ஊரக உள்ளாட்சித் தேர்தல் விறுவிறு வாக்குப்பதிவு - ஜனநாயகக் கடமையாற்றிய 100 வயது பாட்டி

ஊராக உள்ளாட்சித் தேர்தலுக்கான வாக்குப்பதிவு காலை 7 மணிக்கு தொடங்கி விறுவிறுப்பாக நடைபெற்று வருகிறது. மாலை 6 மணி வரை வாக்குப்பதிவு நடைபெறும் என அறிவிக்கப்பட்டுள்ளது.

திருநெல்வேலி: 9 மாவட்ட ஊரக உள்ளாட்சித் தேர்தலில் பகல் 1 மணி வரை 33.78% வாக்குகள் பதிவாகி உள்ளன. தமிழ்நாட்டில் 9 மாவட்டங்களுக்கான ஊரக உள்ளாட்சித்தேர்தலில் மாவட்ட கவுன்சிலர், ஒன்றிய கவுன்சிலர், கிராம ஊராட்சித்தலைவர், கிராம ஊராட்சி வார்டு உறுப்பினர் ஆகிய 4 பதவியிடங்களுக்கான முதற்கட்ட வாக்குப்பதிவு காலை 7 மணிக்கு தொடங்கி விறுவிறுப்பாக நடைபெறுகிறது. 100 வயது பாட்டி நேரில் வந்து வாக்களித்து ஜனநாயகக் கடமையாற்றினார்.

ஊரக உள்ளாட்சித் தேர்தலில் 4 வகையான வாக்குச்சீட்டுகள் பயன்படுத்தப்படுகின்றன. கிராம ஊராட்சி வார்டு உறுப்பினர் - வெள்ளை நிறம், கிராம ஊராட்சி மன்ற தலைவர் - இளஞ்சிவப்பு நிறம், ஊராட்சி ஒன்றிய வார்டு உறுப்பினர் (ஒன்றிய கவுன்சிலர்) - பச்சை நிறம், மாவட்ட ஊராட்சி வார்டு உறுப்பினர் (மாவட்ட கவுன்சிலர்) - மஞ்சள் நிறம் ஆகிய வண்ண வாக்குசீட்டுகள் மூலம் வாக்கு செலுத்தப்படுகிறது.

காஞ்சிபுரம், செங்கல்பட்டு சுற்றுவட்டார பகுதிகளில் மழைபெய்து வரும்போதிலும் மக்கள் ஆர்வமுடன் தங்கள் வாக்குகளை செலுத்தி வருகின்றனர். நன்மங்கலம் ஊராட்சியில் உள்ள அரசினர் பள்ளியில் இயங்கும் வாக்குச் சாவடியில் நடைபெறும் வாக்குப் பதிவில் பொதுமக்கள் சமூக இடைவெளியை பின்பற்றாமல் ஒருவரோடு ஒருவர் மோதிக் கொண்டும், கூட்டம் கூட்டமாக நின்று வாக்களித்து வருகின்றனர். இதனால் அந்த வாக்குச் சாவடியில் கொரோனா ஏற்படும் அபாயம் ஏற்பட்டுள்ளது.

உள்ளாட்சித் தேர்தல் வாக்குப்பதிவை இணையதளம் மூலம் கண்காணிக்க ஏற்பாடு செய்யப்பட்டுள்ளது. முதல் 4 மணி நேரத்தில் 20 சதவீதத்துக்கு மேல் வாக்குகள் பதிவாகி இருக்கிறது. காலை 11 மணி நிலவரப்படி அதிகபட்சமாக தென்காசி மாவட்டத்தில் 24 சதவீதத்துக்கும் மேல் வாக்குகள் பதிவாகி உள்ளன. திருப்பத்தூர் மாவட்டத்தில் இதுவரை 61,000 பேர் வாக்களித்துள்ளனர். காலை 11 மணி நிலவரப்படி 14.7 சதவீதம் வாக்குகள் பதிவாகியுள்ளது.

நெல்லை மாவட்டத்தில் பாளையங்கோட்டை, மானூர், பாப்பாக்குடி, சேரன்மகாதேவி, அம்பை உள்ளிட்ட 5 யூனியன்களுக்கும் இன்று முதல்கட்ட வாக்குப்பதிவு காலை 7 மணிக்கு தொடங்கியது. இந்த முதற்கட்ட தேர்தலில் மாவட்ட கவுன்சிலர், ஒன்றிய கவுன்சிலர், கிராம ஊராட்சி தலைவர், கிராம ஊராட்சி வார்டு உறுப்பினர்கள் ஆகிய பதவிகளுக்கு ஏற்கனவே 211 பேர் போட்டியின்றி தேர்வு செய்யப்பட்டு விட்டனர்.இதனால் 5 ஒன்றியங்களிலும் 902 பதவி இடங்களுக்கு 3,006 பேர் போட்டியிடுகின்றனர்.

மாவட்டத்தில் முதற்கட்ட வாக்குப்பதிவிற்காக 621 வாக்குச்சாவடிகள் அமைக்கப்பட்டு உள்ளன. இவற்றில் 182 பதற்றமான வாக்குச்சாவடிகள் கண்டறியப்பட்டு உள்ளன. இதில் 64 வாக்குச்சாவடிகளில் நேரடியாக வீடியோ பதிவு செய்யப்பட்டு கண்காணிக்கப்பட்டு வருகிறது.

வாக்குப்பதிவை தொடர்ந்து இன்று காலை 6 மணி முதலே வாக்காளர்கள் தங்களது வாக்குச்சாவடிகளுக்கு சென்று வாக்களிக்க தொடங்கினர். பெரும்பாலான வாக்குப்பதிவு மையங்களில் காலையிலேயே மக்கள் கூட்டம் இருந்தது. நீண்ட வரிசையில் நின்று வாக்களித்தனர். குறிப்பாக முதியவர்கள், பெண்கள் காலையிலேயே திரண்டு வந்து வரிசையில் நின்று ஜனநாயக கடமையாற்றினர். இதனால் வாக்குப்பதிவு விறுவிறுப்புடன் காணப்பட்டது.

தேர்தல் ஆணையம் அறிவித்துள்ள ஆதார் கார்டு உள்ளிட்ட 11 வகையான ஆவணங்களில் ஏதேனும் ஒன்றை கொண்டு வந்தாலும், வாக்காளர்கள் ஓட்டு போட அனுமதிக்கப்பட்டனர். உள்ளாட்சி தேர்தலில் வாக்குச்சீட்டு நடைமுறை என்பதால் ஒவ்வொரு பதவிக்கும் ஒவ்வொரு நிறத்திலான வாக்குச்சீட்டுகள் அச்சடிக்கப்பட்டு உள்ளன.

தென்காசி மாவட்டத்தில் மொத்தம் உள்ள 10 ஊராட்சி ஒன்றியங்களில் முதற்கட்டமாக கடையம், ஆலங்குளம், கீழப்பாவூர், வாசுதேவநல்லூர், மேலநீலிதநல்லூர் ஆகிய 5 ஒன்றியங்களில் தேர்தல் இன்று நடந்தது. இதில் 1266 பதவியிடங்களுக்கு 3,534 வேட்பாளர்கள் போட்டியிடுகின்றனர்.

மாவட்டத்தில் மொத்தம் 1328 வாக்குச்சாவடிகளில் 357 வாக்குச்சாவடிகள் பதற்றமானவை என கண்டறியப்பட்டு உள்ளது. இன்று காலை 6 மணிக்கே வாக்காளர்கள் ஓட்டு போட மையங்களுக்கு திரண்டனர். பெரும்பாலான மையங்களில் காலை முதலே வாக்காளர்களின் கூட்டம் களை கட்டியது. ஆர்வமுடன் வந்து அவர்கள் ஓட்டுப்போட்டு சென்றனர்.

English summary

local body poll first phase for the 4 posts of District Councilor, Union Councilor, Grama Panchayat Leader and Grama Panchayat Ward Member will be held in the rural local government elections for 9 districts in Tamil Nadu from 7 am to 6 pm today. The second phase of the polls will be held on October 9, Saturday.