Chennai One: இன்று அறிமுகம்.. சென்னை ஒன் செயலி.. இனி பஸ், ரயில், மெட்ரோவில்.. எளிதாக பயணிக்கலாம்

Updated: Monday, September 22, 2025, 16:00 [IST]

Subscribe to Oneindia Tamil

சென்னை: சென்னை நகரில் பொதுப் போக்குவரத்துச் சேவைகளைப் பயன்படுத்துவோர் இனி எளிதாகவும் வசதியாகவும் பயணிக்க ஒரு புதிய செயலி அறிமுகம் செய்யப்பட்டுள்ளது. சென்னை ஒருங்கிணைந்த பெருநகரப் போக்குவரத்து ஆணையம் (CUMTA) உருவாக்கியுள்ள 'Chennai One - சென்னை ஒன்' என்ற மொபைல் செயலி, பல்வேறு போக்குவரத்து பிரிவுகளில் ஒரே பாஸைப் பயன்படுத்த உதவும்.

இன்று முதல்வர் மு.க. ஸ்டாலின் இந்த 'Chennai One - சென்னை ஒன்' செயலியைத் தொடங்கி வைத்தார். நீண்ட காலமாக உருவாக்கப்பட்டு வந்த இந்தச் செயலி, சென்னை மெட்ரோ ரயில் மற்றும் புறநகர் ரயில்களின் (மாஸ் ரேபிட் டிரான்சிட் சிஸ்டம் உட்பட) டிஜிட்டல் டிக்கெட் தளங்களையும், பெருநகரப் போக்குவரத்துக் கழகத்தின் (MTC) மின்னணு டிக்கெட் அமைப்பையும் ஒருங்கிணைத்து உருவாக்கப்பட்டுள்ளது.

'Chennai One - சென்னை ஒன்' செயலி

பயணிகள் இனி ஒரே செயலியின் மூலம் மூன்று முக்கிய பொதுப் போக்குவரத்து முறைகளிலும் பயணம் செய்யலாம். வெவ்வேறு மொபைல் செயலிகளைப் பதிவிறக்கவோ அல்லது பல ஸ்மார்ட் கார்டுகளை எடுத்துச் செல்லவோ தேவையில்லை. 'சென்னை பெருநகரப் பகுதியில் பயணத் திட்டமிடுதலுடன் கூடிய ஒருங்கிணைந்த டிக்கெட்' என்ற ஆய்வின் முடிவுகளின் அடிப்படையில் 'சென்னை ஒன்' செயலி உருவாக்கப்பட்டுள்ளது. நாட்டின் முதல் ஒருங்கிணைந்த போக்குவரத்துச் செயலியாக இது அமையவுள்ளது என அதிகாரிகள் தெரிவிக்கின்றனர்.

இந்தச் செயலி, மூன்று பொதுப் போக்குவரத்து முறைகளை ஒருங்கிணைப்பதோடு, தேவைப்பட்டால் தனியார் பயணச் சேவை வழங்குநர்களின் தகவல்களையும் சேர்த்து, மலிவான மற்றும் விரைவான பயண வழிகளைத் தேடும் வசதியையும் வழங்குகிறது.

CUMTA, மெட்ரோ ரயில் மற்றும் தெற்கு ரயில்வேயின் புறநகர் ரயில்களுக்கு டிஜிட்டல் டிக்கெட் அமைப்புகள் ஏற்கனவே இருந்தாலும், MTC-க்காக ஒரு புதிய டிஜிட்டல் டிக்கெட் அமைப்பு இந்த மொபைல் செயலியின் ஒரு பகுதியாக உருவாக்கப்பட்டுள்ளதாகக் குறிப்பிட்டு உள்ளது.

'Chennai One - சென்னை ஒன்' செயலி எப்படி இயங்கும்

இந்த டிக்கெட் அமைப்பு இந்திய ரயில்வேயின் முன்பதிவில்லா டிக்கெட் அமைப்புடன் (UTS) ஒருங்கிணைக்கப்பட்டுள்ளது. இது ரயில்வே தகவல் அமைப்பு மையத்தால் (CRIS) பராமரிக்கப்படும். புரிந்துணர்வு ஒப்பந்தம் கையெழுத்தானவுடன், டிஜிட்டல் செயலி பிழைகள் இல்லாமல் சீராக இயங்குவதை உறுதிசெய்யும் வகையில் சோதனை செய்யப்படும்.

சுமார் 6,000 பேருந்து நிறுத்தங்கள், 650 பேருந்து வழித்தடங்கள் மற்றும் MTC-யின் ஏறத்தாழ 3,500 பேருந்துகள் பற்றிய தகவல்களுடன், இந்தச் செயலி துல்லியமாக செயல்பட பல உள்ளீடுகள் பயன்படுத்தப்பட்டுள்ளது.

ஒருங்கிணைந்த டிக்கெட் முறை அறிமுகப்படுத்தப்படுவதற்கு முன் CUMTA நடத்திய ஆய்வில், சென்னையில் தினமும் சுமார் 47 லட்சம் பயணிகள் பல்வேறு பொதுப் போக்குவரத்து முறைகளைப் பயன்படுத்துவது தெரியவந்தது. MTC, தெற்கு ரயில்வே மற்றும் மெட்ரோ ரயில் ஆகிய மூன்று முக்கிய சேவைகளும் பொதுவான தூரம் சார்ந்த கட்டண முறையைக் கொண்டுள்ளன.

'Chennai One - சென்னை ஒன்' ஒருங்கிணைந்த வசதி

மாநில அரசின் போக்குவரத்து நிறுவனங்களான MTC மற்றும் மெட்ரோ ரயில், 'சிங்காரச் சென்னை' என்ற பொதுவான பயண அட்டை மூலம் சமீப மாதங்களாக ஒருங்கிணைந்துள்ளன. ஆனால், புறநகர் ரயில்கள் UTS-ன் தனிப்பட்ட டிஜிட்டல் டிக்கெட் முறையைப் பயன்படுத்துகின்றன. MTC, சமீபத்தில் UPI மூலம் டிஜிட்டல் டிக்கெட் வசதியை அறிமுகப்படுத்தியதில் இருந்து, தினமும் சுமார் ஒரு லட்சம் டிஜிட்டல் பரிவர்த்தனைகளை மின்னணு டிக்கெட் இயந்திரங்கள் மூலம் மேற்கொள்கிறது.

CUMTA பொதுவான டிஜிட்டல் டிக்கெட் முறையை கொண்டு வந்தாலும், பொதுப் போக்குவரத்தைப் பயன்படுத்த பயணிகளை ஊக்குவிக்க ஒரு பொதுவான கட்டண முறை மிகவும் கவர்ச்சிகரமானதாக இருக்கும் எனப் போக்குவரத்து ஆர்வலர்கள் வலியுறுத்துகின்றனர். டிஜிட்டல் பரிவர்த்தனைகளே எதிர்காலம் என்றும், CUMTA ஒரு பொதுவான டிக்கெட் முறையை உருவாக்கியுள்ள நிலையில், கட்டண ஒருங்கிணைப்பு அவசியமான அடுத்த கட்டம் என்று கூறப்படுகிறது.

அனைத்து பொதுப் போக்குவரத்து முறைகளின் கட்டண அமைப்பும் தூரத்தின் அடிப்படையிலானது என்பதைப் போக்குவரத்து ஆர்வலர்கள் சுட்டிக்காட்டுகின்றனர். எனவே, நீண்ட தூரப் பயணங்களுக்குப் பொதுவான கட்டண முறை உருவாக்கப்பட வேண்டும் என அவர்கள் கூறுகின்றனர்.

தினமும் சுமார் 35 லட்சம் பயணிகள் MTC பேருந்துகளையும், ஒன்பது லட்சம் பேர் புறநகர் ரயில்களையும், மூன்று லட்சம் பேர் மெட்ரோ ரயில் சேவைகளையும் பயன்படுத்துவதாகக் கணக்குகள் தெரிவிக்கின்றன. மும்பை மற்றும் பெங்களூரில் உள்ள ஒருங்கிணைந்த டிக்கெட் முறை பேருந்து மற்றும் மெட்ரோ ரயில்களுக்கு மட்டுமே மொபைல் செயலி மூலம் பயணிக்க அனுமதிக்கும் நிலையில், சென்னை தனது 'சேவையாக இயக்கம் (MaaS)' மூலம் முழுமையான ஒருங்கிணைந்த அமைப்பை, நாட்டிலேயே முதல்முறையாக அறிமுகப்படுத்த உள்ளது.