வாரிசு அரசியல் பற்றி பேசும் வளர்ப்பு மகன்.. கட்சியில் சேர்ந்ததுமே பெரிய பதவி, சீட்! சீண்டிய காயத்ரி!
சென்னை : ஒருவருக்கு கட்சியில் சேர்ந்தவுடன் எம்எல்ஏ சீட், கட்சியில் சேர்ந்தவுடன் மாநில துணைத்தலைவர் பதவி, கட்சியில் சேர்ந்தவுடன் சீட் பங்கீடு/ கூட்டணி என்று பேச அதிகாரம் கொடுக்கப்பட்ட 'வளர்ப்பு மகன்' வாரிசு அரசியல் பற்றி பேசுகிறார் என பாஜகவில் இருந்து விலகிய காயத்ரி ரகுராம் கடுமையாக விமர்சித்துள்ளார்.
வாரிசு அரசியல் என்ற குற்றச்சாட்டை ஏற்றுக் கொள்கிறோம். எந்த உழைப்பும் இல்லாமல் நேரடியாக தலைவர் ஆனது எப்படி? வளர்ப்பு மகன் அரசியலும் வாரிசு அரசியல் தான் என காயத்ரி ரகுராம் சீண்டியுள்ளார்.
பாஜக மாநிலத் தலைவர் அண்னாமலை மீது கடுமையான குற்றச்சாட்டுகளை முன்வைத்து கட்சியில் இருந்து வெளியேறிய காயத்ரி ரகுராம், தொடர்ந்து விமர்சித்து ட்விட்டரில் பதிவிட்டு வருகிறார்.
காயத்ரி ஆத்திரம்
தமிழக பாஜகவில் வெளிநாடு மற்றும் அண்டை மாநில தமிழ் வளர்ச்சிப் பிரிவின் தலைவராக இருந்த காயத்ரி ரகுராம், தமிழக பாஜக தலைவர் அண்ணாமலை உடனான கடும் மோதலைத் தொடர்ந்து அவர் மீது பல்வேறு கடுமையான குற்றச்சாட்டுகளைத் தெரிவித்து, பாஜகவில் இருந்து விலகுவதாக அறிவித்தார். காயத்ரி ரகுராம் அண்ணாமலை மீது பல்வேறு பகீர் குற்றச்சாட்டுகளை முன்வைத்தது தமிழக பாஜகவில் பெரும் அதிர்வலைகளை ஏற்படுத்தியது. இதனால் அண்ணாமலையின் ஆதரவாளர்கள் காயத்ரி ரகுராமை கடுமையாக விமர்சித்து சமூக வலைதளங்களில் பதிவிட்டதால் கோபமடைந்தார் காயத்ரி.
அண்ணாமலைக்கு எதிராக
அண்ணாமலை தலைமையிலான வார் ரூமில் இருந்து மிகவும் மோசமான கேவலமான தனிப்பட்ட தாக்குதல்களை நாங்கள் சந்திக்கிறோம் எனத் தெரிவித்தார் காயத்ரி ரகுராம். கட்சியில் இருந்து விலகுவதாக அறிவித்த காயத்ரி ரகுராம், கடந்த சில வாரங்களாக அண்ணாமலைக்கு எதிராக கடுமையான விமர்சனங்களை முன்வைத்து வருகிறார். அண்ணாமலையின் ஒவ்வொரு கருத்துக்கும் தனது ட்விட்டர் பக்கத்தில் தொடர்ச்சியாக பதிலடி கொடுத்து வருகிறார் காயத்ரி ரகுராம். காயத்ரியின் ட்விட்டர் பதிவுகளுக்கு அண்ணாமலை ஆதரவாளர்கள் திரண்டு வந்து வார்த்தைகளால் தாக்குவதும் தொடர்ந்து வருகிறது.
காயத்ரி மீண்டும் தாக்கு
இந்நிலையில், திமுகவின் வாரிசு அரசியலைப் பற்றி பாஜக மாநிலத் தலைவர் அண்ணாமலை கடுமையாக விமர்சித்து வரும் நிலையில், பாஜகவில் இருந்து வெளியேறிய காயத்ரி ரகுராம் அண்ணாமலையை கடுமையாக விமர்சித்துள்ளார். வளர்ப்பு மகன், வாரிசு அரசியலை விமர்சிக்கிறார் என அண்ணாமலையைச் சீண்டியுள்ளார் காயத்ரி ரகுராம். இதற்கு அண்ணாமலையின் ஆதரவாளர்களும் பதிலடி கொடுத்து வருகின்றனர்.
கட்சியில் சேர்ந்ததுமே
இன்று காயத்ரி ரகுராம் இன்று வெளியிட்டுள்ள ட்விட்டர் பதிவுகளில், "வேலையும் புகழும் கர்நாடகாவில் மட்டுமே. ஒருவருக்கு கட்சியில் சேர்ந்தவுடன் எம்எல்ஏ சீட்டு, கட்சியில் சேர்ந்தவுடன் மாநில துணைத்தலைவர், கட்சியில் சேர்ந்தவுடன் சீட் பங்கீடு/ கூட்டணி என்று பேச பதவி கொடுக்கப்பட்ட தத்தெடுக்கப்பட்ட மகன் மட்டுமே இவ்வளவு சுயநலவாதியாக இருக்க முடியும். அப்படியானால், கட்சியில் உள்ள மற்ற அர்ப்பணிப்புடன் கூடிய கடின உழைப்பாளிகளுக்கு என்ன மரியாதை? சுய விளம்பரத்திற்காக இவ்வளவு பணம் கொடுத்துவிட்டு, ஹனிட்ராப் மூலம் மற்றவர்களுக்கு தீங்கு செய்த, தவறான செய்திகளைப் பரப்புவதற்கும் மற்றவர்களைப் பற்றி மோசமாகப் பேசுவதற்கும் அதிகாரம் கொடுத்த பிறகு அவர் மீது எந்த நடவடிக்கையும் எடுக்கப்படவில்லை.
வளர்ப்பு மகன்
இன்னும் வார் ரூம் சுய விளம்பரம் நடக்கிறது. சாதாரண விவசாயிக்கு இவ்வளவு பணம் எங்கிருந்து வருகிறது? வளர்ப்பு மகனுக்கு மட்டுமே இவ்வளவு ஆதரவு உள்ளது. மற்றவர்கள் என்ன அனாதையா? தமிழ்நாட்டில் எந்த அனுபவமும் இல்லை, தமிழ்நாட்டின் மீது அன்பும் இல்லை, தமிழன் என்ற பெருமையும் இல்லை. இந்த பெருமைக்குரிய கன்னடிகாவிற்கு. அவர் வளர்ப்பு மகன் என்பதால் எல்லாம் எளிதாக இருந்தது. நான் நீதிக்காக குரல் கொடுத்தது, அனைத்து பெண்களுக்கும் பாதிக்கப்பட்ட தலைவர்களுக்கும் தான்.
நல்ல நகைச்சுவை
ஏனெனில் இப்போது வளர்ப்பு மகன் வாரிசு அரசியலைப் பற்றி பேசுகிறார். இது நகைச்சுவையாக இருக்கிறது. வாரிசு அரசியல் என்ற குற்றச்சாட்டை ஏற்றுக் கொள்கிறோம். எந்த உழைப்பும் இல்லாமல் நேரடியாக தலைவர் ஆனது எப்படி? வளர்ப்பு மகன் அரசியலும் வாரிசு அரசியல் தான். ஒருவரைக் காப்பாற்ற, அனைவரும் ஹனி ட்ராப்பில் சிக்கிக் கொள்கிறார்கள். அனுபவம் இல்லாததால் களத்தில் எந்த பலத்தையும் காட்டவில்லை. ஆனால் மண்டல தலைவர் மற்றும் மாவட்ட தலைவர்கள் அனைவரையும் "உன்னை பதவியை விட்டு தூக்கிடுவேன்" மிரட்டல் விடுக்கிறார்" என விமர்சித்துப் பதிவிட்டுள்ளார் காயத்ரி ரகுராம்.
Click it and Unblock the Notifications
Sign in with Google