“டூ டூ டூ டூ டூ டூ டுட்டு டுட்டு டூ ஐ லவ் யூ டூ” ... தேதி கேட்டா பாட்டாவே பாடலாம்!

இன்றைய தேதியில் இரண்டுகள் மட்டுமே இருப்பதை அரிய நாளாக மக்கள் கொண்டாடி வருகின்றனர்.

சென்னை: இன்றைக்கு யாராவது உங்களிடம் என்ன தேதி எனக் கேட்டால்.. "டூ டூ டூ டூ டூ டூ டுட்டு டுட்டு டூ ஐ லவ் யூ டூ "... என்ற பாடலைப் பாடலாம். காரணம் இன்றைய தேதி 22.02.2022.

ஒவ்வொரு நாளுமே சிறப்பான நாள்தான். ஆனால் ஒரு சில நாட்கள் ஏதாவது ஒரு காரணத்தினால் மேலும் சிறப்பாகி விடுகின்றன. இன்றைய நாளும் அப்படிப்பட்ட ஒன்று தான்.

தினமும் காலண்டரில் தேதியை மறக்காமல் பார்ப்பவர் நீங்கள் என்றால், நாங்கள் சொல்லாமலேயே இன்றைய நாளின் சிறப்பு உங்களுக்குத் தெரிந்திருக்கும். ஆம், இன்று தேதி, மாதம், வருடம் என எல்லாவற்றிலுமே இரண்டு இடம் பெற்றுள்ளது. அதாவது 22.02.2022. இரண்டாயிரத்து இருபத்தி இரண்டாவது வருடம், இரண்டாம் மாதம், இருபத்தி இரண்டாவது தேதி.

அதோடு, இந்த வரிசையை அப்படியே மாற்றிப் போட்டாலும் தேதி மாறாது என்பதும் மற்றொரு சிறப்பு.

கொண்டாட்டமான நாள்

ஒவ்வொரு ஆண்டுமே இப்படி ஒரு நாள் எல்லாமுமே ஒரே மாதிரி வருவது போல் அமைந்து விடும். அந்த நாளை சிலர் தங்களுக்கு அதிர்ஷ்டமான நாளாகக் கருதி, முக்கியமான வேலைகளைச் செய்வதற்கு என ஒதுக்கி விடுவார்கள். சில பள்ளிகளில் இந்த அரிய நாளுக்கென தனி சிறப்பு நிகழ்ச்சிகளையும் ஏற்பாடு செய்துள்ளனர்.

வாழ்த்து

சமீபகாலமாக சமூகவலைதளங்களின் ஆதிக்கம் அதிகரித்து வரும் நிலையில், அதில் ஸ்டேட்டஸ் போட மட்டும் இது போன்ற நாட்களைப் பயன்படுத்திக் கொள்பவர்களும் உண்டு. சிலர் ஒரு படி மேலே போய் இந்த சிறபான நாளைக் கொண்டாடுங்கள் என வாழ்த்துக்களை எல்லாம் அனுப்புகிறார்கள்.

வித்தியாசம்

இது போன்றவற்றில் நம்பிக்கை இல்லாதவர்களுக்கோ மற்ற நாளைப் போல, இதுவும் 24 மணி நேரங்கள் கொண்ட வழக்கமான ஒரு நாள்தான் என கடந்து போய் விடுகிறார்கள். எது எப்படியோ இன்றைக்கு தேதியைச் சொல்லும் போது, நிச்சயம் அது வித்தியாசமாகத்தான் இருக்கும்.

பாட்டாவே பாடலாம்

இந்த அரிய நாளை மற்றவர்கள் கேட்கும் போது, நீங்கள் கமல் ரசிகர் என்றால், அன்பே சிவம் படத்தில் வரும் 'டூடூடூ..' என்ற டயலாக் மாதிரி கூறலாம். இல்லையென்றால் காத்து வாக்குல ரெண்டு காதல் பட பாடல் மாதிரி, "டூ டூ டூ டூ டூ டூ டுட்டு டுட்டு டூ ஐ லவ் யூ டூ ..." என பாட்டாகக்கூட பாடலாம்.

English summary

As, today 22.02.2022, the numbers are all the same two, people celebrate it as a special day.