தேர்தல் 2026

2026ம் ஆண்டில் இந்தியாவில் 4 மாநிலங்கள் மற்றும் ஒரு யூனியன் பிரதேசத்தில் சட்டசபையின் பதவிக்காலம் நிறைவடைகிறது. தமிழ்நாடு, கேரளா, மேற்கு வங்கம், அசாம் மாநிலங்களுக்கும் புதுச்சேரி யூனியன் பிரதேசத்திலும் சட்டசபை பதவிக்காலம் நிறைவடைகிறது. இந்த மாநிலங்களுக்கு மார்ச்- ஏப்ரல் காலகட்டத்தில் தேர்தல் நடைபெறுகிறது.

தமிழ்நாட்டில் ஸ்டாலின் தலைமையிலான திமுக ஆட்சியில் உள்ளது. அதிமுக பொதுச் செயலாளர் எடப்பாடி பழனிசாமி எதிர்க்கட்சித் தலைவராக இருக்கிறார். கடந்த 2021 தேர்தலில் திமுக கூட்டணி 159 தொகுதிகளில் வென்றது. திமுக மட்டும் 133 தொகுதிகளில் வென்று ஆட்சியைப் பிடித்தது. அந்தத் தேர்தலில் அதிமுக கூட்டணி 75 இடங்களில் மட்டுமே வென்றது. அதிமுக 66 இடங்களில் வென்று பிரதான எதிர்க்கட்சியாக உருவெடுத்தது. 2026 திமுக கூட்டணி, என்டிஏ கூட்டணி, தவெக, நாம் தமிழர் என 4 முனைப் போட்டி உருவாகி இருக்கிறது.

புதுச்சேரி யூனியன் பிரதேசத்திலும் தேர்தல் நடைபெற உள்ளது. அங்கு என் ரங்கசாமி தலைமையிலான என்டிஏ கூட்டணி ஆட்சி நடந்து வருகிறது. அங்கு மொத்தம் 30 தொகுதிகள் உள்ள நிலையில், கடந்த 2021 தேர்தலில் என்டிஏ கூட்டணி 16 இடங்களில் வென்றன. யுபிஏ 9 இடங்களில் வென்றது. சுயேச்சைகள் 5 இடங்களில் வென்றன. இந்த முறையும் அங்கு ரங்கசாமி தலைமையிலான என்டிஏ vs காங்கிரஸ்- திமுகவின் யுபிஏ இடையே போட்டி நிலவுகிறது.

இந்தியாவில் இடதுசாரிகள் இப்போது வலிமையாக இருக்கும் மாநிலங்களில் ஒன்று கேரளா.. இங்கு இடதுசாரிகளுக்கும் காங்கிரஸ் கட்சிக்கும் இடையே தான் எப்போதும் போட்டி இருக்கும். 2021 தேர்தலில் அங்குள்ள 144 தொகுதிகளில் இடதுசாரிகள் கூட்டணி 99 இடங்களில் வென்று ஆட்சியைத் தக்கவைத்தது. பிரனாயி விஜயன் 2வது முறையாக முதல்வராகப் பதவியேற்றார். காங்கிரஸ் கூட்டணியால் அந்த 41 இடங்களில் மட்டுமே வெல்ல முடிந்தது. இந்த முறை அங்கு பாஜக ஓரளவுக்கு வளர்ந்து இருந்தாலும் கூட இடதுசாரிகளுக்கும் காங்கிரஸுக்கும் இடையே தான் நேரடிப் போட்டி நிலவுகிறது.

மேற்கு வங்கத்தில் கடந்த 15 ஆண்டுகளாகவே மம்தா தான் முதல்வராக இருக்கிறார். ஒரு காலத்தில் அங்கு வலிமையாக இருந்த இடதுசாரிகளும் காங்கிரஸும் வலுவிழந்துவிட்டன. இப்போது அங்குத் திரிணாமுல் காங்கிரஸுக்கும் பாஜகவுக்கும் இடையே தான் நேரடிப் போட்டி இருக்கிறது. கடந்த 2021 தேர்தலில் மேற்கு வங்கத்தில் மொத்தமிருக்கும் 294 தொகுதிகளில் 215 இடங்களை கைப்பற்றி திரிணாமுல் பிரம்மாண்ட வெற்றியைப் பதிவு செய்தது. இடதுசாரிகள், காங்கிரஸை ஓவட்டேக் செய்தாலும் கூட பாஜகவால் 77 இடங்களை மட்டுமே வெல்ல முடிந்தது. இந்த முறை அங்குத் திரிணாமுல் vs பாஜக என்றே களம் அமைகிறது.

வடகிழக்கு மாநிலங்களில் ஒன்றான அசாமிலும் இந்தாண்டு தேர்தல் நடக்கிறது. அங்கு சர்பானந்தா சோனோவால் தலைமையிலான பாஜக கூட்டணி ஆட்சியில் உள்ளது. கடந்த 2021 தேர்தலில் அசாமில் பாஜக- காங்கிரஸ் இடையே கடும் போட்டி நிலவியது. அங்குள்ள 126 தொகுதிகளில் என்டிஏ 75 இடங்களில் வென்றது. காங்கிரஸ் கூட்டணி 50 இடங்களில் வென்றது. இந்த முறையும் அங்கு என்டிஏ மற்றும் காங்கிரஸ் கூட்டணிக்கு இடையே தான் போட்டி நிலவுகிறது.

ஐந்து தேர்தல் தொடர்பான அனைத்து தகவல்களையும் உடனுக்கு உடன் தெரிந்து கொள்ள எங்களுடன் இணைந்து இருங்கள்..!