அடிக்கப் பாய்ந்த நிர்வாகி.. விழுந்து விழுந்து சிரித்த அகிலேஷ் யாதவ்.. உ.பி. தேர்தலில் புது பரபரப்பு

லக்னோ: உத்தரபிரதேச தேர்தல் பிரசாரத்தில் சமாஜ்வாதி கட்சி நிர்வாகியை அடிக்கச் சென்றார் அக்கட்சியின் பொதுச்செயலாளர். அதை அகிலேஷ் யாதவ் பார்த்து சிரிக்கும் வீடியோ வைரலாகி வருகிறது.

உத்தரப்பிரதேசம், பஞ்சாப், உத்தரகண்ட், மணிப்பூர், கோவா ஆகிய 5 மாநிலங்களுக்கான தேர்தல் விரைவில் நடைபெறவுள்ளன. இதற்கான வேலைகளை அனைத்து மாநில கட்சிகளும் துரிதமாக செயல்படுத்தி வருகின்றன.

உத்தரப்பிரதேசத்தில் 403 தொகுதிகளுக்குமான சட்டசபைத் தேர்தல் வரும் பிப்ரவரி 10-ஆம் தேதி முதல் மாா்ச் 7-ஆம் தேதி வரை 7 கட்டங்களாக நடைபெறவுள்ளது. மார்ச் 10ம் தேதி வாக்கு எண்ணிக்கை நடைபெறுகிறது.

உத்தரப்பிரதேசம்

உத்தரபிரதேசத்தில் தேர்தல் நெருங்கி வரும் நிலையில், அங்கு அனைத்துக் கட்சிகளும் தீவிர பிரச்சாரத்தில் ஈடுபட்டு வருகின்றன. பிரசாரத்தின் தீவிரம் ஒருபுறம் அதிகரிக்க அதிகரிக்க, மறுபுறம் அவற்றில் பல சுவாரசியமான நிகழ்வுகளும் அரங்கேறி வருகின்றன. பாஜக, சமாஜ்வாதி கட்சி, காங்கிரஸ், பகுஜன் சமாஜ் என அனைத்துக் கட்சிகளும் தீவிர பிரசாரத்தில் ஈடுபட்டுள்ளன.

சமாஜ்வாதி பிரசாரம்

ஆக்ரா மாவட்டத்தில் உள்ள பாஹ் தொகுதியில் சமாஜ்வாதி சார்பில் தேர்தல் பிரசாரம் நடைபெற்றது.அந்த பிரசாரத்தில் சமாஜ்வாதி கட்சித் தலைவர் அகிலேஷ் யாதவ் கலந்து கொண்டார். தேர்தல் பிரசாரம் ஆரம்பித்து, மேடையில் தலைவர்கள் பேசிக் கொண்டிருந்தார்கள். அப்போது, சமாஜ்வாதி பொதுச் செயலாளர் ராம்ஜிலால் சுமன் பேசிக் கொண்டிருக்கும் போது, மேடையில் அமர்ந்திருந்த அகிலேஷ் யாதவிடம் கட்சியின் ஆக்ரா மாவட்ட தலைவர் ஜிதேந்திர வர்மா உரையாடிக் கொண்டிருந்தார்.

அடிக்கப் பாய்ந்தார்

இதனை கவனித்த ராம்ஜிலால் சுமன், திடீரென பேச்சை நிறுத்தினார். அதையடுத்து அகிலேஷ் யாதவுடன் பேசிக் கொண்டிருந்த‌ ஜிதேந்திர வர்மாவை அடிக்கப் பாய்ந்தார் ராம்ஜிலால். இதனால் அங்கு என்ன நடந்தது என எல்லோரும் கவனிக்க சில நொடிகள் அகிலேஷ் யாதவ் உட்பட மேடையில் இருந்த அனைவரும் அதிர்ச்சியடைந்தனர்.

சிரிப்பலை

ராம்ஜிலால் அடிக்காமல் கையை மட்டும் உயர்த்திவிட்டு, வர்மாவை அடிக்காமல் மீண்டும் பேச சென்றார். இதனைக் கண்ட அகிலேஷ் யாதவ் சிரிப்பை அடக்க முடியாமல் விழுந்து விழுந்து சிரித்தார். இதைப்பார்த்து பிரசாரத்தைப் பார்க்க வந்த அனைவரும் சிரித்தனர். அகிலேஷ் யாதவ் தேர்தல் பிரசார மேடையில் சிரித்த வீடியோ தற்போது வைரலாகி வருகிறது.

English summary

The general secretary of the Samajwadi Party went on a rampage during the Uttar Pradesh election campaign. The video of Akhilesh Yadav laughing at it is going viral.