கண்ட்ரோலில் வரும் மின்சார ரயில்.. இது லிஸ்டுலேயே இல்லையே.. சிக்ஸ் அடித்த சென்னை மெட்ரோ.. செம முடிவு
சென்னை: சென்னை மெட்ரோ ரயில் நிறுவனம் (CMRL) பொறுப்பேற்ற பிறகு, மாஸ் ரேபிட் டிரான்ஸிட் சிஸ்டம் (MRTS) சேவையில் ஐந்து நிமிடங்களுக்கு ஒருமுறை ஏர் கண்டிஷன் வசதியுடன் கூடிய மூன்று பெட்டி ரயில்கள் இயக்கப்படவுள்ளன. இதற்கான புரிந்துணர்வு ஒப்பந்தம் (MoU) இந்த ஆண்டு டிசம்பர் மாத இறுதிக்குள் ரயில்வேயுடன் கையெழுத்தாகும் என அரசு வட்டாரங்கள் தெரிவிக்கின்றன.
ஆரம்பகட்டத்தில், 90 புதிய பெட்டிகளை வாங்குவதற்கு அரசு திட்டமிட்டுள்ளது. இதில் 25 மூன்று பெட்டி ரயில்கள் இயக்கப்படும் என்றும், ஐந்து ரயில்கள் பராமரிப்புப் பணிகளுக்காகக் காத்திருப்பில் வைக்கப்படும் என்றும் தகவல்கள் தெரிவிக்கின்றன.
சென்னை மெட்ரோ திட்டம்
சென்னை மெட்ரோ அதிகாரி கூறுகையில், "ஆரம்பத்தில், ரயில்களின் சேவை இடைவெளி பத்து நிமிடங்களாக இருக்கும். பயணிகளின் வசதியைக் கருத்தில் கொண்டு, இது படிப்படியாக ஐந்து நிமிடங்களாகக் குறைக்கப்படும்" என்று குறிப்பிட்டார்.
சென்னை ஒருங்கிணைந்த பெருநகர போக்குவரத்து ஆணையம் (CUMTA) தெற்கு ரயில்வே அதிகாரிகளுடன் வாராந்திர பேச்சுவார்த்தைகளை நடத்தி வருகிறது. "புரிந்துணர்வு ஒப்பந்தத்தின் வரைவு தற்போது ரயில்வேயிடம் உள்ளது. அடுத்த சில வாரங்களுக்குள் தேவையான மாற்றங்கள் செய்யப்படும். டிசம்பர் இறுதிக்குள் இந்த ஒப்பந்தத்தில் கையெழுத்திட அரசு ஆர்வமாக உள்ளது" என்று ஓர் அதிகாரி தெரிவித்தார்.
MRTS அமைப்பை CMRL கையகப்படுத்தும்
MRTS-க்கு எதிர்காலத்தில் எந்த வகையான சிக்னல் மற்றும் இழுவை அமைப்புகள் பயன்படுத்தப்படும் என்பது குறித்து இதுவரை தெளிவான தகவல் இல்லை. 15 ஆண்டுகால காத்திருப்புக்குப் பிறகு, MRTS அமைப்பை CMRL கையகப்படுத்துவதற்கு இரண்டு மாதங்களுக்கு முன்புதான் ரயில்வே ஒப்புதல் அளித்தது.
தூய்மையான மற்றும் வசதியான MRTS நிலையங்கள் மற்றும் ரயில்களை எதிர்பார்க்கும் பயணிகளிடையே இந்தத் திட்டம் மிகுந்த வரவேற்பைப் பெற்றுள்ளது.
சென்னை மெட்ரோ ரயில் நிறுவனம்
புதிய ரயில்கள் 5 நிமிடங்களுக்கு ஒருமுறை இயக்கப்படும் என எதிர்பார்க்கப்படுகிறது. மேலும், சிக்னல் அமைப்பு மெட்ரோ ரயில் இரண்டாம் கட்டத் திட்டத்தில் பயன்படுத்தப்படும் அதே தகவல் தொடர்பு அடிப்படையிலான ரயில் கட்டுப்பாட்டு அமைப்புக்கு மாற்றப்படும். இது செயல்பாட்டுத் திறனை மேம்படுத்தும்.
மாநில அரசு குளிர்சாதனப் பெட்டிகள், சேவைகளின் எண்ணிக்கையை அதிகரிப்பது, மற்றும் ரயில் நிலையங்களை மேம்படுத்துவதன் மூலம் MRTS அமைப்பு ஒரு புதிய சகாப்தத்தை நோக்கி நகரும் எனக் கருதுகிறது. "இந்த மாற்றங்கள் பயணிகளின் வசதியை மேம்படுத்தி, முழு சூழலையும் மாற்றும். மேலும், இதன் மூலம் கிடைக்கும் வருவாயைப் பயன்படுத்தி நிதி திரட்ட முடியும். இது நிறைவடைய சுமார் இரண்டு வருடங்கள் ஆகும்" என்று ஒரு ஆதாரம் தெரிவித்தது. பயணக் கட்டண திருத்தம் குறித்த கேள்விக்கு, பின்னர் முடிவெடுக்கப்படும் என அதிகாரிகள் தெரிவித்தனர்.
அடுத்த இரண்டு ஆண்டுகளுக்கு, ரயில்வே நிர்வாகம் MRTS சேவைகளைத் தொடர்ந்து இயக்கும். CMRL முழுமையான கட்டுப்பாட்டை ஏற்கும் போது பயணக் கட்டணங்கள் இறுதி செய்யப்படும். தமிழ்நாடு அரசு மற்றும் ரயில்வே துறைக்கு இடையிலான புரிந்துணர்வு ஒப்பந்தம் (MoU) தற்போது தயாராகி வருகிறது.
இந்த ஒப்பந்தத்தின் முதல் வரைவு நிறைவடைந்து, ரயில்வேயுடனான முதற்கட்டப் பேச்சுவார்த்தைகள் நடைபெற்று வருகின்றன. விரைவில் ஒருமித்த கருத்து எட்டப்பட்டால், செப்டம்பர் மாத இறுதிக்குள் புரிந்துணர்வு ஒப்பந்தம் கையெழுத்தாகும் என அதிகாரிகள் எதிர்பார்க்கின்றனர். CMRL, MRTS-ஐ கையகப்படுத்துவது குறித்துப் பல பயணிகள் மகிழ்ச்சி தெரிவித்துள்ள நிலையில், கட்டணங்கள் நியாயமானதாக இருக்க வேண்டும் என அவர்கள் வலியுறுத்தியுள்ளனர்.
Click it and Unblock the Notifications
Sign in with Google