தெலுங்கானா: காங்கிரஸுக்கு கடும் அதிர்ச்சி- மாஜி 'தல' ஓபிசி முகம் பொன்னால லக்ஷ்மையா திடீர் ராஜினாமா!

ஹைதராபாத்: தெலுங்கானா சட்டசபை தேர்தல் நடைபெறும் நிலையில் அம்மாநில காங்கிரஸ் கமிட்டி முன்னாள் தலைவரான மூத்த தலைவர் பொன்னால லக்ஷ்மையா ( Ponnala Lakshmaiah) கட்சியில் இருந்து விலகியிருப்பது பரபரப்பை ஏற்படுத்தி உள்ளது. காங்கிரஸில் இருந்து விலகிய பொன்னால லக்ஷ்மையா, ஆளும் பிஆர்எஸ் கட்சியில் இணைய இருப்பதாக கூறப்படுகிறது.

ஒன்றுபட்ட ஆந்திரா அரசியலில் காங்கிரஸின் மூத்த தலைவர்களில் ஒருவராக இருந்தவர் பொன்னால லக்ஷ்மையா. ஆந்திரா, தெலுங்கானா மாநிலங்களில் இதர பிற்படுத்தப்பட்ட மக்களின் முகமாக அறியப்பட்டவர். முன்னூறு காப்பு என்ற பிற்படுத்தப்பட்ட சமூகத்தைச் சேர்ந்த பொன்னால லக்ஷ்மையா, 4 முறை எம்.எல்.ஏ.வாக தேர்தலில் வென்றவர். ஆனால் 2014 முதல் தேர்தல் தோல்விகளை எதிர்கொண்டிருப்பவர். தெலுங்கானா மாநிலம் உருவாக்கப்பட்ட போது அதன் முதல் மாநில காங்கிரஸ் கமிட்டி தலைவராக பதவி வகித்தவர் பொன்னால லக்ஷ்மையா.

தெலுங்கானா மாநில சட்டசபை தேர்தல் நவம்பர் 30-ந் தேதி நடைபெறும் நிலையில் காங்கிரஸ் கட்சியில் இருந்து விலகுவதாக அறிவித்துள்ளார் பொன்னால லக்ஷ்மையா. இது தொடர்பாக காங்கிரஸ் கமிட்டித் தலைவர் மல்லிகார்ஜூன கார்கேவுக்கு எழுதிய கடிதத்தில், காங்கிரஸ் கட்சி இதர பிற்படுத்தப்பட்ட சமூகத்தினரை புறக்கணிக்கிறது. பிற்படுத்தப்பட்ட சமூகத்தின் 50 பிரதிநிதிகள் டெல்லிக்கு வந்தும் காங்கிரஸ் மேலிடம் சந்திக்க மறுத்துவிட்டது. ஒரு தனிமனிதர் நடத்தும் சர்வே முடிவுகளின் அடிப்படையில் வேட்பாளர்கள் தேர்வு செய்யப்படுகின்றனர். காங்கிரஸ் வேட்பாளர்கள் தேர்வில் பிற்படுத்தப்பட்ட சமூகம் புறக்கணிக்கப்படுகிறது என குமுறியுள்ளார்.

தற்போது காங்கிரஸில் இருந்து விலகி இருக்கும் பொன்னால லக்ஷ்மையா, ஆளும் பிஆர்எஸ் கட்சியில் இணையக் கூடும் என தெரிகிறது. ஆளும் பிஆர்எஸ் கட்சிதான் அத்தனை பிற்படுத்தப்பட்ட சமூகங்களுக்கும் தேர்தலில் போட்டியிட வாய்ப்பு தந்துள்ளது எனவும் புகழ்ந்திருக்கிறார் பொன்னால லக்ஷ்மையா. இதனிடையே பொன்னால லக்ஷ்மையாவின் சொந்த தொகுதியான ஜனகோன் -க்கு பிஆர்எஸ் கட்சி இன்னமும் வேட்பாளரை அறிவிக்கவும் இல்லை. பிஆர்எஸ் கட்சி மொத்தம் 119 தொகுதிகளில் 115 தொகுதிகளுக்கான வேட்பாளர்களை அறிவ்த்திருந்தது. தற்போது காங்கிரஸில் இருந்து வெளியேறிய பொன்னால லக்ஷ்மையா, ஜனகோன் தொகுதியில் பிஆர்எஸ் வேட்பாளராக போட்டியிடக் கூடும் எனவும் தகவல்கள் தெரிவிக்கின்றன.

English summary

Telangana Congress Former President and BC leader Ponnala Lakshmaiah quit from the party, He will join to BRS.