"யூஸ்" பண்ணிட்டு தூக்கி வீசுவது எல்லாம் ரொம்ப தப்புங்க.. பாஜக தலைமையை மறைமுகமாக சாடிய நிதின் கட்கரி!

Updated: Sunday, August 28, 2022, 17:20 [IST]

Subscribe to Oneindia Tamil

டெல்லி: மத்திய அமைச்சர் நிதின் கட்கரி பாஜகவின் சக்திவாய்ந்த நாடாளுமன்றக் குழுவிலிருந்து நீக்கப்பட்டு உள்ள நிலையில், பாஜக தலைமையை மறைமுகமாகச் சாடும் வகையில் அவர் கருத்து தெரிவித்துள்ளார்.

பாஜகவின் மூத்த தலைவரும் மத்திய அமைச்சருமான நிதின் கட்கரி, அவ்வப்போது சொந்த கட்சியையே சாடும் வகையில் கருத்துகளைத் தெரிவித்து வருவதை வாடிக்கையாகக் கொண்டுள்ளார்.

கடந்த சில நாட்களுக்கு முன்னர் தான், இப்போது அரசியல் என்பதே அதிகாரத்தைப் பிடிப்பதாக இருப்பதாகவும் இதனால் அரசியலில் இருந்து விலக நினைத்ததாகவும் குறிப்பிட்டார்.

கட்கரி

முன்னதாக கடந்த வாரம் தான், 2024 தேசியத் தேர்தல் உட்பட தேர்தலுக்கான திட்டங்களை முடிவு செய்யும் பாஜகவின் சக்திவாய்ந்த நாடாளுமன்றக் குழுவிலிருந்து கட்கரி நீக்கப்பட்டார். முன்னாள் பாஜக தலைவரும் வலுவான ஆர்எஸ்எஸ் பின்னணி கொண்ட நிதின் கட்கரி இந்த குழுவில் இருந்து நீக்கப்பட்டது ஆச்சரியமாகவே பார்க்கப்படுகிறது. ஏனென்றால், பொதுவாக இந்த குழுவில் பாஜக முன்னாள் தலைவர்கள் எப்போதும் இருப்பார்கள்.

தோல்வி

இதனிடையே இதையும் மறைமுகமாக நிதின் கட்கரி விமர்சித்து கருத்து தெரிவித்து உள்ளார். நாக்பூரில் நடைபெற்ற தொழில்முனைவோர் கூட்டத்தில் உரையாற்றிய மத்திய அமைச்சர் நிதின் கட்கரி, எந்த ஒரு மனிதனும் தோற்கடிக்கப்பட்டால் அத்துடன் அவன் வாழ்வு முடிவதில்லை, ஆனால் அதை ஒப்புக்கொண்டு வெளியேறும் போது தான் அவன் வாழ்க்கை உண்மையில் தோல்வி அடைவதாகச் சாடியுள்ளார்.

தூக்கி வீச கூடாது

இது தொடர்பாக நிதின் கட்கரி கூறுகையில், "தொழில், மக்கள் நலன் சார்ந்த சமூகப் பணி, அரசியல் இருப்பவர்கள் என அனைத்து தரப்பினருக்கும் மனித உறவுகளே மிகப்பெரிய பலம். எந்தவொரு நபரையும் பயன்படுத்து விட்டுத் தூக்கி வீசுவது சரியான நடைமுறை இல்லை. நல்ல நாட்களாக இருந்தாலும் சரி, மோசமான நாட்களாக இருந்தாலும் சரி, உங்களுடன் இருக்கும் நபர்களை எப்போதும் கைவிடக் கூடாது" என்று மறைமுகமாகச் சாடினார்.

மறைமுக சாடல்

தொடர்ந்து தனது கல்லூரி நாட்கள் குறித்த நினைவுகளைப் பகிர்ந்த அவர், "சிறந்த எதிர்காலம் வேண்டும் என்றால் காங்கிரஸ் கட்சியில் சேருமாறு காங்கிரஸ் கட்சியின் ஸ்ரீகாந்த் ஜிச்கர் எனக்கு அழைப்பு விடுத்தார். எனக்குக் காங்கிரஸ் கட்சியின் சித்தாந்தம் பிடிக்கவில்லை. காங்கிரஸ் கட்சியில் இணைவதற்குப் பதிலாக நான் கிணற்றில் இருந்து குதித்து உயிரிழந்துவிடுவேன் என்று அவரிடமே நான் கூறினேன்" என்றார்.

கைவிட கூடாது

மேலும் அவர், "இளம் தொழில்முனைவோர் தங்கள் விருப்பங்களை ஒருபோதும் கைவிடக் கூடாது. முன்னாள் அமெரிக்க அதிபர் ரிச்சர்ட் நிக்சன் தனது சுயசரிதையில் பொறிக்கப்பட்ட பொன்னான வார்த்தைகளை நாம் அனைவரும் நினைவில் கொள்ள வேண்டும். ஒரு மனிதன் தோற்கடிக்கப்பட்டால் அவன் வாழ்க்கை முடிவதில்லை.. ஆனால் அவன் வெளியேறும்போது அவன் முடிந்துவிடுகிறான்" என்றார்.