பெட்ரோல் விலை லிட்டருக்கு ரூ.2 குறைகிறது

By Chakra

Updated: Saturday, September 29, 2012, 11:59 [IST]

Subscribe to Oneindia Tamil

டெல்லி: சர்வதேச சந்தையில் கச்சா எண்ணெய்யின் விலை குறைந்திருப்பதாலும், டாலருக்கு நிகரான ரூபாயின் மதிப்பு அதிகரித்து வருவதாலும் பெட்ரோல் விலை லிட்டருக்கு ரூ.2 குறைக்கப்படும் என்று தெரிகிறது.

இதற்கான அறிவிப்பு அடுத்த சில நாட்களில் வெளியாகலாம்.

இரு வாரங்களுக்கு முன் சர்வதேச சந்தையில் ஒரு பேரல் கச்சா எண்ணெய் விலை 116 டாலராக இருந்தது. அது கடந்த 20ம் தேதி 106.74 டாலராக குறைந்துள்ளது.

மேலும் அமெரிக்க டாலருக்கு நிகரான இந்திய ரூபாயின் மதிப்பு 36 காசு அதிகரித்துள்ளது. இதனால் கச்சா எண்ணெய் இறக்குமதிக்காக செலவாகும் டாலரின் அளவும் குறைந்துள்ளது.

இந்தக் காரணங்களால் பெட்ரோல் விலையை லிட்டருக்கு ரூ.2 குறைப்பது குறித்து மத்திய அரசு ஆலோசித்து வருகிறது. இது குறித்த அறிவிப்பு இன்னும் ஓரிரு நாளில் வெளியாகும் என்று எதிர்பார்க்கப்படுகிறது.