இல்லத்தரசிகளுக்கு ரூ. 1000 அறிவிப்பு எப்போது... மு.க ஸ்டாலின் தலைமையில் இன்று அமைச்சரவைக் கூட்டம்

முதல்வர் மு.க.ஸ்டாலின் தலைமையில் தமிழக அமைச்சரவை கூட்டம் இன்று நடைபெறுகிறது.

Updated: Saturday, March 5, 2022, 15:42 [IST]

Subscribe to Oneindia Tamil

சென்னை: தலைமைச் செயலகத்தில் முதல்வர் மு.க.ஸ்டாலின் தலைமையில் இன்று மாலை அமைச்சரவைக்கூட்டம் நடைபெற உள்ளது. இந்த கூட்டத்தில் , குடும்பத் தலைவிகளுக்கு மாதம் ஆயிரம் ரூபாய் வழங்கும் திட்டம் குறித்து ஆலோசிக்கப்படும் என தகவல்கள் தெரிவிக்கின்றன.

நகர்ப்புற உள்ளாட்சித் தேர்தல் நிறைவடைந்து விட்டது. திமுக கூட்டணி கட்சிகள் அமோக வெற்றி பெற்று கவுன்சிலர்கள் பதவியேற்றுள்ளனர். மேயர், துணை மேயர், நகராட்சி தலைவர், பேரூராட்சித் தலைவர் பதவிகளுக்கான மறைமுகத் தேர்தல் நடைபெற்றுள்ளது.

கூட்டணி கட்சிகளுக்கு ஒதுக்கிய இடங்களிலும் பெரும்பாலான பதவிகளில் திமுகவினரே வெற்றி பெற்றுள்ளனர். இது சர்ச்சையை ஏற்படுத்தியுள்ளது. கூட்டணி கட்சியினருக்கு ஒதுக்கப்பட்ட இடங்களில் பதவியில் அமர்ந்த அனைவரும் ராஜினாமா செய்ய வேண்டும் என்று முதல்வர் மு.க ஸ்டாலின் அறிவித்துள்ளார்.

அமைச்சரவைக்கூட்டம்

இந்த நிலையில் இன்றைய தினம் முதல்வர் மு.க ஸ்டாலின் தலைமையில் அமைச்சரவைக் கூட்டம் நடைபெற உள்ளது. தலைமைச் செயலகத்தில் நடைபெற உள்ள இந்த கூட்டத்தில், வரும் நிதியாண்டிற்கான நிதி நிலை வரைவு அறிக்கைக்கு ஒப்புதல் வழங்குவது பற்றியும் கூட்டத்தில் ஆலோசனை நடத்தப்பட உள்ளது. மத்திய அரசிடம் இருந்து தமிழக மின்சார வாரியத்திற்கு 13, 200 கோடி ரூபாய் நிதி பெறுவது குறித்தும் அமைச்சரவை கூட்டத்தில் விவாதிக்கப்படும் என கூறப்படுகிறது.

தமிழக பட்ஜெட்

மார்ச் மூன்றாவது வாரத்தில் தமிழ்நாட்டில் பட்ஜெட் கூட்டத் தொடர் நடைபெறவுள்ளதாக தகவல் வெளியாகியுள்ளது. தமிழக அரசின் பட்ஜெட் 18ஆம் தேதியும், வேளாண்மை பட்ஜெட் 19ஆம் தேதியும் தாக்கல் ஆக வாய்ப்பு உள்ளதாக தகவல்கள் தெரிவிக்கின்றன. திமுக தேர்தல் அறிக்கையில் குறிப்பிடப்பட்ட குடும்பத் தலைவிகளுக்கு மாதம் 1000 ரூபாய் உள்ளிட்ட வாக்குறுதிகள் நிறைவேற்றப்படவில்லை. இந்த பட்ஜெட் கூட்டத் தொடரில் அதற்கான அறிவிப்புகள் வெளியாகும் என கூறப்படுகிறது.

ரூ. 1000 உரிமைத் தொகை

உள்ளாட்சித் தேர்தலில் திமுக பெரும் வெற்றியைப் பெற்றுள்ள நிலையில் முதல்வர் மு.க.ஸ்டாலின் பெண்களை மகிழ்விக்கும் பல்வேறு அறிவிப்புகளை வெளியிடுவார் என்ற எதிர்பார்ப்பு உருவாகியுள்ளது. அதில் முக்கியமானது இல்லத்தரசிகளுக்கு ரூ. 1000 உரிமைத் தொகையாகும்.

பெண்களைக் கவரும் பட்ஜெட்

அதே போல கேஸ் மானியம் குறித்த அறிவிப்பும் வெளியாக வாய்ப்பு உள்ளதாக தகவல்கள் தெரிவிக்கின்றன. பட்ஜெட் கூட்டத் தொடரில் என்னென்ன அறிவிப்புகளை வெளியிடலாம் என்பது குறித்த ஆலோசனையும் இன்று நடைபெறும் அமைச்சரவைக் கூட்டத்தில் விவாதிக்கப்பட வாய்ப்புள்ளதாக கூறப்படுகிறது. இந்த பட்ஜெட் பெண்களை மகிழ்விக்கும் பட்ஜெட் ஆக இருக்கும் என்று தலைமைச் செயலக வட்டார தகவல்கள் தெரிவிக்கின்றன.