என்னா தைரியம்! பண்பு! உங்கள் ரசிகையாக இருப்பதில் பெருமை.. வனிதா விஜயகுமார் போட்ட போஸ்ட்!

சென்னை: மனைவியை கேலி செய்த ஆங்கரை ஆஸ்கர் நாயகன் வில் ஸ்மித் ஓங்கி அறைந்ததை வரவேற்ற நடிகை வனிதா விஜயகுமார் நான் உங்கள் ரசிகை என்பதில் பெருமை கொள்வதாக தெரிவித்துள்ளார்.

கடந்த இரு தினங்களுக்கு முன்னர் 94 ஆவது ஆஸ்கர் விருதுகள் வழங்கும் விழா நடைபெற்றது. இந்த நிகழ்ச்சியில் சிறந்த ஆவணப் படத்திற்கான விருதை அறிவிக்க வந்தார் நடிகர் கிறிஸ் ராக்.

அப்போது அவர் வில் ஸ்மித்தின் மனைவி ஜேடா பின்கெட் ஸ்மித்தின் தலைமுடி குறித்து நகைச்சுவையாக பேசினார். ஜேடாவுக்கு உடல்நலப் பிரச்சினை காரணமாக அவரது தலைமுடி உதிர்ந்து கொண்டே வருவதால் அவராகவே மொட்டை அடித்துவிட்டார்.

ராக் கிண்டல்

இந்த நிலையில் தனது மனைவியை ராக் கிண்டல் செய்வதை பார்த்த வில் ஸ்மித்திற்கு கோபம் ஏற்பட்டது. இதையடுத்து கோபமாக மேடைக்கு சென்ற ஸ்மித், கிறிஸ் ராக்கின் கன்னத்தில் அறைந்தார். பின்னர் எனது மனைவியின் பெயரை சொல்வதை நிறுத்துங்கள் என கோபமாக கூறிவிட்டு தனது இருக்கைக்கு சென்றார்.

வில் ஸ்மித்

வில் ஸ்மித் செய்தது சரி என ஒரு தரப்பினரும், ஒரு பொதுவெளியில் ஸ்மித் நடந்து கொண்டது தவறு என்று மற்றொரு தரப்பினரும் கூறி வந்தனர். இந்த சம்பவம் சமூகவலைதளங்களிலும் பெரும் விவாதத்தை கிளப்பியது. இதையடுத்து வில் ஸ்மித் தனது செயலுக்கு வருத்தம் தெரிவித்து ஒரு அறிக்கையை வெளியிட்டிருந்தார்.

உணர்ச்சிவயப்பட்டேன்

அதில் வன்முறை என்பது எந்த வடிவில் இருந்தாலும் விஷமானது மற்றும் அழிவுகரமானது. ஆஸ்கர் அகாதெமி விருதுகளில் எனது செயல் ஏற்றுக் கொள்ள முடியாதது, மன்னிக்க முடியாதது. ஆனால் என் மனைவியின் உடல்நவிலை குறித்த நகைச்சுவையை என்னால் ஏற்க முடியவில்லை. மனம் தாங்க முடியாமல் உணர்ச்சிவயப்பட்டு அடித்துவிட்டேன்.

பகிரங்கமாக மன்னிப்பு

ராக், நான் உங்களிடம் பகிரங்கமாக மன்னிப்பு கேட்டுக் கொள்கிறேன். எனது எல்லையைத் தாண்டிவிட்டேன். நான் செய்த தவறுக்காக வெட்கப்படுகிறேன். அன்பும், கருணையும் நிறைந்த இந்த உலகில் வன்முறைக்கு இடமில்லை. ஒரு அழகான விருது வழங்கும் விழாவில் எனது நடத்தை தவறாக இருந்ததற்கு நான் வருத்தத்தை தெரிவித்துக் கொள்கிறேன் என தெரிவித்தார்.

வனிதா விஜயகுமார் இன்ஸ்டா

வில் ஸ்மித்தின் செயலை விட அவர் மன்னிப்பு கேட்டதை நிறைய பேர் பாராட்டினார். அந்த வகையில் வனிதா விஜயகுமார் தனது இன்ஸ்டாகிராம் பதிவில் வில் ஸ்மித்தின் பதிவை பகிர்ந்து, "தனது மனைவியை காக்கும் தைரியம். அது போல தனது தவறை ஒப்புக் கொள்ளும் பண்பு... நான் உங்களின் மிகப் பெரிய ரசிகையாக இருப்பதில் பெருமைப்படுகிறேன் வில் ஸ்மித்" என கூறியுள்ளார்.

English summary

Vanitha Vijayakumar welcomes Will Smith's assault and his apology and she is proud to be his big fan.