் தனித்துவிடப்பட்டுள்ளார். அவர், அம்மா மக்கள் முன்னேற்ற கழகம் என்ற பெயரில் ஒரு கட்சியை தொடங்கி நடத்தி வருகிறார்.

["தலைவர்" ரஜினி நேற்று அப்படிக் கூறினாரா.. இன்று "அண்ணன்" என்ன சொல்லியிருக்கார் பாருங்க!]

சசிகலா அணிக்கு எதிர் நிலைப்பாடு

எடப்பாடி பழனிச்சாமி அணியுடன், தங்கள் அணியில் இணைத்துக் கொள்வதற்கு பிரதமர் மோடி வலியுறுத்தியதாக ஓ.பன்னீர்செல்வம் முன்பு ஒருமுறை, மேடைப்பேச்சு ஒன்றில் தெரிவித்தார். இந்த இணைப்புக்கு பின்னணியில் பாரதிய ஜனதா கட்சி இருப்பதாக அதுவரை யூகங்கள் வெளியாகி வந்த நிலையில் அதை பன்னீர்செல்வத்தின் பேச்சு உறுதி செய்தது. இதன் மூலம் சசிகலா அணிக்கு எதிரான நிலைப்பாட்டை பாஜக எடுத்திருந்ததும் அம்பலமானது.

பாஜக முயற்சி

ஆனால் கடந்த சில நாட்களுக்கு முன்பிருந்து, சசிகலா அணியினருக்கு பாஜக மேலிடம் தூதுவிட்டு வருவதாக டெல்லியில் இருந்து வரும் தகவல்கள் தெரிவிக்கின்றன. எடப்பாடி-பன்னீர்செல்வம், தினகரன் என, அதிமுக பிரிந்து இருப்பது அதன் ஓட்டு வங்கியை பாதிக்கும் என்று பாஜக நினைக்கிறது. எனவே எடப்பாடி பழனிச்சாமி அணியுடன் இணைந்து செயல்படுமாறும் அதற்கு தேவைப்படும் உதவிகளை தாங்கள் செய்து தருவதாகவும் பாஜக மேலிடம் சிறையிலுள்ள சசிகலாவிற்கும், டிடிவி தினகரனுக்கும் தூதுவிட்டு வருவதாக டெல்லி மேல்மட்ட தகவல்கள் தெரிவிக்கின்றன.

காரணங்கள் இதுதான்

இவ்வாறு ஒருங்கிணைந்த அதிமுகவுடன், கூட்டணி அமைத்து வரும் லோக்சபா தேர்தலை சந்திப்பது என்பது பாரதிய ஜனதா கட்சி திட்டமாம். இவ்வாறு செய்வதன் மூலமாகத்தான் தமிழகத்தில் கால் பதிக்க முடியும் என்பதும், ரஜினிகாந்தின் கட்சி ஆரம்பிக்காமல் இருப்பதும், திமுக தரப்பில் இருந்து தங்களுக்கு பாசிட்டிவ் சிக்னலில் கிடைக்காததும் இதன் பின்னணியில் உள்ள அம்சங்கள் என்கிறார்கள் பாஜகவுக்கு நெருக்கமான சில புள்ளிகள்.

இணக்கமாக போக தயார்

அதேநேரம் அணிகள் இணைந்தால் முதல்வர் பதவி தினகரன் அணிக்கு சென்று விடக்கூடாது என்பதில் எடப்பாடி ஆதரவு தரப்பு உறுதியாக உள்ளது. அதற்கு பதில், தகுதி நீக்கம் செய்யப்பட்ட 18 எம்எல்ஏக்கள் தீர்ப்பு வெளியான பிறகு அதை பார்த்துக்கொண்டு தேவைப்பட்டால் சபாநாயகரிடம் கொடுத்த புகாரை வாபஸ் பெறவும், அதில் இருவருக்கு அமைச்சரவையில் பதவி வழங்குவது என்றும் எடப்பாடி ஆதரவு தரப்பு கூறுகிறதாம்.

தினகரன் முட்டுக்கட்டை

எடப்பாடி தரப்பின் யோசனைக்கு, சசிகலா தரப்பு சம்மதிக்க வேண்டும் என்பதும் பாஜக விரும்புகிறது. ஆனால் இதற்கு தினகரன் தரப்புதான் முட்டுக்கட்டை போட்டு வருவதாக கூறப்படுகிறது. கட்சியின் ஒருங்கிணைப்பாளர் பதவி பன்னீர்செல்வத்திடமும், துணை ஒருங்கிணைப்பாளர் பதவி எடப்பாடி பழனிசாமியிடமும் உள்ளது. அதேபோல ஆட்சியிலும் முதல்வராக எடப்பாடியும், துணை முதல்வராக பன்னீர்செல்வமும் உள்ளனர். இப்படி கட்சி, ஆட்சி எதிலுமே முக்கியத்துவம் இல்லாத போது, அணிகள் இணைப்பிற்கு ஏன் சம்மதிக்க வேண்டும் என்பது தினகரன் தரப்பு கேள்வியாக உள்ளதாம். ஏற்கனவே நெடுஞ்சாலைத் துறை ஊழல் வழக்கு சிபிஐ வசம் இருப்பதால் இன்னொரு தரப்பை சரிகட்டுவது பாஜக இடத்திற்கு எளிதாக உள்ளது. தினகரன் தரப்பு மட்டும் சரி என்று சொல்லி விட்டால் விரைவிலேயே ஒருங்கிணைந்த அதிமுக மீண்டும் உதயமாகும் என்கிறது டெல்லி வட்டாரம்.

Published On October 22, 2018