“டைம் ஸ்டார்ட்” - 2 முடிவுகள்.. தொடங்கும் சட்டப்பேரவை தொடர்! நிறைவேறும் பல நாள் எதிர்பார்ப்பு

Updated: Monday, October 17, 2022, 16:18 [IST]

Subscribe to Oneindia Tamil

சென்னை: தமிழ்நாடு சட்டப்பேரவைக் கூட்டத் தொடர் இன்று கூட இருக்கும் சூழலில் தமிழ்நாடு மக்கள் மற்றும் சமூக ஆர்வலர்கள் என பலராலும் எதிர்பார்க்கப்பட்ட முக்கிய முடிவுடன் 2 முடிவுகள் எடுக்கப்பட இருக்கின்றன.

கடந்த ஏப்ரல் 6 ஆம் தேதி தொடங்கி மே 10ஆம் தேதி வரை நடைபெற்ற தமிழ்நாடு சட்டப்பேரவைக் கூட்டத்தொடரில் பல முக்கிய அறிவிப்புகள் வெளியாகின.

சட்டப்பேரவை கூட்டத்தொடரை 6 மாதங்களுக்கு ஒரு முறை கூட்ட வேண்டும் என்ற விதி இருக்கும் நிலையில் இன்று சட்டப்பேரவைக் கூட்டத்தொடர் நடைபெறுகிறது.

இன்று சட்டப்பேரவைக் கூட்டம்

இன்று மறைந்த முன்னாள் சபாநாயகர் சேடப்பட்டி முத்தையா உட்பட முன்னாள் சட்டமன்ற உறுப்பினர்களுக்கு இரங்கல் தெரிவிக்கப்பட்டு பேரவை ஒத்திவைக்கப்படுகிறது. இதனைத் தொடர்ந்து அலுவல் ஆய்வு கூட்டம் நடைபெற்று அதில் எத்தனை நாட்கள் கூட்டத் தொடரை நடத்தலாம் என்பது குறித்து முடிவு செய்யப்படும்.

துணை நிதிநிலை அறிக்கை

மேலும் இந்த கூட்டத்தொடரில் துணை நிதிநிலை அறிக்கையும் கூட்டத்தொடரில் தாக்கல் செய்யப்பட உள்ளது. இந்த கூட்டத்தொடரில் இதில் எடுக்கப்பட்ட வேண்டிய முக்கிய முடிவுகள், நிறைவேற்றப்பட வேண்டிய மசோதாக்கள், எதிர்க்கட்சிகளின் தாக்குதல்கள் தொடர்பாக முதலமைச்சர் மு.க.ஸ்டாலின் கடந்த 14 ஆம் தேதி அமைச்சரவைக் கூட்டத்தை கூட்டி ஆலோசனை மேற்கொண்டார்.

ஆன்லைன் ரம்மி தடை

சமீபத்தில் ஆன்லைன் ரம்மி உள்ளிட்ட மக்களை ஏமாற்றும், தற்கொலைக்கு தூண்டும் இணையதள விளையாட்டுக்களுக்கு தடை விதிக்க வலியுறுத்தி கொண்டு வரப்பட்ட அவசர சட்டத்துக்கு ஆளுநர் ஆர்.என்.ரவி ஒப்புதல் அளித்த நிலையில், அதற்கு நிரந்தர தீர்வு வழங்குவதற்கான மசோதாவை சட்டப்பேரவையில் தாக்கல் செய்ய இந்த அமைச்சரவை கூட்டத்தில் ஒப்புதல் அளிக்கப்பட்டது. எனவே அந்த மசோதா இதில் தாக்கல் செய்யப்படுகிறது.

வெளிநாட்டு முதலீடுகள்

அதேபோல் தமிழ்நாட்டுக்கு அந்நிய முதலீடுகளை ஈர்ப்பது தொடர்பாக தங்கம் தென்னரசு, தா.மோ.அன்பரசன், பிடிஆர் பழனிவேல் தியாகராஜன் உள்ளிட்ட அமைச்சர்கள் வெளிநாடுகளுக்கு சென்று பேச்சுவார்த்தைகளை மேற்கொண்டனர். இதன் விளைவாக பல வெளிநாட்டு நிறுவனங்கள் தமிழ்நாட்டில் தொழில் தொடங்க முடிவு செய்துள்ளன. இதற்கான அனுமதி வழங்குவது, தொழிலை விரிவாக்கம் செய்வது, சலுகை வழங்குவது தொடர்பாகவும் விவாதிக்கப்பட்டு ஒப்புதல் பெறப்பட்டது.