ரூ2,000 கோடி சொத்து அபகரிப்பு- சோனியா, ராகுல் காந்திக்கு எதிரான நேஷனல் ஹெரால்டு வழக்கு என்ன?

Updated: Thursday, April 17, 2025, 11:34 [IST]

Subscribe to Oneindia Tamil

டெல்லி: காங்கிரஸ் கட்சியினர் இப்போது அமலாக்கத்துறைக்கு எதிரான போராட்டங்களை நாடு முழுவதும் தீவிரமாக நடத்தி வருகின்றனர். நேஷனல் ஹெரால்டு வழக்கில் காங்கிரஸ் மூத்த தலைவர் சோனியா காந்தி மற்றும் லோக்சபா எதிர்க்கட்சித் தலைவர் ராகுல் காந்தி மீது அமலாக்கத்துறை குற்றப்பத்திரிகை தாக்கல் செய்ததைக் கண்டித்துதான் நாடு முழுவதும் காங்கிரஸ் போராட்டம் நடைபெற்று வருகிறது.

சோனியா, ராகுல் காந்திக்கு பெரும் நெருக்கடியை கொடுத்து வரும் நேஷனல் ஹெரால்டு வழக்கின் பின்னணி என்ன?

நேஷனல் ஹெரால்டு பத்திரிகையானது ஜவஹர்லால் நேருவால் 1938-ஆம் ஆண்டு தொடங்கப்பட்டது. இந்த பத்திரிகையானது1937-ஆம் ஆண்டில் ஜவஹர்லால் நேருவால் தொடங்கப்பட்ட அசோசியேட்டட் ஜர்னல்ஸ் லிமிடெட் (Associated Journals Limited AJL) என்ற நிறுவனத்தின் சார்பில் வெளியிடப்பட்டது.
AJL நிறுவனத்தில் 5,000க்கும் மேற்பட்ட சுதந்திரப் போராட்ட வீரர்கள் பங்குதாரர்களாக இருந்தனர்.
AJL நிறுவனமானது, குவாமி ஆவாஸ் Qaumi Awaz உருது மொழி பத்திரிகையையும் நடத்தியது.
அதேபோல நவ்ஜீவன் என்ற இந்தி நாளேட்டையும் நடத்தியது.
நாட்டு விடுதலைக்கான குரலை வெளிப்படுத்திய நேஷனல் ஹெரால்டு பத்திரிகை 1942-ம் ஆண்டு ஆங்கிலேய அரசால் தடை செய்யப்பட்டது.
3 ஆண்டுகளுக்குப் பின்னர் 1945-ம் ஆண்டு முதல் மீண்டும் நேஷனல் ஹெரால்டு நாளிதழ் வெளியாக தொடங்கியது.
1947-ல் நாடு விடுதலை அடைந்து நாட்டின் முதல் பிரதமராக ஜவஹர்லால் நேரு பதவியேற்றார். இதனால் நேஷனல் ஹெரால்டு இயக்குநர் குழு தலைவர் பதவியை நேரு ராஜினாமா செய்தார்.
காங்கிரஸ் கட்சியின் நிதி ஆதாரத்தில் வெளிவந்த இந்த நேஷனல் ஹெரால்டு பத்திரிகை 2008-ம் ஆண்டு நிறுத்தப்பட்டது. அப்போது, பொருளாதார நெருக்கடி ஒரு காரணமாக கூறப்பட்டது.
நேஷனல் ஹெரால்டு பத்திரிகை 2016-ம் ஆண்டு முதல் ஆன்லைன் எடிசனாக மட்டும் வந்து கொண்டிருக்கிறது.
2008-ம் ஆண்டு நேஷனல் ஹெரால்டு பத்திரிகை மூடப்பட்ட போது ALJ நிறுவனத்துக்கு ரூ90 கோடி கடன் இருந்தது.
2010-ம் ஆண்டு யங் இந்தியன் பிரைவேட் லிமிடெட் (Young Indian Limited- YIL ) என்ற நிறுவனத்துக்கு ALJ நிறுவனத்தின் பங்குகள் கைமாறின. ALJ நிறுவனம் கடன்களில் இருந்து விடுபட்டது. யங் இந்தியன் பிரைவேட் லிமிடெட் நிறுவனமானது சோனியா, ராகுல் காந்தி உள்ளிட்டோரை உறுப்பினராகக் கொண்டது. இந்த நிறுவனத்துக்கு காங்கிரஸ் கட்சியின் நிதி கடனாக கொடுக்கப்பட்டது. இந்த கடன் மூலம் ALJ நிறுவனம், யங் இந்தியன் பிரைவேட் லிமிடெட் வசமானது. ALJ நிறுவனத்தின் 99% பங்குகளை சோனியா- ராகுல் காந்தியின் யங் இந்தியன் பிரைவேட் லிமிடெட் நிறுவனம் கைப்பற்றியது.
காங்கிரஸ் கட்சியை பயன்படுத்தி ALJ நிறுவனத்துக்கு சொந்தமான ரூ2,000 கோடி சொத்துகளை தங்களது யங் இந்தியன் பிரைவேட் லிமிடெட் நிறுவனம் மூலம் சோனியாவும் ராகுல் காந்தியும் அபகரித்துக் கொண்டனர் என்பது பாஜகவின் சுப்பிரமணியன் சுவாமியின் புகார்.
அதாவது வெறும் ரூ லட்சம் முதலீட்டில் தொடங்கப்பட்ட சோனியா-ராகுல் காந்தியின் யங் இந்தியன் பிரைவேட் லிமிடெட் நிறுவனம், ALJ-ன் ரூ2,000 கோடி சொத்துகளை முறைகேடாக கைப்பற்றியது என்பதுதான் வழக்கு..
சுப்பிரமணியன் சுவாமியின் மனு மீதான விசாரணையின் அடிப்படையில் 2013-ம் ஆண்டு சோனியா, ராகுல் காந்திக்கு எதிராக வருமான வரித்துறை விசாரணை நடத்த விசாரணை நீதிமன்றம் அனுமதி அளித்தது. 2015-ம் ஆண்டு விசாரணைகளுக்குப் பின்னர் சோனியா, ராகுல் காந்திக்கு இந்த வழக்கில் ஜாமீன் வழங்கப்பட்டது. ALJ பங்குகளை யங் இந்தியன் பிரைவேட் லிமிடெட் கைப்பற்றியதில் நிதி மோசடி நடைபெற்றதா? என்பது அமலாக்கத்துறையின் விசாரணை.
ALJ நிறுவனத்தின் பங்குகள், யங் இந்தியன் பிரைவேட் லிமிடெட் நிறுவனத்துக்கு வர்த்தக அடிப்படையில்தான் கைமாறின.இதில் முறைகேடுகள் நடந்துள்ளன என்பது அமலாக்கத்துறையின் குற்றச்சாட்டு.
2023-ம் ஆண்டு ரூ.751.9 கோடி மதிப்பிலான யங் இந்தியன் பிரைவேட் லிமிடெட் சொத்துகளை அமலாக்கத்துறை முடக்கியது.
இந்த வழக்கில்தான் தற்போது சோனியா- ராகுல் காந்திக்கு எதிராக குற்றப்பத்திரிகை தாக்கல் செய்யப்பட்டுள்ளது. ஆனால் இது அப்பட்டமான பழிவாங்கும் நடவடிக்கை என கூறி காங்கிரஸ் போராட்டம் நடத்தி வருகிறது.