மத்திய ரயில்வே அமைச்சர் மகனுக்கு ஜாமீன் கிடைக்குமா, சிறை வாசமா? நாளை மறுநாள் தீர்ப்பு

By Veera Kumar

Published: Saturday, September 6, 2014, 17:48 [IST]

Subscribe to Oneindia Tamil

பெங்களூர்: நடிகையை காதலித்து திருமணம் செய்த விவகாரத்தில் மத்திய அமைச்சர் சதானந்த கவுடாவின் மகனுக்கு கைது வாரண்டு பிறப்பிக்கப்பட்டுள்ள நிலையில் அவரது முன்ஜாமீன் மீதான தீர்ப்பு திங்கள்கிழமைக்கு ஒத்தி வைக்கப்பட்டுள்ளது.

மத்திய ரயில்வே அமைச்சர் சதானந்த கவுடாவின் மகன் கார்த்திக் கவுடாவுக்கும், குடகு மாவட்டம் சோமவார்பேட்டையை சேர்ந்த நானய்யா என்பவரின் மகள் சுவாதிக்கும் கடந்த சில நாட்களுக்கு முன்பு திருமண நிச்சயதார்த்தம் நடந்தது. நிச்சயம் நடந்து முடிந்த சில மணி நேரத்தில் கார்த்திக் கவுடா தன்னை காதலித்து ஏற்கனவே ரகசிய திருமணம் செய்திருப்பதாக கன்னட நடிகை மைத்திரி பரபரப்பு குற்றச்சாட்டை வெளியிட்டார்.

Karthik Gowda bail plea: Judgement on Monday

இதுதொடர்பாக கார்த்திக் கவுடாவுக்கு எதிராக ஆர்.டி.நகர் போலீஸ் நிலையத்திலும் மைத்திரி புகார் கொடுத்தார். அதன்பேரில், கார்த்திக் கவுடா மீது பலாத்காரம், மோசடி உள்ளிட்ட பிரிவுகளில் போலீசார் வழக்கு பதிவு செய்து விசாரித்து வருகிறார்கள்.

இந்த சம்பவம் தொடர்பாக விசாரணைக்கு நேரில் ஆஜராகும்படி கார்த்திக் கவுடாவுக்கு ஆர்.டி.நகர் போலீசார் நோட்டீசு அனுப்பினர். ஆனால் அவர் விசாரணைக்கு ஆஜராகவில்லை.

இந்த நிலையில், நடிகையை பலாத்காரம் மற்றும் மோசடி செய்த வழக்கில் விசாரணைக்கு ஆஜராகமல் இருந்து வரும் கார்த்திக் கவுடாவுக்கு எதிராக பெங்களூர் 8வது கூடுதல் தலைமை மெட்ரோ பாலிட்டன் மாஜிஸ்திரேட்டு முன்பு ஆர்.டி.நகர் போலீசார் மனு தாக்கல் செய்தனர்.

அந்த மனுவை விசாரித்த மாஜிஸ்திரேட்டு, போலீஸ் விசாரணைக்கு ஆஜராகாமல் இருந்து வரும் கார்த்திக் கவுடாவை கைது செய்யும்படி பிடிவாரண்டு பிறப்பித்து நேற்று உத்தரவிட்டார். இந்நிலையில் முன்ஜாமீன் கேட்டு, பெங்களூர் நகர 63வது செஷன்ஸ் கோர்ட்டில் கார்த்திக் கவுடா தாக்கல் செய்த மனு மீது நேற்று, வாத பிரதிவாதம் நடந்தது.

இதையடுத்து தீர்ப்பை சனிக்கிழமை அளிப்பதாக நீதிபதி முடிகவுடர் அறிவித்தார். இன்று காலை நீதிபதி இந்த மனு மீதான தீர்ப்பை வழங்குவார் என்று எதிர்பார்க்கப்பட்ட நிலையில், வழக்கு மாலைக்கு ஒத்தி வைக்கப்பட்டது. இதையடுத்து நீதிமன்றத்தில் பத்திரிகையாளர்களும், சதானந்தகவுடா ஆதரவாளர்களும் பெருமளவில் குவிந்தனர். இந்நிலையில், தீர்ப்பை திங்கள்கிழமைக்கு ஒத்தி வைப்பதாக நீதிபதி அறிவித்தார்.

நீதிபதி முன்ஜாமீன் அளிக்காவிட்டால், கார்த்திக் கவுடா கைது செய்யப்படுவார் என்பது குறிப்பிடத்தக்கது.

Published On September 6, 2014