இங்கிலாந்து, பிரான்சுக்கான எண்ணெய் ஏற்றுமதி நிறுத்தம்: ஈரான்

டெக்ரான்: இங்கிலாந்து மற்றும் பிரான்சு நாடுகளுக்கான எண்ணெய் ஏற்றுமதியை நிறுத்துவதாக ஈரான் நாடு அதிகாரப்பூர்வமாக அறிவித்துள்ளது.

பொருளாதாரத் தடை விதிப்பதாக ஐரோப்பிய ஒன்றியம் அறிவித்ததற்கு பதிலடியாக ஈரான் இந்நடவடிக்கையை மேற்கொண்டுள்ளது.

ஈரான் எண்ணெய்வளத்துறை அமைச்சகம் வெளியிட்டுள்ள செய்திக் குறிப்பில், ஜூலை 1-ந் தேதி முதல் இத்தடை முழுமையாக செயல்படுத்தப்படும் என்று அறிவிக்கப்பட்டுள்ளது.

பிரான்சு, இங்கிலாந்து நாடுகளுக்குப் பதில் வேறு நாடுகளுக்கு எண்ணெய் ஏற்றுமதிசெய்யப்படும் என்றும் அதில் கூறப்பட்டுள்ளது.

ஈரானின் இந்த முடிவு மிகப்பெரிய எதிர்விளைவு ஏற்படுத்தாது. ஏனெனில் பிரான்சு கடந்த ஆண்டு தமது இறக்குமதியில் 3 விழுக்காட்டை மட்டுமே ஈரானில் இருந்து பெற்றது. இங்கிலாந்தும் ஈரானிலிருந்து எண்ணெய் இறக்குமதி செய்வதில்லை.

இருப்பினும் எண்ணெய்க்காக ஈரானை அதிகம் சார்ந்திருக்கும் இதர ஐரோப்பிய ஒன்றிய நாடுகளான இத்தாலி, ஸ்பெயின் மற்றும் கிரீஸ் ஆகிய நாடுகளுக்கான முன் எச்சரிக்கை நடவடிக்கை இது.

English summary

Iran has stopped oil sales to France and Britain which has come in retaliation of EU ban on Iranian oil exports which will come into full effect from 1st July.