10 ஆண்டுகளில் இல்லாத அளவு.. 62% அளவுக்கு ராக்கெட் போல உயர்ந்த சமையல் எண்ணை விலை.. மக்கள் திண்டாட்டம்

Updated: Wednesday, May 26, 2021, 21:10 [IST]

Subscribe to Oneindia Tamil

டெல்லி: கடந்த 10 ஆண்டுகளில் இல்லாத அளவுக்கு சமையல் எண்ணெய் விலை இப்போது கடுமையாக உயர்ந்துள்ளது.

வனஸ்பதி, சோயா, பாமாயில், சூரியகாந்தி எண்ணெய், கடலை எண்ணெய், நல்லெண்ணெய் உள்ளிட்ட அனைத்து வகையான எண்ணெய் விலைகளும் உயர்ந்ததன் காரணமாக கடந்த ஆண்டுடன் ஒப்பிட்டால் இப்போது 62 சதவீதம் அளவிற்கு விலையேற்றம் காணப்படுவதாக மத்திய அரசின் புள்ளிவிவரங்கள் தெரிவிக்கின்றன.

எண்ணெய் விலை கடுமையாக உயர்ந்து விட்ட நிலையில் அதைக் கட்டுப்படுத்துவது குறித்து உற்பத்தியாளர்களுடன், ஒரு மத்திய அரசு ஆலோசனை நடத்தி உள்ளது.

ஆலோசனை கூட்டம்

மதிய உணவு துறைச் செயலாளர் சுதான்சு பாண்டே தலைமையில் டெல்லியில் ஆலோசனை கூட்டம் நடைபெற்றது. அப்போது பேசிய அவர், இந்தியாவின் தேவைக்கேற்ப எண்ணெய் வித்துக்கள் உற்பத்தி இல்லை எனக்கூறினார்.

இறக்குமதியை நம்பியிருக்கும் இந்தியா

நமது நாட்டின் எண்ணை தேவையில், 60 சதவீதம் இறக்குமதி மூலமாக ஈடுகட்டப்படுகிறது. இறக்குமதியை நாம் அதிகம் சார்ந்து உள்ளோம். எனவே, சர்வதேச சந்தையில் எண்ணை விலை உயரும்போது இந்தியாவிலும் அதன் விலை உயரும் சூழல் ஏற்படுவதாக கூறிய உணவு துறை செயலாளர், அவற்றின் விலையை குறைக்க குறுகிய கால அளவில் திட்டங்கள் வகுக்கப்பட வேண்டிய தேவை இருப்பதாகவும் கூறினார்.

உடனடி நடவடிக்கை

நிலையை உடனடியாக சரி செய்வதற்கான சாத்தியக்கூறுகளை தெரிவிக்குமாறும் உற்பத்தியாளர்களை அவர் கேட்டுக்கொண்டார். தமிழகத்திலிருந்தும், உணவுத்துறை அதிகாரிகள் இந்த கூட்டத்தில், பங்கேற்றனர்.ஒரு பக்கம் பலநகரங்களிலும் பெட்ரோல் விலை லிட்டருக்கு 100 ரூபாயைத் தாண்டிவிட்டது. சமையல் எண்ணெய் விலையும் 62 சதவீதத்துக்கு மேல் அதிகரித்துவிட்டது. ஆக மொத்தம் உங்களுக்கு தெரியாமல் அல்லது நீங்கள் உணராமல் உங்களது பாக்கெட்டில் இருந்து கணிசமான ரூபாய் வெளியே உருவப்பட்டு வருகிறது .

கசியும் பணம்

கொரோனா பரவலால், நாடும், நாட்டு மக்களும் பொருளாதார நெருக்கடியை சந்தித்துள்ள இந்த காலகட்டத்தில், அரசு நமக்கு பணம் தருமா என்று எதிர்பார்க்கும் நேரத்தில், நாம் பணத்தை இப்படியான விலைவாசி உயர்வுகளால் இழக்க வேண்டிய சூழ்நிலை உருவாகியுள்ளது. சாமானியர்கள் நிலைமை மிகவும் மோசமாக மாறிக் கொண்டுள்ளது.