45 சவரன் நகையை ஒப்படைத்த 'சொக்கத்தங்கம்'! தூய்மை பணியாளருக்கு தபால் தலை வெளியிட்டு கவுரவம்

சென்னை: சாலையில் கிடந்த 45 சவரன் நகைகளை, காவல்துறையினரிடம் ஒப்படைத்த தூய்மை பணியாளர் பத்மாவின் நேர்மையை பாராட்டி, அஞ்சல் துறை அவரது புகைப்படத்துடன் கூடிய சிறப்பு அஞ்சல் தலை வெளியிட்டு கௌரவித்திருக்கிறது.

சென்னை மாநகராட்சியில், தனியார் ஒப்பந்தம் மூலம் தூய்மைப் பணியாளராகப் பணியாற்றி வரும் பத்மா (50). இவர் கடந்த ஜனவரி 11ம் தேதி தனது வழக்கமான பணியில் ஈடுபட்டிருந்தார். அப்போது தி.நகர் வண்டிக்காரன் சாலையில். கிடந்த ஒரு பையை எடுத்துப் பார்த்தபோது, அதில் ஐஸ்கிரீம் டப்பாவிற்குள் ரூ.45 லட்சம் மதிப்பிலான 45 சவரன் தங்க நகைகள் இருந்தன.

எவ்வித சலனமும் இன்றி, அந்த நகைகளை உடனடியாகத் தனது மேற்பார்வையாளர் மூலம் பாண்டி பஜார் காவல் நிலையத்தில் ஒப்படைத்தார் பத்மா. இந்தச் செய்தி அறிந்த தமிழக முதலமைச்சர் மு.க. ஸ்டாலின், பத்மா அவர்களை நேரில் அழைத்துச் சால்வை அணிவித்துப் பாராட்டினார். மட்டுமல்லாது அவரது நேர்மைக்கு ஊக்கமாக அரசு சார்பில் ₹1 லட்சத்திற்கான காசோலை பரிசாக வழங்கப்பட்டது.

இந்நிலையில், பத்மா அவர்களின் இந்த உயரிய நேர்மையைப் போற்றும் வகையில், தமிழக அஞ்சல் துறையின் மத்திய கோட்டம், அவரது புகைப்படத்துடன் கூடிய சிறப்பு அஞ்சல் தலை ஒன்றை வெளியிட்டு கௌரவித்துள்ளது. சாமானியத் தூய்மைப் பணியாளரின் நேர்மையை அங்கீகரிக்கும் வகையில் அஞ்சல் துறை எடுத்த இந்த நடவடிக்கை சோஷியல் மீடியாக்களில் பெரும் வரவேற்பைப் பெற்றுள்ளது.

பொதுவாக நினைவு அஞ்சல் தலைகள் வெளியிடப்படுவதுண்டு. நாட்டின் மிக முக்கியமான ஆளுமைகள், சுதந்திரப் போராட்ட வீரர்கள், வரலாற்றுச் சிறப்புமிக்க இடங்கள் அல்லது தேசிய முக்கியத்துவம் வாய்ந்த நிகழ்வுகளுக்காக இவை வெளியிடப்படும். உயிருடன் இருப்பவர்களுக்குப் பொதுவாக இந்த வகை அஞ்சல் தலைகள் வெளியிடப்படாது. ஒரு நபர் மறைந்து 10 ஆண்டுகளுக்குப் பிறகுதான் இந்த அஞ்சல் தலை வெளியிடப்படும்.

இப்படி இருக்கையில், உயிருடன் இருக்கும் பத்மாவுக்கு, அஞ்சல் துறை முன்வந்து அஞ்சல் தலைகளை வெளியிட்டிருப்பது, பத்மாவுக்கு கிடைத்த மிகப்பெரிய கவுரவமாக பார்க்கப்படுகிறது.

English summary

Sanitation Worker Honored: Appreciating the honesty of sanitation worker Padma, who handed over 45 sovereigns of gold jewelry found on the road to the police, the postal department has honored her by issuing a special postage stamp featuring her photograph.